1. Ita-nia hahalok bele book ema seluk nia laran ka lae? Konta toʼok ezemplu ida. (Haree foto iha leten.)

 FEEN-LAʼEN kristaun ida iha rai-Fijí fahe konvite ba reuniaun atu komemora Jesus nia mate. Nuʼudar sira koʼalia daudauk ba mana ida, udan komesa tun. Irmaun neʼe ho ninia feen fó sombriña ba mana neʼe. Hahalok neʼe book mana nia laran, no nia deside atu tuir Naʼi nia Han-Kalan. Ikusmai, mana neʼe dehan katak nia la hanoin-hetan buat neʼebé feen-laʼen hatete, maibé hanoin-hetan deʼit hahalok neʼebé sira hatudu. Sin, feen-laʼen neʼe halo tuir Jesus nia ukun-fuan ida kona-ba hahalok neʼebé ita hatudu ba ema seluk.

2. Jesus fó ukun-fuan saida mai ita? Oinsá mak ita bele halo tuir ida-neʼe?

² Ukun-fuan ida-neʼe mak saida? Jesus hatete: “Buat hotu neʼebé imi hakarak ema halo ba imi, imi mós tenke halo ba sira.” (Mateus 7:12) Oinsá mak ita bele halo ida-neʼe? Kuandu ita hasoru ema ida, buat neʼebé ita presiza halo uluk mak husu ba ita-nia an: “Se haʼu mak iha ema neʼe nia fatin, haʼu hakarak nia halo saida mai haʼu?”  Tuirmai, hakaʼas an atu hatudu hahalok neʼe ba ema seluk.—1 Korinto 10:24.

3, 4. (a) Tanbasá ita halo tuir Mateus 7:12 laʼós só kuandu ita hamutuk ho maluk kristaun deʼit? (b) Iha lisaun neʼe, ita sei koʼalia kona-ba saida deʼit?

³ Karik ita hakaʼas an atu halo tuir ukun-fuan neʼe kuandu ita hamutuk ho maluk kristaun. Maibé Jesus temi ukun-fuan neʼe bainhira nia koʼalia kona-ba hahalok neʼebé ita hatudu ba ema hotu, inklui mós inimigu sira. (Lee Lucas 6:27, 28, 31, 35.) Se ita tenke hatudu hahalok diʼak ba inimigu sira, sá tan ho ema neʼebé ita hasoru iha haklaken-fatin, tanba ita-nia hahalok diʼak bele book sira atu “simu lia-loos neʼebé lori ba moris rohan-laek”!—Apóstolu 13:48.

⁴ Agora, ita sei koʼalia kona-ba pergunta haat neʼebé diʼak atu hanoin-hetan bainhira haklaken. Ema neʼebé haʼu koʼalia neʼe sé? Iha neʼebé mak haʼu koʼalia? Bainhira mak tempu diʼak atu koʼalia ba ema? Haʼu koʼalia iha dalan oinsá? Pergunta hirak-neʼe sei ajuda ita atu komprende ema seluk nia sentimentu kuandu ita haklaken, hodi buka dalan diʼak liu atu koʼalia ho sira.—1 Korinto 9:19-23.

5. Pergunta saida deʼit mak ita bele husu ba ita-nia an?

⁵ Iha serbisu haklaken, ita koʼalia ho ema oioin, no sira ida-idak iha situasaun, problema, no moris la hanesan. (2 Crônicas [Tawarikh] 6:29) Tan neʼe, antes atu koʼalia ho ema ida, husu ba ita-nia an: ‘Se haʼu mak uma-naʼin no ema neʼe mai haklaken ba haʼu, haʼu hakarak nia atu hatudu hahalok saida? Haʼu hakarak nia tesi lia kedas ba haʼu ka lae? Ka haʼu hakarak nia atu respeitu ba haʼu?’ Pergunta sira-neʼe bele ajuda ita hatudu hahalok diʼak ba ema naran deʼit neʼebé ita hasoru.

6, 7. Kuandu ema ruma sai hirus ka la respeitu ita, ita presiza halo saida?

