1, 2. (a) Liafuan “testemuña” katak sá? Jornál no televizaun sira la fó-hatene ema kona-ba buat importante saida? (b) Tanbasá mak Jeová la presiza uza mundu nia notísias atu fó-hatene kona-ba ninia an?

 LIAFUAN “testemuña” katak sá? Disionáriu ida esplika katak testemuña mak “ema neʼebé haree akontesimentu ida no fó-hatene kona-ba neʼe”. Iha rai-Áfrika Súl iha jornál ida neʼebé kontinua tinan 160 liu ona, no nia naran mak Testemuña. Naran neʼe loos tanba objetivu ba jornál mak atu fó-hatene ba ema kona-ba buat neʼebé akontese. Editór neʼebé uluk hahú jornál neʼe promete atu fó sai buat neʼebé loos hodi la bosok ida.

² Maibé buat neʼebé triste mak dala ruma jornál no televizaun sira fó sai reportajen neʼebé laloos, no sira nunka fó sai lia-loos kona-ba Maromak no buat neʼebé nia halo ona. Maibé Jeová nuʼudar Ukun-Naʼin neʼebé Boot Liu Hotu iha lalehan no rai la presiza uza mundu neʼe nia notísias atu fó-hatene kona-ba ninia an. Liuhusi profeta Ezequiel, Maromak hatete: “Nasaun sira sei hatene katak haʼu mak Jeová.” (Ezequiel [Yehezkiel] 39:7) Jeová iha ona ninia Testemuña maizumenus naʼin-8.000.000 neʼebé haklaken kona-ba nia, no mós kona-ba buat neʼebé nia halo ba ema iha tempu uluk, ohin loron no iha futuru. Isaías (Yesaya) 43:10 hatete: “‘Imi mak haʼu-nia testemuña sira’, Jeová hatete, ‘sin, haʼu-nia atan neʼebé haʼu hili’.” Kuandu ita tau uluk serbisu haklaken iha ita-nia moris, ida-neʼe hatudu katak ita loloos Jeová nia Testemuña sira.

3, 4. (a) Horibainhira mak Estudante Bíblia sira komesa bolu sira-nia an nuʼudar Testemuña ba Jeová? Sira sente oinsá kona-ba neʼe? (Haree foto iha pájina 23.) (b) Iha lisaun neʼe, ita sei koʼalia kona-ba pergunta saida deʼit?

 ³ Jeová nia naran sei nunka lakon tanba nia mak “Liurai neʼebé laiha rohan”. Nia rasik mós hatete: “Ida-neʼe mak haʼu-nia naran ba nafatin, no ho ida-neʼe mak imi sei hanoin-hetan kona-ba haʼu husi jerasaun ba jerasaun.” (1 Timóteo 1:17; Êxodo [Keluaran] 3:15; kompara ho Eclesiastes [Pengkhotbah] 2:16.) Iha tinan 1931, Estudante Bíblia sira komesa bolu sira-nia an nuʼudar Testemuña ba Jeová. Bainhira desizaun neʼe fó sai, sira barak hakerek karta atu fó-agradese ba mudansa neʼe. Kongregasaun ida husi rai-Kanadá hakerek: ‘Avizu diʼak kona-ba “Testemuña ba Jeová” halo ami haksolok tebes, no naran foun neʼe hametin ami-nia hakarak atu lori hahiʼi ba Jeová.’

⁴ Entaun, oinsá mak ita bele hatudu katak ita hafolin ita-nia knaar espesiál atu lori Maromak nia naran? Ita bele esplika husi livru Isaías tanbasá mak Jeová bolu ita nuʼudar ninia Testemuña?

5, 6. (a) Inan-aman Izraél halo saida hodi fó sasin kona-ba Jeová? (b) Inan-aman Izraél sira tenke halo saida tan? Tanbasá mak inan-aman ohin loron mós presiza halo ida-neʼe?

