Liurai David hahiʼi Maromak Jeová hodi kanta: “Oh, haʼu-nia Maromak, atu halo Ita-nia hakarak mak buat neʼebé halo haʼu haksolok, no Ita-nia ukun-fuan iha haʼu-nia laran.” (Salmo [Mazmur] 40:8) Maski David hasoru susar oioin iha ninia moris, nia hetan haksolok hodi halo tuir Maromak nia hakarak. Maibé, laʼós David deʼit mak hetan haksolok hodi serbí Maromak neʼebé loos.

Apóstolu Paulo temi fali liafuan husi Salmo (Mazmur) 40:8 atu koʼalia kona-ba Mesias, ka Kristu, hodi hakerek: “Kuandu [Jesus] mai iha mundu, nia dehan ba Maromak: ‘“Ita lakohi simu sakrifísiu no prezente; maibé Ita prepara isin-lolon mai haʼu. Ita la haksolok ho sakrifísiu sunu nian no sakrifísiu sala nian.” No haʼu dehan: “Haree! Oh, Maromak, haʼu mai ona atu halo Ita-nia hakarak, hanesan hakerek nanis ona iha livru kona-ba haʼu.”’”—Ebreu 10:5-7.

Bainhira Jesus iha rai, nia haksolok hodi haree Jeová nia kriasaun, ransu ho nia belun sira, no han hamutuk. (Mateus 6:26-29; João 2:1, 2; 12:1, 2) Maski nuneʼe, buat neʼebé halo Jesus haksolok liu mak hodi halo tuir ninia Aman iha lalehan nia hakarak. Jesus rasik hatete: “Haʼu-nia ai-han mak halo tuir Ida neʼebé haruka haʼu mai nia hakarak no atu halo hotu ninia serbisu.” (João 4:34; 6:38) Liuhusi Jesus nia ezemplu, ninia dixípulu sira aprende kona-ba buat neʼebé lori haksolok loos ba sira. No sira mós haklaken liafuan diʼak kona-ba Maromak nia Ukun ho laran-haksolok no badinas.—Lucas 10:1, 8, 9, 17.

Jesus hatete ba ninia dixípulu sira: “Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira hodi Aman, Oan no espíritu santu nia naran. Hanorin sira atu halo tuir buat hotu neʼebé haʼu haruka ba imi. No haree! Haʼu sei hamutuk nafatin ho imi toʼo mundu nia  rohan.” (Mateus 28:19, 20) Hodi halo tuir mandamentu neʼe, ita presiza hakaʼas an atu haklaken ba ema hotu neʼebé ita hasoru, bá vizita fali sira neʼebé hatudu interese, no halaʼo estudu Bíblia. Sin, hodi halo serbisu neʼe sei fó ksolok mai ita.

Maski ema simu ka la simu ita-nia mensajen, se ita nafatin iha hanoin neʼebé loos, serbisu haklaken bele halo ita kontente. Entaun, tanbasá mak ita kontinua haklaken liafuan diʼak? Tanba ita hatene katak liuhusi serbisu haklaken no hanorin, ita bele hatudu ita-nia domin ba Maromak no mós ba ita-nia maluk. Liután neʼe, serbisu haklaken mak serbisu neʼebé salva ita rasik no ema seluk nia moris. (Ezequiel [Yehezkiel] 3:17-21; 1 Timóteo 4:16) Agora, mai ita hanoin kona-ba oinsá mak ita-nia maluk balu kontinua haklaken ho badinas iha fatin neʼebé ema barak la simu.

Kuandu ita husu pergunta ho matenek, ida-neʼe bele lori rezultadu diʼak. Loron ida, irmán ida naran Amalia haree mane ida neʼebé tuur iha jardín no lee hela jornál. Amalia hakbesik ba nia no husu: “Ita hetan notísias diʼak husi jornál?” Kuandu mane neʼe hatán: “Haʼu la hetan ida”, Amalia hatete: “Haʼu iha notísia ida neʼebé diʼak kona-ba Maromak nia Ukun.” Liafuan neʼe book mane neʼe atu hakarak hatene liután, no nia simu atu estuda Bíblia. Ikusmai irmán Amalia konsege hetan estudu Bíblia tolu iha jardín neʼe.

Irmán ida naran Junícia mós hakaʼas an atu haklaken iha ninia serbisu-fatin. Kuandu seguransa ida ho ninia kolega hatudu interese ba informasaun ida husi Livru Haklaken, Junícia hatete ba sira: “Haʼu bele lori Livru Haklaken ba imi fulan-fulan.” Nia halo hanesan neʼe ba ninia maluk serbisu ida seluk no maluk neʼe hatete katak nia mós hakarak Livru Haklaken no Matan-moris bá! tanba iha informasaun oioin neʼebé kapás. Kuandu sira koʼalia hela, maluk serbisu ida seluk mós hatete katak nia hakarak lee. Irmán Junícia hatete: “Jeová fó bensaun mai haʼu!” Ikusmai, Junícia hetan ema naʼin-11 neʼebé simu beibeik Livru Haklaken no Matan-moris bá!

Irmaun katuas área ida hatete: “Kuandu ita atu ramata koʼalia ho uma-naʼin, labele dehan deʼit katak loron ida ami sei mai fali. Duké hatete hanesan neʼe, diʼak liu atu husu: ‘Ita hakarak haree oinsá ami halaʼo estuda Bíblia?’ ka, ‘Iha loron saida no tuku hira mak diʼak atu haʼu mai fali hodi kontinua koʼalia kona-ba neʼe?’” Kuandu irmaun-irmán hotu iha kongregasaun ida hakaʼas an atu halo tuir sujestaun neʼe, sira konsege hahú estuda Bíblia hamutuk 44 iha semana ida nia laran.

Importante mós atu la husik tempu kleur hodi vizita fali sira neʼebé hatudu interese. Ita bele bá hasoru fali sira la liu loron rua ka tolu tanba hodi  halo nuneʼe, ita bele hatudu katak ita hanoin ema neʼebé laran loos hodi ajuda sira hatene Bíblia. Kuandu ami husu señora ida kona-ba saida mak book nia hodi estuda Bíblia ho Testemuña ba Jeová, nia hatete: “Haʼu komesa estuda tanba sira hatudu domin mai haʼu no hanoin haʼu.”

Irmán pioneiru ida naran Madaí, neʼebé foin ramata Eskola Serbisu Pioneiru, nia halaʼo estuda Bíblia hamutuk 15 no fó estudu lima tan ba nia maluk haklaken-naʼin sira seluk. Irmán neʼe nia estudante balu komesa tuir beibeik ita-nia reuniaun sira. Saida mak ajuda irmán Madaí atu iha estudu barak hanesan neʼe? Iha eskola, nia aprende katak importante tebes atu la rende an hodi hasoru fali ema neʼebé foufoun hatudu interese ba ita-nia mensajen. Testemuña ida seluk neʼebé ajuda ona ema barak atu tama lia-loos mós hatete: “Haʼu aprende katak hodi hakaʼas an halo vizita beibeik mak xave atu ajuda ema hodi hatene Maromak Jeová.”

Klaru katak ita presiza hakaʼas an atu halo vizita fali no halaʼo estuda Bíblia. Maibé hakaʼas-an neʼe sei la saugati deʼit. Hodi badinas atu haklaken Maromak nia Ukun, ita bele ajuda ema seluk atu “hatene didiʼak kona-ba lia-loos”, neʼebé bele salva sira-nia moris. (1 Timóteo 2:3, 4) Loos duni, ida-neʼe sei lori haksolok boot, neʼebé la bele kompara ho buat seluk.