1, 2. (a) Konta toʼok esperiénsia ida neʼebé hatudu katak importante atu husu pergunta ho matenek. (Haree foto iha leten.) (b) Tanbasá mak ita la presiza taʼuk atu koʼalia kona-ba tópiku neʼebé susar?

 IRMÁN ida koʼalia kona-ba Bíblia ho ninia laʼen neʼebé fiar la hanesan. Nuʼudar sira naʼin-rua koʼalia ba malu, ninia laʼen hatete katak nia fiar ba Trindade. Maibé irmán neʼe mós haree katak ninia laʼen ladún hatene ho loloos ninia igreja nia doutrina neʼe. Tan neʼe, ho respeitu, irmán husu: “Haʼu bele husu ka lae? Tuir buat neʼebé ó-nia igreja hanorin, Aman mak Maromak, Oan mós Maromak, no espíritu santu mós Maromak, maibé sira laʼós Maromak naʼin-tolu, sira Maromak ida deʼit. Ó mós fiar hanesan neʼe ka lae?” Ho hakfodak, irmán neʼe nia laʼen hatete: “Lae, haʼu la fiar ida-neʼe.” Irmán neʼe nia pergunta loke dalan ba sira atu koʼalia tan kona-ba sé mak Maromak.

² Husi esperiénsia neʼe, ita aprende saida? Hodi husu pergunta sira ho matenek no respeitu bele book ema nia laran. Ita mós aprende katak ita la presiza taʼuk atu koʼalia kona-ba tópiku neʼebé susar hanesan Trindade, infernu,  ka oinsá ita hatene se Maromak iha duni. Hodi sadere ba Jeová no simu treinu husi nia, ita bele hanorin lia-loos iha dalan neʼebé book ema nia laran. (Koloso 4:6) Iha lisaun neʼe, mai ita koʼalia kona-ba oinsá mak ita bele hanorin diʼak liután hodi (1) husu pergunta ba ema atu fó sai sira-nia hanoin, (2) ajuda ema atu hanoin didiʼak Eskritura, no (3) uza ai-knanoik atu esplika lia-loos.

3, 4. Tanbasá mak importante atu husu pergunta hodi buka-hatene ema seluk nia hanoin? Fó toʼok ezemplu.

³ Pergunta sira bele ajuda ita atu hatene saida loos mak ema fiar. Maibé tansá importante atu halo ida-neʼe? Provérbios (Amsal) 18:13 hatete: “Kuandu ema ida hatán kona-ba buat ruma antes nia rona, nia beik no hamoe nia an.” Tan neʼe, antes koʼalia ba ema kona-ba Bíblia nia hanorin, ita presiza hatene sira-nia fiar. Se lae, karik ita sei koʼalia barak kona-ba hanorin falsu ruma neʼebé tuir loloos sira la fiar.—1 Korinto 9:26.

⁴ Porezemplu, karik ita koʼalia daudaun kona-ba infernu. Ema balu fiar katak infernu mak fatin neʼebé kastigu ema aat, maibé balu tan fiar katak infernu la iha. Tan neʼe, antes ita atu esplika, diʼak atu husu: “Tanba ema iha hanoin oioin kona-ba infernu, tuir Ita-nia hanoin, infernu mak saida loos?” Liuhusi ninia resposta, ita bele hatene oinsá atu uza Bíblia hodi ajuda nia.

5. Pergunta sira bele ajuda ita atu hatene saida? Esplika toʼok.

⁵ Kuandu ita husu pergunta ho matenek, ida-neʼe bele ajuda ita atu hatene tanbasá mak nia fiar nuneʼe. Porezemplu, se ita hasoru ema neʼebé hatete katak nia la fiar Maromak, ita halo saida? Karik ita hanoin kedas katak nia fiar ba evolusaun. (Salmo [Mazmur] 10:4) Maibé iha mós ema neʼebé la fiar Maromak tanba nia hasoru susar barak. Karik nia hanoin: ‘Se Maromak iha, tanbasá mak haʼu monu ba terus?’ Tan neʼe, se ita hasoru ema neʼebé dehan: “Haʼu la fiar Maromak”, diʼak atu husu: “Ita hanoin hanesan neʼe kleur ona ka?” Se nia dehan: “Lae”, ita bele husu: “Saida mak halo Ita la fiar Maromak tan?” Ninia resposta bele ajuda ita atu hatene oinsá atu ajuda nia.—Lee Provérbios (Amsal) 20:5. a

6. Kuandu husu tiha pergunta, ita presiza halo saida?

⁶ Kuandu husu tiha pergunta, ita presiza rona didiʼak ba ema neʼe nia resposta hodi hatudu katak ita respeitu ninia hanoin. Porezemplu, kuandu ema ida hatete: “Maromak iha neʼebé bainhira haʼu hetan terus?”, duké esplika kedas katak Maromak iha, diʼak atu fó-hatene uluk katak ita komprende ninia hanoin no la sala nia fó sai ninia duvida neʼe. (Habacuque [Habakuk] 1:2, 3) Se ita hatudu pasiénsia no domin, ida-neʼe sei book nia atu hakarak rona liután ba ita. b—Haree nota iha kraik.