⁶ Nuʼudar ema kristaun, ita hotu hakaʼas an atu halo tuir Bíblia nia konsellu atu “sempre koʼalia ho laran-diʼak”. (Koloso 4:6) Maibé tanba ita sala-naʼin, dala ruma ita mós hatete buat neʼebé la diʼak ba ema seluk no ikusmai arrepende an. (Tiago 3:2) Kuandu ida-neʼe akontese, ita hakarak sira atu komprende katak tuir loloos ita laʼós ema neʼebé siʼak-teen ka ema neʼebé la respeitu. Se nuneʼe, kuandu ita hasoru ema neʼebé koʼalia siʼak ba ita, diʼak atu hanoin-hetan katak dala ruma ema koʼalia arbiru deʼit la ho neon.

⁷ Tan neʼe, kuandu ema ruma sai hirus ka la respeitu ita, diʼak atu hanoin uluk tansá nia hatudu hahalok hanesan neʼe. Karik nia estrese kona-ba serbisu ka eskola? Ka nia hasoru problema ruma? Dala barak ema neʼebé foufoun hirus ba Testemuña sira, ikusmai rona didiʼak ba ita-nia mensajen tanba ita hatudu laran-maus no respeitu ba sira.—Provérbios (Amsal) 15:1; 1 Pedro 3:15.

8. Tansá mak ita presiza haklaken ba ema kualkér deʼit?

⁸ Ita haklaken ba ema kualkér deʼit neʼebé ita hasoru. Husi tinan balu liubá, Livru Haklaken iha série “Bíblia troka ema nia moris” fó sai esperiénsia husi irmaun-irmán sira neʼebé uluk iha situasaun oioin. Sira balu uluk naʼok-teen, lanu-teen, toman ho droga, ka hola parte iha grupu gang. Balu tan uluk polítiku-naʼin, ulun-naʼin relijiaun, ka ema neʼebé hanoin deʼit ba serbisu.  Iha mós ema neʼebé uluk moris la tuir morál. Maibé sira hotu rona liafuan diʼak, komesa estuda Bíblia, troka sira-nia moris, no ikusmai tama lia-loos. Ida-neʼe hatudu katak ita labele tesi lia ba ema ida katak nia sei nunka rona ita-nia mensajen. (Lee 1 Korinto 6:9-11.) Loos duni, “ema oioin” bele deʼit tama lia-loos.—1 Korinto 9:22.

9. Tanbasá mak ita presiza hatudu respeitu ba ema seluk nia uma?

⁹ Baibain ita haklaken ba ema hodi bá vizita sira-nia uma. (Mateus 10:11-13) Ita hotu sente katak ita-nia uma mak importante. Ita hakarak ema seluk atu respeitu ita rasik nia uma. Ita hakarak ita-nia fatin neʼe hakmatek no lakohi ema seluk atu book. Tan neʼe, kuandu ita haklaken husi uma ba uma, ita mós tenke hatudu respeitu ba sira-nia hela-fatin.—Apóstolu 5:42.

10. Kuandu ita haklaken, oinsá mak ita bele kuidadu hodi labele halo ema sente ladiʼak?

¹⁰ Iha mundu neʼebé nakonu ho krime, ema barak taʼuk ba ema neʼebé seidauk koñese. (2 Timóteo 3:1-5) Tan neʼe, ita lakohi halo buat ruma neʼebé halo ema sente taʼuk. Porezemplu, kuandu ita bolu uma-naʼin no ema la hatán, karik ita hakarak hateke ba uma laran liuhusi janela, ka laʼo bá-mai haleʼu sira-nia uma. Karik ita halo hanesan neʼe tanba ita hakarak hasoru ema atu haklaken. (Apóstolu 10:42) Ita laran-manas atu ajuda ema hodi hatene lia-loos kona-ba Maromak. (Roma 1:14, 15) Maibé, ita lakohi halo buat ida neʼebé halo uma-naʼin ka sira-nia viziñu sente ladiʼak. Apóstolu Paulo hatete: “Ami la halo ema ida sidi kona-ba buat naran deʼit, atu nuneʼe ema la hetan sala ida ho ami-nia serbisu.” (2 Korinto 6:3) Kuandu ita hatudu respeitu ba sira-nia uma, ida-neʼe bele book sira atu hatene liután kona-ba ita-nia mensajen.—Lee 1 Pedro 2:12.

