IHA tinan sanulu liubá, Gregorio ho Marilou, kaben-naʼin neʼebé sira-nia tinan maizumenus 30, serbí nuʼudar pioneiru regulár iha sidade Manila. Sira mós serbisu tempu-tomak hodi manán osan no maski ida-neʼe susar uitoan, maibé sira konsege hetan sira-nia oras haklaken. Lakleur tan Marilou hetan pozisaun hodi sai xefe iha nia serbisu-fatin iha banku. Marilou hatete: “Ami-nia serbisu neʼebé diʼak husik ami atu moris iha dalan neʼebé la falta buat ida.” Tanba sira hetan osan barak, sira hakarak atu harii uma boot iha fatin neʼebé kapás dook kilómetru 19 husi sidade Manila. Sira asina kontratu ho kompañia ida atu halo sira-nia uma, no fulan-fulan sira tenke selu ba kompañia neʼe hodi selu hotu iha tinan sanulu nia laran.

Marilou hatete: “Tanba haʼu presiza uza haʼu-nia tempu no forsa barak ba haʼu-nia serbisu foun, tan neʼe haʼu-nia laran-manas ba atividade kristaun nian sai menus. Haʼu sente katak haʼu naʼok husi Jeová. Tempu neʼebé haʼu promete ona atu fó ba nia, haʼu la bele fó ona.” Sira sai laran-triste kona-ba sira-nia situasaun no loron ida sira tuur hamutuk hodi koʼalia kona-ba saida mak sira halo daudaun ho sira-nia moris. Gregorio hatete: “Maski ami hakarak halo  mudansa iha ami-nia moris, maibé ami la hatene atu halo saida. Ami koʼalia kona-ba oinsá mak atu uza tempu barak liután hodi serbí Jeová, liuliu tanba ami la iha oan. Haʼu no haʼu-nia feen halo orasaun atu husu Jeová nia ajuda.”

Iha tempu neʼebá, sira rona diskursu balu kona-ba serbí iha fatin neʼebé presiza haklaken-naʼin. Gregorio dehan: “Liuhusi diskursu sira-neʼe ami sente katak Jeová hatán ami-nia orasaun.” Kaben-naʼin neʼe husu Jeová atu aumenta sira-nia fiar no aten-brani hodi halo desizaun neʼebé loos. Buat neʼebé hanetik sira mak uma neʼebé sira halo daudaun. Osan neʼebé sira selu ba uma neʼe ba tinan tolu ona. Saida mak sira sei halo? Marilou hatete: “Se kuandu ami hakotu kontratu neʼe, ami sei lakon osan hotu neʼebé ami selu ona, neʼe mak osan barak tebes. Maibé ami haree ida-neʼe nuʼudar dalan atu tau Jeová nia hakarak uluk duké ami-nian.” Sira hanoin-hetan apóstolu Paulo nia liafuan kona-ba “husik lakon deʼit buat hotu”, no sira para atu halo uma. Sira sai husi sira-nia serbisu, faʼan sira-nia sasán barak no muda ba suku neʼebé dook iha rai kiʼik naran Palawan neʼebé maizumenus kilómetru 480 husi sidade Manila.—Filipe 3:8.

Antes Gregorio no Marilou atu muda, sira prepara sira-nia an uluk atu moris simples. Maibé kuandu sira muda ona, sira haree katak moris iha Palawan mak simples liu buat neʼebé sira uluk hanoin. Marilou dehan: “Ami sai hakfodak, tanba la iha eletrisidade ka sasán neʼebé baibain ita presiza hodi moris diʼak. Porezemplu hodi teʼin, duké uza rice cooker ami presiza tesi ai no sunu. Haʼu mós hanoin fali loja boot, restaurante sira no buat seluk tan neʼebé ami husik iha sidade Manila.” Maski nuneʼe, sira hanoin didiʼak razaun neʼebé sira muda no lakleur sira sai toman iha sira-nia fatin foun. Marilou hatete: “Agora haʼu haksolok atu haree kriasaun neʼebé furak hanesan fitun sira iha kalan. Maibé buat neʼebé haʼu gosta liu mak atu haree ema nia oin sai kontente kuandu ami haklaken ba sira. Hodi serbí iha-neʼe, ami ‘aprende ona segredu’ kona-ba oinsá moris kontente.”—Filipe 4:12, MF.

