1. Ita estuda beibeik kona-ba saida deʼit iha reuniaun? Oinsá mak estuda beibeik ajuda ita?

 KUANDU ita prepara estudu Livru Haklaken, dala ruma ita hanoin: ‘Informasaun neʼe ita rona ona’, loos ka lae? Se ita tuir reuniaun husi Testemuña ba Jeová kleur ona, karik ita haree katak ita sempre rona informasaun neʼebé hanesan. Porezemplu, ita estuda beibeik kona-ba Maromak nia Ukun, Jesus nia sakrifísiu, serbisu haklaken, ka kona-ba domin no fiar. Hodi estuda hanesan neʼe ajuda ita atu hametin ita-nia fiar no sai ema neʼebé ‘halo tuir liafuan, laʼós deʼit rona nia’.—Tiago 1:22.

2. (a) Dala ruma, Bíblia uza liafuan “konsellu” atu koʼalia kona-ba saida? (b) Oinsá mak Jeová nia ukun-fuan la hanesan ho ema nian?

² Dala ruma, Bíblia uza liafuan “konsellu” atu koʼalia kona-ba lei, ukun-fuan, no mandamentu neʼebé Maromak repete beibeik hodi fó-hanoin ninia povu. Jeová nia ukun-fuan mak la hanesan duni ho ema nian, tanba ema nia ukun-fuan la kompletu no presiza troka beibeik. Maibé, Jeová nia ukun-fuan mak perfeitu, no ita bele tau fiar ba ida-neʼe. Kuandu ita halo tuir, ita sempre hetan rezultadu diʼak. Klaru katak maski ita la presiza halo tuir ona ukun-fuan balu husi tempu antigu, maibé neʼe laʼós katak ukun-fuan sira-neʼe mak sala. Ema neʼebé hakerek salmu ida hatete: “Ita-nia konsellu mak loos ba nafatin.”—Salmo (Mazmur) 119:144.

3, 4. (a) Jeová nia konsellu dala ruma inklui mós saida? (b) Se sira halo tuir Jeová nia liafuan, sira sei hetan rezultadu saida?

³ Jeová nia konsellu dala ruma inklui mós avizu sira. Nasaun Israel hetan avizu beibeik liuhusi Maromak nia profeta sira. Porezemplu, foin antes sira tama iha rai neʼebé Maromak promete nanis, Moisés fó avizu ba sira hodi dehan: “Kuidadu atu imi-nia  laran labele monu hodi imi hasees an no adora maromak sira seluk no hakruʼuk ba sira. Se lae, Jeová nia hirus sai makaʼas hasoru imi.” (Deuteronômio [Ulangan] 11:16, 17) Iha Bíblia, ita hetan konsellu diʼak barak neʼebé Maromak fó ba ninia povu.

⁴ Jeová hanorin beibeik ba ema Israel atu hamtaʼuk no rona nia, no halo santu ninia naran. (Deuteronômio [Ulangan] 4:29-31; 5:28, 29) Maromak promete katak se sira halo tuir nia, sira sei hetan bensaun barak husi nia.—Levítico (Imamat) 26:3-6; Deuteronômio (Ulangan) 28:1-4.

5. Tanbasá mak Maromak halo funu hodi ajuda Liurai Ezequias?

⁵ Maromak sempre kumpre ninia promesa ba nasaun Israel. Porezemplu, bainhira tropa Asíria no sira-nia Liurai Senaquerib mak tama iha rai-Judá no ameasa Liurai Ezequias, Jeová haruka anju ida atu salva Ninia povu. Iha kalan ida deʼit nia laran, anju neʼe oho Asíria nia tropa naʼin-185.000, no ida-neʼe hamoe Senaquerib hodi halo nia fila ba ninia rai. (2 Crônicas [Tawarikh] 32:21; 2 Reis [Raja-Raja] 19:35) Tanbasá mak Maromak halo funu hasoru Senaquerib hodi ajuda Liurai Ezequias? Neʼe tanba Ezequias hatudu laran-metin ba Jeová no “nafatin halo tuir ninia mandamentu sira”.—2 Reis (Raja-Raja) 18:1, 5, 6.