⁵ Iha tempu uluk, Jeová hili povu Izraél atu sai ninia testemuña, no sira ida-idak iha responsabilidade atu fó sasin kona-ba nia. (Isaías [Yesaya] 43:10) Porezemplu, inan-aman tenke fó sasin ba sira-nia oan kona-ba buat neʼebé Maromak halo iha tempu uluk. Bainhira Jeová haruka povu Izraél atu halaʼo Festa Salvasaun nian, nia mós hatete: “Kuandu imi-nia oan husu ba imi, ‘Serimónia neʼe katak sá ba ita?’ imi tenke hatete, ‘Ida-neʼe mak sakrifísiu Festa Salvasaun nian ba Jeová, ida neʼebé laʼo liu ema Izraél nia uma iha rai-Ejitu bainhira nia fó malisan ba ema Ejitu sira, maibé nia salva ita-nia umakain sira.’” (Êxodo [Keluaran]  12:26, 27) Inan-aman sira esplika katak Liurai Ejitu nian la hatán ba ema Izraél atu bá adora Jeová iha rai-fuik maran. Liurai hatete: “Sé mak Jeová, hodi haʼu tenke halo tuir ninia liafuan no haruka ema Izraél atu bá?” (Êxodo [Keluaran] 5:2) Inan-aman konta ba sira-nia oan oinsá mak Jeová fó resposta ba Liurai nia pergunta neʼe hodi hatudu sai ninia forsa boot. Nia lori malisan sanulu ba rai-Ejitu no salva ema Izraél husi tropa Ejitu iha Tasi Mean. Ema Izraél sira haree duni katak Jeová mak Maromak neʼebé loos no nia sempre kumpre buat neʼebé nia promete.

⁶ Ema Izraél hafolin sira-nia responsabilidade atu sai Jeová nia testemuña. Sira konta ba sira-nia oan no ba sira-nia atan husi rai seluk kona-ba buat furak oioin neʼebé Jeová halo ona. Maibé, laʼós neʼe deʼit, sira mós tenke treinu oan sira hodi halo tuir Maromak nia ukun-fuan kona-ba hahalok neʼebé santu, ka moos. Jeová hatete: “Imi tenkesér santu, tanba haʼu, Jeová imi-nia Maromak, mak santu.” (Levítico [Imamat] 19:2; Deuteronômio [Ulangan] 6:6, 7) Hanesan ho ohin loron, inan-aman sira tenke fó treinu ba sira-nia oan atu halaʼo sira-nia moris iha dalan neʼebé lori hahiʼi ba Maromak nia naran neʼebé kmanek loos!—Lee Provérbios (Amsal) 1:8; a Éfeso 6:4.

7. (a) Bainhira ema Izraél sira halo tuir Jeová, nasaun sira seluk haree saida? (b) Nuʼudar povu neʼebé lori Maromak nia naran, ita presiza halo saida?

⁷ Bainhira ema Izraél sira halo tuir Maromak, nia fó bensaun barak ba sira. Tan neʼe, nasaun sira seluk neʼebé haleʼu sira bele haree ho momoos katak Jeová mak proteje ninia povu. (Deuteronômio [Ulangan] 28:10) Maibé dala barak ema Izraél sira la halo tuir Jeová. Sira adora lulik no maromak falsu husi rai-Kanaán, no tuir maromak falsu sira-neʼe, povu sai laran aat hodi hasaʼe sira-nia oan rasik nuʼudar sakrifísiu no hanehan ema kiak sira. Sira-nia ezemplu aat neʼe hanorin ita katak ita hotu presiza hakaʼas an atu banati-tuir Jeová no hatudu hahalok moos nafatin, tanba ita lori Maromak Santu Liu Hotu nia naran!

8. Jeová haruka Isaías atu halo saida? Isaías hakarak hatene saida?

⁸ Liuhusi Isaías, Jeová fó avizu ba povu Izraél katak Nia sei halakon sidade kapitál Jeruzalein hodi husik sira sai dadur iha rai seluk. Maibé nia mós fó-hatene nanis katak nia sei halo “buat ruma neʼebé foun” no halo ninia povu sai livre husi situasaun nuʼudar dadur. (Isaías [Yesaya] 43:19) Jeová hatene katak povu Izraél sei la arrepende an, maibé nia haruka Isaías atu kontinua fó avizu ba sira. Iha livru Isaías (Yesaya) kapítulu 1 toʼo 6 hakerek liuliu kona-ba oinsá mak Jeruzalein sei naksobu. Isaías hakarak hatene ba tempu hira mak povu sei la rona ba Jeová. Maromak hatán: “Toʼo sidade sira lakon mohu no ema sei la iha tan, no uma hotu sai mamuk, no rai sei sai fatin neʼebé mamuk no fuik.”—Lee Isaías [Yesaya] 6:8-11. b

9. (a) Horibainhira mak Isaías nia profesia kona-ba Jeruzalein sai loos? (b) Ohin loron, ita presiza rona ba avizu saida?