Gregorio hatete: “Bainhira ami toʼo iha Palawan, fatin neʼe iha Testemuña naʼin-haat deʼit. Sira sai kontente tebes kuandu haʼu hatoʼo diskursu públiku semana-semana no toka haʼu-nia viola hodi sira bele kanta ita-nia knananuk sira.” Liutiha tinan ida, Gregorio no Marilou haree grupu kiʼik neʼe sai kongregasaun neʼebé iha haklaken-naʼin hamutuk 24. Gregorio hatete: “Kongregasaun neʼe hatudu domin ba ami iha dalan neʼebé kona duni ami-nia laran.” Sira serbí tinan neen ona iha Palawan no kuandu sira hanoin fali kona-ba sira-nia tempu iha fatin neʼe, sira dehan: “La iha buat ida neʼebé lori haksolok boot liu fali hodi haree ema barak tama kongregasaun. Sin, ami sente katak buat neʼebé ami halo agora mak iha folin duni.”

Iha rai-Filipinas irmaun-irmán sira maizumenus naʼin-3.000 mak muda ba fatin neʼebé presiza haklaken-naʼin. Husi ema barak neʼe, naʼin-500 mak irmán klosan sira. Mai ita koʼalia kona-ba irmán Karen nia ezemplu.

Karen nia tinan maizumenus 25 no nia sai boot iha suku ida naran Baggao iha distritu Cagayan. Uluk kuandu nia idade kiʼik, Karen hanoin beibeik kona-ba oinsá nia hakarak uza nia tempu barak liután atu haklaken. Nia hatete: “Tanba haʼu hatene katak tempu badak liu ona no ema barak seidauk rona liafuan kona-ba Maromak nia Ukun, haʼu hakarak serbí iha fatin neʼebé presiza haklaken-naʼin.” Maski nia família balu hakaʼas nia atu hetan edukasaun boot duké haklaken iha fatin neʼebé dook, maibé Karen halo orasaun no husu Jeová atu ajuda nia. Nia mós koʼalia hamutuk ho irmaun-irmán sira neʼebé serbí iha fatin neʼebé dook husi sidade. Kuandu nia sai tinan 18 nia muda ba fatin neʼebé dook kilómetru 64 husi ninia moris-fatin.

Karen ajuda kongregasaun neʼebé presiza haklaken-naʼin iha fatin ida neʼebé iha foho besik tasi. Karen konta: “Ami tenke laʼo loron tolu hodi toʼo kongregasaun foun neʼe. Ami presiza tun-saʼe foho no hakur mota sira dala 30. Haʼu laʼo oras neen hodi bá toʼo haʼu-nia estudante nia uma, no iha neʼebá haʼu toba kalan ida. Loron tuirmai atu fila ba uma haʼu presiza laʼo oras neen tan.” Karen nia hakaʼas-an neʼe saugati deʼit ka lae? Karen hatete: “Dala ruma haʼu-nia ain moras tebes, maibé haʼu iha estudante Bíblia naʼin-18.” Ho oin-midar nia hatutan tan: “Haʼu ‘koko no haree katak Jeová mak diʼak’!”—Salmo (Mazmur) 34:8.

Saida mak book irmán klosan ida naran Sukhi neʼebé tinan 40 atu husik nia hela-fatin iha Estadus Unidas no muda ba rai-Filipinas? Iha tinan 2011 nia tuir reuniaun boot ba loron rua no rona kaben-naʼin ida nia entrevista. Sira konta kona-ba oinsá sira faʼan sira-nia sasán barak hodi muda ba rai-Méxiku atu ajuda serbisu haklaken iha neʼebá. Irmán Sukhi hatete: “Entrevista neʼe book duni haʼu atu halo planu neʼebé foun.” Sukhi nia avó sira mak ema Índia no kuandu Sukhi rona katak ema Índia hela iha rai-Filipinas no barak seidauk rona kona-ba lia-loos, nia halo desizaun hodi ajuda iha neʼebá. Sukhi hetan susar saida deʼit hodi halo tuir nia planu neʼe?