11. Tanbasá ita hakarak ema seluk atu respeitu ita-nia tempu?

¹¹ Ita barak iha moris neʼebé okupadu tebes. Ita presiza halo buat barak iha loron ida nia laran hodi tuir oras. (Éfeso 5:16; Filipe 1:10) Se derrepente deʼit buat ruma atrapalla ita, ida-neʼe bele halo ita estrese. Tan neʼe, ita kontente se ema seluk respeitu ita-nia tempu hodi la atrapalla ita. Entaun, oinsá mak ita bele halo tuir konsellu husi Mateus 7:12 hodi respeitu ema seluk nia tempu?

12. Oinsá mak ita bele buka tempu neʼebé diʼak atu haklaken ba ema iha ita-nia área?

¹² Ita presiza buka tempu neʼebé diʼak atu haklaken ba ema. Husu ba ita-nia an: ‘Iha haʼu-nia área, tuku hira mak baibain ema iha uma? Saida mak tempu diʼak ba ema atu rona?’ Karik ita presiza troka tempu neʼebé ita bá haklaken. Iha rai balu, irmaun-irmán sira hetan rezultadu diʼak hodi haklaken iha oras rai-nakaras ka besik kalan. Se ita-nia haklaken-fatin mós hanesan ho sira-nian, ita bele halo planu atu bá haklaken iha oras neʼe ka lae? (Lee 1 Korinto 10:24.) Jeová sei fó bensaun ba ita-nia hakaʼas-an atu haklaken iha oras neʼebé diʼak ba ema.

13. Iha dalan saida deʼit mak ita bele hatudu respeitu ba ema neʼebé ita haklaken?

¹³ Iha dalan saida tan mak ita bele hatudu respeitu ba ema neʼebé ita haklaken? Kuandu ita hasoru ema neʼebé hakarak rona ba ita, ita presiza fó sasin  ho didiʼak maibé ita tenke kuidadu atu la koʼalia kleur demais. Karik nia atu sai ona, ka presiza halo buat ruma. Se nia dehan katak nia la iha tempu, ita bele hatete ba nia: ‘Haʼu sei la koʼalia kleur’, no ita tenke kumpre duni liafuan neʼe. (Mateus 5:37) No kuandu ita atu fila, husu ba nia kona-ba tempu neʼebé diʼak atu vizita fali. Irmaun balu hatete hanesan neʼe: “Haʼu hakarak vizita fali ita. Haʼu bele hetan Ita-nia númeru telefone, tanba antes haʼu mai, haʼu bele mensajen uluk ita.” Kuandu ita hatudu respeitu ba ema hodi la atrapalla sira, neʼe katak ita halo tuir apóstolu Paulo nia ezemplu. Nia la buka nia rasik nia diʼak, maibé buka “ema barak nia diʼak, atu nuneʼe sira bele hetan salvasaun”.—1 Korinto 10:33.

14-16. (a) Tansá importante fó-hatene ita-nia razaun atu vizita ema? Fó toʼok ezemplu. (b) Irmaun katuas área ida haklaken iha dalan oinsá?

¹⁴ Hanoin toʼok se ema ruma vizita Ita. Ita la koñese ema neʼe, maibé nia husu pergunta barak kona-ba ita-nia família ka ita-nia serbisu. Ita sei hanoin: ‘Sé mak ema neʼe? Ninia objetivu saida?’ Karik ita fó resposta uitoan, maibé tanba ita deskonfia ema neʼe, ita lakohi koʼalia kleur. Maibé hanoin toʼok se ema neʼe vizita ita no ulukliu nia esplika katak ninia serbisu mak atu halo sensus hodi governu bele ajuda ita. Karik ita sente kontente atu koʼalia ho nia tanba nia fó-hatene kedas nia mai husi neʼebé no tansá mak  nia vizita ita. Entaun, oinsá ita halo hanesan neʼe ba ema neʼebé ita hasoru iha haklaken?

