Bíblia la bandu ita atu sunu mate-isin.

Bíblia konta istória balu kona-ba sunu mate-isin ka mate-ruin. (Josué [Yosua] 7:25; 2 Crônicas [Tawarikh] 34:4, 5) Karik istória hirak-neʼe halo ita hanoin katak iha tempu uluk ema sunu mate-isin só kuandu ema mate neʼe laran-aat no la merese atu hakoi. Maibé tuir loloos, laʼós ema aat nia mate-isin deʼit mak sunu.

Mai ita hanoin kona-ba istória kuandu Liurai Saul ho ninia oan-mane naʼin-tolu mate iha funu hasoru ema Filístia. Saul nia oan sira-neʼe ida mak Jónatas, David nia belun diʼak neʼebé apoia nia ho laran-metin. Bainhira mane Izraél sira neʼebé hela iha Jabes-Gilead hatene katak liurai no ninia oan sira mate, sira buka sira-nia mate-isin. Kuandu hetan tiha, sira sunu no hakoi mate-ruin. David gaba mane sira-neʼe kona-ba buat neʼebé sira halo.—1 Samuel 31:2, 8-13; 2 Samuel 2:4-6.

Tuir Bíblia, esperansa ba ema neʼebé mate ona mak moris-hiʼas, katak Maromak sei halo ema mate moris fali. Maski ema ida nia mate-isin sunu tiha, ida-neʼe la hanetik Jeová atu halo nia moris fali ho isin foun. Tan neʼe, ema ebreu naʼin-tolu neʼebé hasoru Liurai Nabucodonosor, sira fiar katak Maromak bele halo sira moris hiʼas fali maski sira mate iha ahi laran. (Daniel 3:16-18) Nuneʼe mós ho Jeová nia atan sira neʼebé tama iha prizaun iha tempu Nazi no sira-nia mate-isin sunu tiha, no sira neʼebé mate tanba bomba nakfera. Jeová bele fó moris-hiʼas ba sira hotu.—Apokalipse 20:13.

Kuandu Jeová halo ema mate moris hiʼas fali, nia la presiza uza fali sira-nia isin uluk nian. Hanoin toʼok kona-ba ema kristaun kose-mina neʼebé hetan moris-hiʼas ba lalehan. Hanesan ho Jesus, ema kristaun sira-neʼe mós hetan moris-hiʼas “ho isin espíritu nian”, neʼebé la hanesan duni ho isin raan nian.—1 Pedro 3:18; 1 Korinto 15:42-53; 1 João 3:2.

Esperansa ba moris-hiʼas la depende ba buat neʼebé ita halo ba mate-isin, hanesan sunu ka hakoi. Ita-nia esperansa nia hun mak fiar ba Maromak nia kbiit no ninia hakarak atu kumpre ninia promesa. (Apóstolu 24:15) Maski ita la hatene ho loloos oinsá mak Maromak halo ema mate moris filafali iha tempu uluk no mós iha futuru, ita presiza tau fiar nafatin ba Jeová, liuliu tanba nia fó moris-hiʼas ona ba Jesus.—Apóstolu 17:31; Lucas 24:2, 3.

Ita sei hanoin didiʼak kona-ba rai nia toman, ema seluk nia hanoin, no lei husi estadu kona-ba saida mak ita halo ba mate-isin. (2 Korinto 6:3, 4) Maibé, atu sunu ka hakoi, neʼe depende ba ema ida-idak ka família ida-idak nia desizaun rasik.