Sukhi hatete: “Haʼu presiza halo desizaun neʼebé susar kona-ba sasán, hanesan ida-neʼebé mak haʼu sei rai no ida-neʼebé atu faʼan. No mós ba tinan 13 haʼu hela mesak iha haʼu-nia uma rasik. Maibé haʼu muda atu hela hamutuk ho haʼu-nia família. Tanba haʼu la iha armáriu, haʼu tau haʼu-nia sasán iha kaixa deʼit. Maski ida-neʼe susar, maibé neʼe ajuda haʼu atu aprende moris iha dalan neʼebé simples.”  Kuandu Sukhi muda ona ba rai-Filipinas nia hasoru susar tan ka lae? Nia dehan: “Haʼu taʼuk tebes animál kiʼik sira, no mós haʼu hanoin loos haʼu-nia família. Tan neʼe haʼu aprende atu sadere ba Jeová liután.” Mudansa neʼebé Sukhi halo iha ninia moris saugati deʼit ka lae? Ho oin-midar nia hatán: “Jeová dehan: ‘Koko haʼu bá kona-ba neʼe, se haʼu sei fakar bensaun ba imi.’ Liafuan neʼe kona-ba Jeová nia bensaun sai loos iha haʼu-nia moris, liuliu kuandu uma-naʼin husu haʼu atu fila fali hodi vizita nia tanba nia iha pergunta barak. Haʼu sente kontente no laran kmaan atu ajuda ema neʼebé hakarak aprende kona-ba Jeová.” (Malaquias [Maleakhi] 3:10) Sukhi hatutan tan: “Tuir loloos buat neʼebé susar liu mak hodi halo desizaun atu muda. Maibé bainhira haʼu muda ona, Jeová mak tau matan haʼu nia presiza hotu.”

Irmaun ida neʼebé kaben ona naran Sime ho tinan 38, husik ninia rai Filipinas no bá rai ida iha Médiu Oriente hodi tama serbisu neʼebé manán osan boot. Iha neʼebá nia simu laran-manas husi katuas área nian no diskursu ida husi irmaun neʼebé serbí nuʼudar membru ida iha Grupu Administradór. Buat neʼebé sira hatete book Sime atu tau uluk Jeová iha ninia moris. Maibé nia dehan: “Kuandu haʼu hanoin atu husik serbisu, haʼu sente taʼuk la halimar.” Maski nuneʼe, Sime husik nia serbisu no fila fali ba rai-Filipinas. Ohin loron, Sime ho nia feen naran Haidee serbí iha distritu Davao del Sur iha haklaken fatin neʼebé boot tebes, neʼebé presiza haklaken-naʼin. Nia hatete: “Kuandu haʼu hanoin fila fali kona-ba uluk, haʼu kontente katak haʼu manán hasoru haʼu-nia sentimentu taʼuk kona-ba husik serbisu, atu tau uluk Jeová iha haʼu-nia moris. Sin, hodi fó ba Jeová buat neʼebé ita bele, ida-neʼe lori haksolok liu fali buat hotu.”

Kaben-naʼin kristaun ida neʼebé serbí nuʼudar pioneiru regulár naran Ramilo ho Juliet, rona katak kongregasaun neʼebé besik, maizumenus kilómetru 30 presiza haklaken-naʼin no sira prontu atu ajuda. Tan neʼe semana-semana maski udan boot ka loron manas, sira bá-mai ho motór dala barak hodi tuir reuniaun sira no halo serbisu haklaken. Maski sira tenke laʼo iha dalan neʼebé aat no liu ponte sira neʼebé perigu, maibé sira sente kontente atu aumenta sira-nia serbisu haklaken. Ramilo hatete: “Hamutuk ho haʼu-nia feen, ami iha estudante Bíblia naʼin-11! Sin, maski ami halo sakrifísiu balu hodi serbí iha fatin neʼebé presiza haklaken-naʼin, maibé ida-neʼe lori haksolok boot ba ami!”—1 Korinto 15:58.

Ita mós hakarak hatene ka lae kona-ba oinsá mak Ita bele serbí iha Ita-nia rai ka iha rai liʼur iha fatin neʼebé presiza haklaken-naʼin? Se Ita hakarak halo nuneʼe, koʼalia ho Ita-nia katuas área nian no lee informasaun iha Ita-nia Serbisu Kristaun, fulan Agostu 2011, ho títulu “Ita bele ‘mai toʼo Masedónia’ ka lae?”