⁹ Durante tinan 45 ka liu, Isaías fó avizu  ba povu Izraél kona-ba buat neʼebé sei akontese ba sira. Ninia knaar nuʼudar profeta komesa iha tinan 778 molok Kristu, durante tinan ikus ba Liurai Uzias nia ukun, no nia kontinua hatoʼo avizu toʼo tinan 732 durante Liurai Ezekias nia tempu. Depois neʼe, Jeová nafatin fó avizu ba ninia povu toʼo Jeruzalein naksobu iha tinan 607 molok Kristu. Sin, povu Izraél hetan avizu ba tempu kleur tebes kona-ba buat neʼebé sei akontese ba sira. Ohin loron, Jeová mós uza ninia povu atu fó avizu kona-ba futuru. Ba tinan barak, Livru Haklaken fó avizu katak lakleur Satanás nia ukun sei ramata no Kristu mak sei ukun mundu tomak.—Apokalipse 20:1-3, 6.

10, 11. Ema Izraél iha Babilónia sai testemuña kona-ba saida husi Isaías nia profesia?

¹⁰ Ikusmai, bainhira sidade Jeruzalein naksobu, ema judeu barak halo tuir Jeová hodi entrega an ba Babilónia nuʼudar dadur, no sira la mate. (Jeremias [Yeremia] 27:11, 12) Liutiha tinan 70, Maromak nia povu sai sasin kona-ba Isaías nia liafuan neʼebé dehan: “Ida-neʼe mak liafuan husi Jeová, Ida neʼebé Sosa Fali imi, Ida neʼebé Santu ba Izraél: ‘Tanba imi, haʼu haruka ema ruma ba Babilónia no loke portaun nia besi.’”—Isaías (Yesaya) 43:14.

¹¹ Jeová kumpre profesia neʼe iha dalan neʼebé furak tebes. Kalan ida iha fulan-Outubru tinan 539 molok Kristu, liurai Babilónia ho ninia ema-boot halo festa boot ida atu fó hahiʼi ba sira-nia maromak falsu hodi hemu tua husi kopu neʼebé foti husi templu Jeruzalein. Maibé iha kalan neʼe, Liurai Ciro ho ninia tropa mak ataka sidade Babilónia no manán Babilónia nia ukun. Iha tinan 538 ka 537 molok Kristu, Ciro haruka ema judeu atu fila ba Jeruzalein no harii fali Maromak nia templu. No Jeová proteje sira durante sira-nia viajen. Buat hotu neʼe akontese tuir Isaías nia profesia. Ikusmai, bainhira templu Jeruzalein harii ona, sira sai sasin ba Jeová katak nia mak Maromak loos, neʼebé sempre kumpre ninia promesa. Tan neʼe, Maromak hatete katak sira mak “povu neʼebé haʼu halibur hodi sira bele fó sai haʼu-nia glória”.—Isaías (Yesaya) 43:21; 44:26-28.

12, 13. (a) Bainhira ema Izraél fila fali ba sira-nia rai no harii fali templu, sé deʼit mak bá ho sira? (b) “Bibi seluk” iha knaar espesiál saida? Sira hein atu halo saida iha mundu foun?

¹² Bainhira ema Izraél fila fali ba sira-nia rai no harii fali templu, ema rihun ba rihun husi rai seluk mós hakarak adora Jeová hamutuk ho ema Izraél, no sira aumenta ba beibeik. (Esdras [Ezra] 2:58, 64, 65; Ester 8:17) Ohin loron, “ema-lubun boot” husi Jesus nia “bibi seluk” mak fó apoiu ba ema kristaun kose-mina sira, neʼebé bolu “Izraél Maromak nian”. (Apokalipse 7:9, 10;  João 10:16; Galásia 6:16) Loos duni, hanesan ho povu Izraél, Kristu nia alin sira serbí nuʼudar Maromak nia atan, no hamutuk ho sira, bibi seluk mós simu knaar espesiál hodi lori naran Testemuña ba Jeová.