6. Oinsá mak Liurai Josias hatudu ninia fiar ba Jeová?

⁶ Liurai Josias mós halo tuir Jeová nia mandamentu. Husi kiʼik, nia halo “buat neʼebé loos iha Jeová nia matan”. (2 Crônicas [Tawarikh] 34:1, 2) Josias hatudu ninia fiar ba Jeová hodi halakon lulik ka estátua sira hotu iha rai neʼe no ajuda povu atu adora fali Jeová. Tan neʼe, Jeová mós fó bensaun ba Josias no nasaun tomak.—Lee 2 Crônicas (Tawarikh) 34:33. a

7. Bainhira ema Israel la halo tuir Jeová nia konsellu, saida mak akontese?

⁷ Maibé, laʼós katak Maromak nia povu sempre tau fiar ba Jeová nia konsellu sira. Durante tinan atus ba atus, dala barak sira la halo tuir Jeová. Bainhira sira-nia fiar sai fraku, sira monu lalais ba tentasaun atu adora maromak falsu sira. (Efeso 4:13, 14) Hanesan Maromak fó  avizu ona ba sira, bainhira sira la tau fiar ba nia, sira hetan susar oioin.—Levítico (Imamat) 26:23-25; Jeremias (Yeremia) 5:23-25.

8. Ita bele aprende saida husi istória neʼe?

⁸ Ita bele aprende saida husi istória neʼe? Maromak nia povu ohin loron mós hetan konsellu no dixiplina beibeik. (2 Pedro 1:12) Bíblia fó-hanoin ita Jeová nia ukun-fuan. No Jeová husik ita atu hili se ita halo tuir ninia mandamentu, ka halo buat neʼebé loos tuir ita rasik nia hanoin. (Provérbios [Amsal] 14:12) Entaun, mai ita koʼalia kona-ba tanbasá mak ita tenke tau fiar tomak ba Jeová nia konsellu no oinsá mak ida-neʼe sei lori rezultadu diʼak ba ita.

9. Bainhira povu Israel iha rai-fuik maran, oinsá mak Jeová hatudu katak nia kuidadu sira?

⁹ Bainhira povu Israel komesa laʼo iha rai-fuik maran ba tinan 40, Jeová la hatete oinsá mak nia sei proteje, tau matan, no fó matadalan ba sira. Maibé, liuhusi dalan oioin, Jeová hatudu katak sira bele tau fiar ba nia no ninia konsellu sira. Hodi uza koluna kalohan nian iha loron no koluna ahi nian iha kalan, Jeová fó-hanoin ninia povu katak nia sempre kuidadu sira nuʼudar sira halo viajen neʼebé susar. (Êxodo [Keluaran] 40:36-38; Deuteronômio [Ulangan] 1:19) Jeová mós sempre fó buat neʼebé sira presiza. Bíblia hatete: “Sira la kuran buat ida. Sira-nia roupa la sai bosan, no sira-nia ain sei la moras.”—Neemias 9:19-21.

10. Oinsá mak Jeová tau matan ba ninia povu ohin loron?

¹⁰ Maromak nia atan ohin loron mós besik ona atu tama iha mundu foun. Ita fiar ka lae, katak Jeová sei fó buat hotu neʼebé ita presiza atu moris liu “terus boot”? (Mateus 24:21, 22; Salmo [Mazmur] 119:40, 41) Klaru katak Jeová la uza koluna kalohan nian no ahi nian atu lori ita ba mundu foun. Maibé Jeová uza ninia organizasaun hodi ajuda ita atu matan-moris nafatin. Porezemplu, ita hetan konsellu beibeik atu lee Bíblia, halaʼo adorasaun família nian, tuir reuniaun no bá haklaken. Ita halo ona mudansa ruma iha ita-nia moris hodi halo tuir matadalan sira-neʼe ka lae? Ida-neʼe sei ajuda ita atu hametin ita-nia fiar no tama iha mundu foun.

11. Iha dalan saida deʼit mak Maromak hatudu katak nia hanoin ita?

¹¹ Maromak nia organizasaun mós fó matadalan mai ita atu halo desizaun diʼak iha ita-nia moris loroloron nian. Matadalan sira-neʼe inklui konsellu kona-ba halaʼo moris simples atubele hamenus laran-susar. Ita mós aprende oinsá atu hatais ka hadiʼa an, no oinsá atu halo desizaun diʼak kona-ba atividade halimar nian no edukasaun. Ita mós hetan konsellu diʼak atubele sees husi perigu oioin hodi tau matan ba ita-nia uma, karreta, no Reuniaun-Fatin, no mós kona-ba oinsá prepara an ba dezastre oioin. Buat sira-neʼe hotu hatudu duni katak Maromak hakarak ita atu iha saúde diʼak no moris haksolok.