¹⁵ Iha kultura barak, ita presiza fó-hatene ba uma-naʼin ita-nia objetivu atu vizita sira. Klaru katak ita iha informasaun neʼebé importante ba ema hotu. Maibé, hanoin toʼok se ita la fó-koñese ita-nia an maibé husu kedas pergunta: “Se ita iha kbiit atu hadiʼa problema naran deʼit neʼebé mosu, ita sei hadiʼa saida?” Uma-naʼin sei sente oinsá? Maski ita husu atu hatene ema nia hanoin hodi bele fahe liafuan husi Bíblia, maibé se ita la fó-hatene tansá ita vizita sira, karik sira sei hanoin: ‘Sé mak ema neʼe? Tansá mak nia husu pergunta hanesan neʼe? Tansá nia mai hasoru haʼu?’ Ita lakohi halo ema konfuzaun maibé kontente atu koʼalia ho ita. (Filipe 2:3, 4) Entaun, oinsá mak ita bele koʼalia ho ema?

¹⁶ Irmaun katuas área ida halo hanesan neʼe: Foufoun, nia kumprimenta uma-naʼin, depois fó tratu Ita Hakarak Hatene Lia-loos ka lae? no hatete: “Ami fahe ida-neʼe ba ema hotu iha ita-nia área. Tratu neʼe iha pergunta neen neʼebé ema barak husu. Ida-neʼe fó ba Ita.” Tuirmai, nia husu: “Husi pergunta hirak-neʼe, ida-neʼebé mak ita gosta?” Kuandu uma-naʼin hili pergunta ida, irmaun loke tratu no koʼalia kona-ba buat neʼebé Bíblia hanorin. Se uma-naʼin nonook deʼit, irmaun neʼe rasik mak sei hili ida no kontinua koʼalia hodi la hamoe nia. Irmaun esplika katak kuandu ema hatene ona tansá ita bá vizita sira, sira la sente taʼuk ka duvida atu koʼalia ho ita. Sin, ita bele uza dalan oioin atu komesa koʼalia ho ema. Iha rai balu ita presiza halo tuir ema nia kostume kona-ba dalan atu kumprimenta ba malu antes ita esplika tansá ita bá vizita sira. Importante mak ita hakaʼas an atu haklaken iha dalan neʼebé book ema atu hakarak rona ita-nia mensajen.

17. Kuandu ita haklaken, iha dalan saida deʼit mak ita bele halo tuir Mateus 7:12?

¹⁷ Entaun, mai ita hanoin filafali kona-ba dalan oioin neʼebé ita bele halo tuir Jesus nia ukun-fuan iha Mateus 7:12. Ita hanoin ema ida-idak nia situasaun. Ita hatudu respeitu ba ema seluk nia uma. Hakaʼas an atu haklaken iha oras neʼebé ita bele hasoru ema no buka tempu neʼebé diʼak ba sira. Kuandu ita foin hasoru ema, fó-koñese ita-nia an no esplika tansá ita vizita sira hodi sira hakarak rona ita.

18. Kuandu ita hatudu hahalok diʼak ba ema seluk, ida-neʼe lori rezultadu saida deʼit?

¹⁸ Kuandu ita hanoin ema seluk nia sentimentu no hatudu hahalok diʼak, neʼe katak ita halo tuir Bíblia nia matadalan no ida-neʼe sei lori glória ba ita-nia Aman iha lalehan. (Mateus 5:16) Hodi hatudu respeitu ba ema, ita bele book ema barak liután atu hakarak hatene lia-loos. (1 Timóteo 4:16) Maski ema simu ka la simu ita-nia mensajen, ita hatene katak ita hakaʼas an duni atu haklaken ho didiʼak, no ida-neʼe halo ita kontente. (2 Timóteo 4:5) Mai ita halo tuir apóstolu Paulo nia ezemplu, neʼebé hakerek: “Haʼu halo tiha buat hotu tan liafuan diʼak, atu nuneʼe haʼu mós bele fahe ida-neʼe ba ema seluk.” (1 Korinto 9:23) Sin, mai ita nafatin halo tuir Jesus nia ukun-fuan hodi hatudu hahalok diʼak ba ema neʼebé ita hasoru iha serbisu haklaken.