7. Atu bele haklaken ho matenek, ita presiza halo saida?

⁷ Buat neʼebé importante liu ba ita atu uza iha serbisu haklaken mak Bíblia. Bíblia ajuda ita atu “sai kompletu hodi prontu atu halo serbisu diʼak hotu”. (2 Timóteo 3:16, 17) Haklaken ho matenek la dehan katak ita lee eskritura barak, maibé neʼe katak ita hatene oinsá atu esplika eskritura sira hodi ajuda ema atu hanoin didiʼak kona-ba buat neʼebé sira foin lee. (Lee Apóstolu 17:2, 3.) Entaun, mai ita hanoin kona-ba situasaun tolu iha serbisu haklaken.

8, 9. (a) Oinsá mak ita bele ajuda ema neʼebé fiar katak Jesus mak Maromak? (b) Konta toʼok ita-nia esperiénsia rasik kona-ba ajuda ema hanesan neʼe.

⁸ Situasaun 1: Ita hasoru ema neʼebé fiar katak Jesus mak Maromak. Ba ema hanesan neʼe, eskritura saida deʼit mak ita bele uza? Karik ita bele husu nia atu lee Jesus nia liafuan iha João 6:38, neʼebé dehan: “Haʼu tun mai husi lalehan laʼós atu halo haʼu-nia hakarak, maibé atu halo ida neʼebé haruka haʼu mai nia hakarak.” Depois lee tiha eskritura neʼe, ita bele husu: “Se Jesus mak Aman Maromak, entaun sé mak haruka Jesus tun mai mundu? Baibain ema neʼebé haruka mak boot liu fali ema neʼebé halo tuir, tan neʼe Aman neʼebé haruka Jesus tenkesér boot liu fali nia, loos ka lae?”

⁹ Ita mós bele lee Filipe 2:9. Iha versíkulu neʼe, apóstolu Paulo esplika katak, depois Jesus mate no moris hiʼas fali, Maromak foti Jesus “ba pozisaun neʼebé aas liu no . . . fó ba nia naran ida neʼebé boot liu naran sira seluk”. Hodi ajuda ema atu hanoin didiʼak kona-ba eskritura neʼe, ita bele husu: “Se Jesus rasik mak Maromak antes toʼo mai rai, entaun, hanoin toʼok, oinsá mak Maromak bele foti fali Jesus ba pozisaun neʼebé aas liu fali nia iha lalehan? Iha buat ida neʼebé bele sai aas liu fali Maromak ka lae?” Se ema neʼebé ita koʼalia hamutuk mak laran diʼak no respeitu ba Maromak nia Liafuan, ida-neʼe bele ajuda nia hakarak hatene liután.—Apóstolu 17:11.

10. (a) Oinsá mak ita bele ajuda ema neʼebé fiar infernu? (b) Koʼalia toʼok ita-nia esperiénsia rasik kona-ba oinsá ita ajuda ema neʼebé fiar ba infernu.

¹⁰ Situasaun 2: Ita haklaken ba ema neʼebé fiar katak ema aat sei hetan  terus ba nafatin iha infernu. Karik nia fiar hanesan neʼe tanba nia sente katak ema aat sira merese kastigu. Oinsá mak ita bele ajuda ema hanesan neʼe? Hodi hahú, ita bele hatete katak ema aat sei hetan duni kastigu. (2 Tesalónika 1:9) Tuirmai, husu nia atu lee Gênesis (Kejadian) 2:16, 17, neʼebé hatudu katak kastigu ba sala mak mate, no esplika katak tanba Adão halo sala, ita hotu mate. (Roma 5:12) Depois, hatete katak Maromak la koʼalia buat ida kona-ba kastigu iha infernu. Ikusmai, ita lee Gênesis (Kejadian) 3:19, neʼebé Maromak dehan ba Adão katak rezultadu ba ninia sala mak atu fila fali ba rai, no husu: “Entaun, Maromak bosok Adão hodi dehan katak nia sei fila fali ba rai maibé tau fali nia iha infernu ka lae?” Pergunta hanesan neʼe bele dada ninia hanoin.

11. (a) Ba ema neʼebé fiar katak ema diʼak hotu sei bá lalehan, oinsá mak ita bele ajuda? (b) Fó toʼok ita rasik nia esperiénsia kona-ba oinsá ita ajuda ema neʼebé fiar hanesan neʼe.

¹¹ Situasaun 3: Bainhira hasoru ema neʼebé fiar katak ema diʼak hotu sei bá lalehan. Fiar hanesan neʼe bele kona dalan neʼebé sira komprende Bíblia. Porezemplu, karik ita lee Apokalipse 21:4. (Lee.) Ema balu hanoin katak neʼe mak kona-ba moris iha lalehan. Oinsá mak ita bele ajuda ema hanesan neʼe? Duké loke tan eskritura seluk, ita bele uza nafatin Apokalipse 21:4, no husu: “Iha neʼe dehan ‘mate sei la iha tan’, maibé baibain mate akontese iha neʼebé? Loloos mate nunka akontese iha lalehan, só iha rai deʼit, loos ka lae? Tan neʼe, ita bele fiar katak Apokalipse 21:4 koʼalia kona-ba mundu iha aban-bainrua.”—Salmo (Mazmur) 37:29.