¹³ Iha mundu foun, ema-lubun boot sei iha oportunidade furak tebes atu esplika ba ema neʼebé moris hiʼas oinsá sira halaʼo sira-nia knaar nuʼudar Testemuña ba Jeová durante loron ikus sira. Maibé hodi bele halo nuneʼe, ohin loron ita tenkesér haketak an husi hahalok foʼer. Liután neʼe, tanba ita hotu sala-naʼin, ita presiza husu Jeová nia perdua loroloron. Sin, se ita nafatin moos, ita hatudu katak ita hafolin knaar neʼebé furak tebes hodi lori Jeová nia naran.—Lee 1 João 1:8, 9.

14. Jeová nia naran katak sá?

¹⁴ Atubele hafolin liután ita-nia knaar hodi lori Maromak nia naran, ita presiza komprende ho loloos ninia naran neʼe katak sá. Naran “Jeová” mak foti husi liafuan ebraiku neʼebé iha arti “halo”. Tan neʼe, ita bele fiar katak Maromak nia naran signifika “Nia mak halo”. Naran ida-neʼe ajuda ita atu komprende nia mak Maromak hanesan saida. Nia mak Maromak neʼebé kria buat hotu-hotu no ida neʼebé sempre kumpre ninia hakarak hodi la husik buat ida hanetik nia. Sin, bainhira Jeová hatete ona atu halo buat ruma, la iha buat ida neʼebé bele hapara nia, inklui mós Satanás.

15. Ita bele aprende saida husi Jeová nia liafuan ba Moisés? (Haree kaixa, “ Naran Jeová”)

¹⁵ Bainhira Jeová haruka Moisés atu lori sai Ninia povu husi rai-Ejitu, Nia esplika liután kona-ba Ninia naran, hodi dehan: “Haʼu sei Sai Saida Deʼit neʼebé Haʼu Hakarak.” Jeová hatutan tan: “Ida-neʼe mak buat neʼebé ó sei hatete ba ema Izraél: ‘Haʼu sei Sai Saida Deʼit, Nia mak haruka haʼu ba imi.’” (Êxodo [Keluaran] 3:14) Sin, Jeová sei sai saida deʼit neʼebé nia presiza hodi kumpre ninia hakarak. Ba ema Izraél sira, Jeová sai duni Salvadór, Matadalan, Seguransa, no Ida neʼebé tau matan ba sira-nia presiza.

16, 17. (a) Atu hatudu katak ita hafolin ita-nia knaar atu lori Maromak nia naran, ita presiza halo saida? (b) Iha lisaun tuirmai, ita sei koʼalia kona-ba saida?

¹⁶ Toʼo ohin loron, Jeová kontinua sai buat saida deʼit neʼebé nia presiza atu tau matan ba ninia povu. Loron-loron Jeová fó buat neʼebé ita presiza atu moris no hakbesik ba nia. Maibé, Jeová nia naran laʼós deʼit kona-ba oinsá nia bele sai saida deʼit neʼebé nia hakarak. Nia mós bele halo ninia atan sira atu halo buat saida deʼit hodi bele kumpre Ninia hakarak. Hodi hanoin kona-ba neʼe sei book ita atu kontinua halaʼo ita-nia moris nuʼudar Jeová nia Testemuña neʼebé diʼak. Irmaun ida iha rai-Noruega, naran Kare, neʼebé serbí nuʼudar Testemuña ba Jeová tinan 70 liu ona, hatete: “Hodi serbí Jeová, Liurai rohan-laek, no sai parte husi povu neʼebé lori ninia naran santu, ida-neʼe halo haʼu sente kontente tebes. Haʼu sempre haksolok hodi esplika lia-loos husi Bíblia no haree ema nia matan nabilan ho kontente. Haʼu gosta tebes atu hanorin kona-ba oinsá Jesus nia sakrifísiu sei kona ema nia moris no oinsá mak liuhusi sakrifísiu neʼe ema bele hetan moris rohan-laek iha mundu foun neʼebé dame no justisa.”

¹⁷ Iha rai balu, susar atu hasoru ema neʼebé hakarak hatene kona-ba Jeová. Maski nuneʼe, hanesan ho irmaun Kare, ita sente kontente tebes kuandu ita hasoru ema neʼebé hakarak hatene liután kona-ba Jeová nia naran. Maibé oinsá mak ita bele sai Testemuña ba Jeová no iha tempu hanesan sasin ba Jesus? Ita sei koʼalia kona-ba pergunta neʼe iha lisaun tuirmai.