12. (a) Jesus hatete beibeik ba ninia dixípulu sira kona-ba saida? (b) Pedro la haluha kona-ba saida? Oinsá mak Jesus nia ezemplu neʼe kona ita?

¹² Iha Jesus nia tempu, Maromak nia povu hetan konsellu beibeik. Porezemplu, Jesus sempre hatete ba ninia dixípulu sira katak sira tenke hatudu haraik-an. Maibé Jesus nia hanorin neʼe laʼós deʼit liuhusi liafuan. Nia mós hanorin liuhusi ninia ezemplu rasik. Kalan antes Jesus mate, nia ho ninia apóstolu  sira halibur hamutuk atu selebra Páskua. Bainhira sira han daudaun, Jesus hamriik no fase apóstolu sira-nia ain. Ida-neʼe mak serbisu neʼebé baibain atan sira mak halo. (Joao 13:1-17) Buat neʼebé Jesus halo iha kalan neʼe, apóstolu sira nunka haluha. Liutiha maizumenus tinan 30, apóstolu Pedro fó konsellu ba ninia maluk kristaun kona-ba haraik-an. (1 Pedro 5:5) Jesus nia ezemplu diʼak neʼe sei book ita hotu atu hatudu haraik an ba malu.—Filipe 2:5-8, MF.

13. Jesus mós hanorin beibeik ba ninia dixípulu sira kona-ba saida?

¹³ Buat ida seluk neʼebé Jesus koʼalia beibeik ba ninia dixípulu sira mak kona-ba fiar metin. Loron ida, dixípulu sira la konsege hasai espíritu aat husi labarik ida. Sira husu ba Jesus: ‘Tansá mak ami la bele halo ida-neʼe?’ Jesus hatán: “Tanba imi-nia fiar kiʼik. Tebes, haʼu dehan ba imi: imi-nia fiar hanesan mostarda musan ida karik, . . . buat ida sei la susar ba imi.” (Mateus 17:14-20) Jesus hanorin ninia dixípulu sira katak importante tebes atu iha fiar neʼebé metin. (Lee Mateus 21:18-22.) Ita tuir reuniaun boot no reuniaun sira hotu atubele hametin ita-nia fiar ka lae? Reuniaun sira-neʼe laʼós deʼit tempu atu ransu malu ho haksolok, maibé ida-neʼe mak oportunidade atu hatudu ita-nia fiar ba Jeová.

14. Tanbasá mak importante atu hatudu domin neʼebé loos ba malu ohin loron?

¹⁴ Iha Eskritura Lia-Gregu inklui konsellu kona-ba hadomi malu. Jesus hatete katak ukun-fuan segundu mak atu ‘hadomi ema seluk hanesan ita-nia an rasik’. (Mateus 22:39) Jesus nia alin Tiago dehan katak hatudu domin mak ukun-fuan neʼebé boot liu. (Tiago 2:8, MF) Apóstolu João hatete: “Haʼu-nia doben sira, ukun-fuan neʼebé haʼu hakerek ba imi laʼós buat foun ida; neʼe mak ukun-fuan tuan neʼebé imi simu ona horiuluk kedas. Maibé, ohin haʼu hakerek ba imi ukun-fuan foun duni.” (1 Joao 2:7, 8) “Ukun-fuan tuan” katak sá? Neʼe mak atu hatudu domin. Ukun-fuan neʼe “tuan” tanba Jesus hatete ona “horiuluk kedas”. Maibé iha versíkulu 8 João hatete katak ukun-fuan neʼe mós “foun”. Tanbasá? Tanba Jesus nia dixípulu sira presiza hatudu domin iha dalan neʼebé tau uluk ema seluk nia diʼak iha situasaun foun neʼebé sira hasoru. Ohin loron, ita hafolin avizu sira neʼe tanba ida-neʼe ajuda ita atu hatudu domin duké buka ita rasik nia diʼak hodi haleno mundu nia hahalok.