12. Tanbasá mak Jesus uza ai-knanoik?

¹² Kuandu Jesus haklaken, nia sempre hanorin ho ai-knanoik. (Lee Mateus 13:34, 35.) Jesus uza ai-knanoik sira hodi hatene ema nia hanoin iha laran no se sira hakarak duni atu serbí Jeová. (Mateus 13:10-15) Ai-knanoik sira mós halo ema gosta rona Jesus no la haluha ninia hanorin. Entaun, oinsá mak ita bele uza ai-knanoik sira kuandu ita hanorin?

13. Oinsá ita bele esplika katak Maromak boot liu fali Jesus?

¹³ Baibain, diʼak atu uza ai-knanoik ka ezemplu neʼebé simples. Porezemplu, kuandu ita hanorin katak Maromak boot liu fali Jesus, ita hakarak esplika uluk Maromak bolu Jesus “haʼu-nia Oan” no Jesus bolu Maromak “haʼu-nia Aman”. (Lucas 3:21, 22; João 14:28) Tuirmai, ita bele husu: “Hanoin toʼok se iha família laran iha mane naʼin-rua neʼebé tinan, oin, no hahalok hanesan. Baibain ita bolu sira hanesan kaduak, ka maun-alin, loos ka lae?” Karik nia hatán: “Loos.” Ita bele dehan: “Maibé Jesus neʼebé Mestre Boot no matenek atu hanorin, nia nunka dehan katak Maromak mak ninia maun ka alin. Nia sempre hanorin katak Maromak mak ninia Aman, neʼebé pozisaun boot liu nia.”

14. Kuandu ema hatete katak Maromak haruka Diabu atu fó-terus ema iha infernu, oinsá ita bele ajuda?

¹⁴ Mai ita koʼalia kona-ba ezemplu ida tan. Iha rai balu, ema barak fiar katak Maromak haruka Diabu atu tau matan ba infernu. Oinsá ita bele ajuda ema hanesan neʼe? Karik ita bele husu: “Hanoin toʼok, se Ita-nia oan sai nakar  toʼo halo hahalok aat oioin, Ita sei halo saida?” Karik nia hatán: “Haʼu tenke fó dixiplina ba nia.” (Provérbios [Amsal] 22:15) Ita bele husu: “Oinsá se Ita-nia oan lakohi troka ninia hahalok?” Karik nia dehan: “Haʼu tenke fó kastigu ba nia.” Ita bele husu tan: “Maibé oinsá se ema aat ida mak book nia atu halo hahalok la diʼak, Ita hakarak haruka fali ema aat neʼe atu fó kastigu ba Ita-nia oan ka lae?” Nia sei dehan: “Lakohi.” Hanesan neʼe mós ho Maromak neʼebé domin. Nia nunka haruka Diabu atu fó kastigu ba ema neʼebé halo sala.

15, 16. (a) Kuandu ema la rona ba ita, tanbasá mak lalika laran-tun? (b) Maski ita sente ladún matenek atu hanorin, saida deʼit mak ajuda ita atu haklaken ho didiʼak? Esplika toʼok. (Haree mós kaixa “ Informasaun neʼebé ajuda ita atu haklaken”.)

¹⁵ Maski ita uza pergunta ho matenek, ajuda ema atu hanoin didiʼak Eskritura sira no uza ai-knanoik, maibé neʼe la dehan katak ema hotu sei simu ita-nia mensajen kona-ba Maromak nia Ukun. (Mateus 10:11-14) Diʼak atu ita hanoin-hetan katak, maski Jesus mak Mestre Boot liu hotu iha mundu, ema uitoan deʼit mak simu ninia hanorin.—João 6:66; 7:45-48.

¹⁶ Tuir loloos, maski ita sente katak ita ladún matenek atu hanorin, ita bele haklaken ho didiʼak. (Lee Apóstolu 4:13.) Maromak nia Liafuan promete katak “ema hotu neʼebé prontu atu simu lia-loos neʼebé lori ba moris rohan-laek” sei simu liafuan diʼak. (Apóstolu 13:48) Tan neʼe, labele hanoin barak. Ita presiza hakaʼas an nafatin atu aumenta ita-nia matenek hodi haklaken, maibé keta laran-tun se ema la rona ita-nia liafuan diʼak. Kuandu ita sadere ba Jeová no simu treinu husi nia, ita sei sai matenek atu hanorin lia-loos, no ida-neʼe sei lori bensaun ba ita-nia an no ba ema neʼebé rona ita. (1 Timóteo 4:16) Jeová bele ajuda ita atu “hatán ba ema ida-idak”. Iha lisaun tuirmai, ita sei aprende oinsá atu hetan rezultadu diʼak hodi halo tuir Jesus nia ukun-fuan kona-ba hahalok diʼak iha serbisu haklaken.