15. Saida mak Jesus nia serbisu neʼebé importante liu iha mundu?

¹⁵ Jesus hadomi ema. Nia hatudu ida-neʼe hodi kura ema neʼebé moras no halo ema mate moris hiʼas fali. Maski nuneʼe,  Jesus nia serbisu neʼebé importante liu mak laʼós kura ema, maibé serbisu haklaken no hanorin tanba ida-neʼe sei ajuda ema iha dalan neʼebé diʼak liután. Oinsá? Porezemplu, ema neʼebé sai isin-diʼak no moris hiʼas, sira hotu ikusmai sai ferik-katuas no mate, maibé ema neʼebé simu Jesus nia liafuan bele hetan moris rohan-laek.—Joao 11:25, 26.

16. Oinsá mak Testemuña ba Jeová ohin loron halo tuir Jesus nia mandamentu?

¹⁶ Jesus hatete ba ninia dixípulu sira: “Laʼo bá, hanorin nasaun hotu-hotu.” (Mateus 28:19) Jesus nia dixípulu sira husi tempu neʼebá toʼo ohin loron halo tuir duni ninia mandamentu neʼe! Agora daudauk Testemuña ba Jeová naʼin-7.000.000 liu mak halaʼo serbisu haklaken ho badinas iha rai hamutuk 230 liu, no sira mós halaʼo estudu Bíblia ho ema rihun ba rihun. No serbisu haklaken neʼe hatudu ho loloos katak ita moris iha loron ikus sira.

17. Paulo ho Pedro fó konsellu saida?

¹⁷ Depois Jesus mate, ema kristaun sira rona nafatin konsellu neʼebé fó-hanoin sira atu hametin sira-nia fiar. Porezemplu, bainhira Paulo iha dadur laran iha Roma, nia hatete ba Timóteo: “Haree nuʼudar doutrina loos liafuan sira neʼebé ó rona husi haʼu.” (2 Timoteo 1:13) Ita bele fiar katak liafuan neʼe fó laran-manas ba Timóteo. Apóstolu Pedro mós fó laran-manas ba maluk kristaun sira atu kontrola an, hatudu laran-metin, no hadomi malu, hodi hatete: “Haʼu sempre prontu atu fó-hanoin imi kona-ba buat sira-neʼe maski imi hatene ona buat sira-neʼe no imi metin ona iha lia-loos.”—2 Pedro 1:5-8, 12, MF.

18. Ema kristaun iha apóstolu nia tempu sente oinsá kona-ba konsellu neʼebé sira simu?

¹⁸ Sin, buat neʼebé Paulo ho Pedro hakerek ba kongregasaun mak atu hanesan deʼit ho “liafuan sira neʼebé profeta santu sira hateten nanis ona”. (2 Pedro 3:2) Maibé, sira neʼebé lee karta sai laran-kanek ka lae? Lae. Sira hatene katak Maromak mak fó konsellu neʼe tanba nia hadomi sira no hakarak ajuda sira atu laran-metin nafatin.—2 Pedro 3:18.

19, 20. Tanbasá mak ita bele tau fiar ba Jeová nia konsellu sira? Hodi halo ida-neʼe sei lori rezultadu saida mai ita?

¹⁹ Ohin loron, ita iha razaun barak atu tau fiar ba Jeová nia konsellu iha ninia Liafuan Bíblia. (Lee Josué [Yosua] 23:14. b) Istória husi Bíblia fó sai buat neʼebé Maromak halo ba ema, no ida-neʼe hakerek ba ita-nia diʼak. (Roma 15:4; 1 Korinto 10:11) Ita mós haree oinsá mak Bíblia nia profesia sai loos daudauk iha ita-nia tempu. Porezemplu, ema rihun ba rihun halaʼo adorasaun loos ba Jeová hodi kumpre profesia kona-ba “loron sira-nia rohan”. (Isaías [Yesaya] 2:2, 3) Situasaun iha mundu neʼe sai aat ba beibeik, maibé ida-neʼe mós parte husi profesia neʼebé hakerek nanis ona. Liután neʼe, serbisu haklaken iha mundu tomak kumpre duni Jesus nia profesia.—Mateus 24:14.

²⁰ Husi tempu ulukliu toʼo ohin loron, ita-nia Kriadór hatudu ona katak ita bele tau fiar ba nia. Entaun, ita halo tuir ninia konsellu ka lae? Irmán ida naran Rosellen hatete: “Nuʼudar haʼu tau fiar tomak ba Jeová, haʼu haree ho klaru liután katak nia hadomi haʼu no hametin haʼu.” Loos duni, hodi halo tuir Jeová nia konsellu, ita sei hetan bensaun husi Nia.