Pergunta neʼe importante liuliu se Ita-nia kaben mate. Karik Ita hakarak atu hasoru fali nia iha mundu foun hodi hahú fali moris nuʼudar kaben-naʼin. Irmaun ida hatete: “Haʼu ho haʼu-nia feen nunka hanoin atu ramata ami-nia moris kaben nian. Bainhira ami kaben, ami-nia planu mak atu adora Jeová ba nafatin nuʼudar feen-laʼen. Maski haʼu-nia feen mate ona, haʼu-nia sentimentu ba nia la troka.” Entaun, ita bele hein katak ema neʼebé moris hiʼas bele kaben ka lae? Ita la hatene ho loloos.

Ba tinan barak ona, ita-nia livru sira dehan katak Jesus nia liafuan ba ema saduseu sira mak kona-ba ema neʼebé moris hiʼas iha rai, no katak sira neʼebé moris hiʼas fali iha mundu foun sei la kaben. a (Haree nota iha kraik.) (Mateus 22:29, 30; Marcos 12:24, 25; Lucas 20:34-36) Maibé Jesus nia liafuan neʼe mak kona-ba ema neʼebé moris hiʼas iha lalehan ka lae? Maski ita la hatene ho loloos, mai ita buka-hatene didiʼak Jesus nia liafuan.

Jesus koʼalia ba sé? (Lee Lucas 20:27-33.) Nia koʼalia ba ema saduseu sira. Sira la fiar moris-hiʼas, tan neʼe koko atu lasu Jesus ho pergunta kona-ba arranju ba feto-faluk atu kaben ho kuñadu no tempu neʼebé sira hotu moris hiʼas. b Jesus hatán: “Mundu neʼe nia oan sira kaben no fó-kaben, maibé ba sira neʼebé merese atu hetan moris-hiʼas husi mate no hetan moris iha tempu neʼebé atu mai, sira sei la kaben ka fó-kaben. Tuir loloos, sira sei la mate tan, basá sira sei sai hanesan anju sira; sira mak Maromak nia oan tanba sira hetan moris-hiʼas.”—Lucas 20:34-36.

Tanbasá mak uluk ita-nia livru sira hatete katak Jesus nia liafuan neʼe karik kona-ba moris-hiʼas iha rai? Iha razaun rua. Primeiru: Kuandu ema saduseu sira litik Jesus, sira koʼalia kona-ba moris-hiʼas neʼebé akontese iha rai, tan neʼe Jesus hatán tuir sira-nia hanoin. Segundu: Bainhira Jesus hatán, nia mós temi kona-ba Abraão, Isaac, no Jacob, neʼebé sei moris hiʼas iha rai.—Lucas 20:37, 38.

Maibé, hodi estuda didiʼak eskritura, karik ita bele iha ideia katak Jesus koʼalia kona-ba moris-hiʼas iha lalehan. Tansá mak ita bele hatete hanesan neʼe? Mai ita hanoin kona-ba pontu rua husi Jesus nia liafuan rasik.

Primeiru, hanoin kona-ba liafuan “sira neʼebé merese atu hetan moris-hiʼas husi mate”. Ema kose-mina neʼebé laran-metin mak “ema neʼebé merese atu simu Maromak nia ukun”. (2 Tesalónika 1:5, 11) Liuhusi Jesus nia sakrifísiu, Maromak haree sira nuʼudar “ema loos”, no sira mate nuʼudar ema sala-laek. (Roma 5:1, 18; 8:1) Bíblia bolu ema kose-mina sira-neʼe “kontente no santu” no sira merese atu hetan moris-hiʼas ba lalehan. (Apokalipse 20:5, 6) Maibé,  Bíblia la dehan hanesan neʼe kona-ba ema neʼebé moris hiʼas iha rai, tanba sira barak mak “ema aat”. (Apóstolu 24:15) Hanoin toʼok, ita bele bolu “ema aat” sira-neʼe nuʼudar “sira neʼebé merese atu hetan moris-hiʼas” ka lae?

Liafuan segundu mak “sira sei la mate tan”. Tradusaun Bíblia seluk tradús liafuan neʼe nuʼudar “sira la bele mate tan”. Ema kose-mina sira neʼebé laran-metin toʼo mate no saʼe ba lalehan, sira deʼit mak hetan moris neʼebé la bele mate. (1 Korinto 15:53, 54) Sin, ema neʼebé hetan moris-hiʼas ba lalehan sei la bele mate tan. c

Buat neʼebé ita foin koʼalia ajuda ita atu hatene saida? Bainhira Jesus hatán ba ema saduseu sira, karik nia koʼalia kona-ba moris-hiʼas iha lalehan. Se nuneʼe, Jesus fó-hatene ita buat tolu kona-ba ema neʼebé moris hiʼas iha lalehan. (1) Sira sei la kaben, (2) Sira la bele mate, no (3) Sira sei sai hanesan anju sira. Maibé, kuandu ita komprende hanesan neʼe, ida-neʼe hamosu pergunta balu.

Primeiru: Tansá mak Jesus koʼalia kona-ba moris-hiʼas iha lalehan ba ema saduseu neʼebé husu kona-ba moris-hiʼas iha rai? Dala ruma Jesus la hatán iha dalan neʼebé kompletu ba ninia inimigu sira. Porezemplu, bainhira ema judeu balu husu Jesus atu halo milagre, nia hatete: “Harahun tiha templu neʼe, no iha loron tolu nia laran haʼu sei harii fali.” Tuir loloos, Jesus hatene katak sira hanoin kona-ba templu, maibé nia hatán fali kona-ba “ninia isin rasik”. (João 2:18-21) Nuneʼe mós ba ema saduseu sira. Karik Jesus lakohi fó resposta ba saduseu sira neʼebé laran-makerek, neʼebé la fiar moris-hiʼas ka anju sira. (Provérbios [Amsal] 23:9; Mateus 7:6; Apóstolu 23:8) Karik Jesus hakarak fó-hatene ba ninia dixípulu sira neʼebé laran moos kona-ba moris-hiʼas iha lalehan, tanba aban-bainrua sira sei hetan moris-hiʼas hanesan neʼe.

Segundu: Tansá mak Jesus temi Abraão, Isaac, no Jacob neʼebé sei moris hiʼas iha rai? (Lee Mateus 22:31, 32.) Antes Jesus temi fiar-naʼin sira-neʼe, nia hahú ho liafuan: “No kona-ba moris-hiʼas husi mate, . . .” Karik Jesus uza liafuan neʼe hodi troka ninia tópiku atu koʼalia fali kona-ba moris-hiʼas iha rai. Jesus temi fali Jeová nia liafuan ba Moisés iha ai-tarak neʼebé lakan tanba ema saduseu simu livru neʼebé Moisés hakerek. Jesus hakarak hatudu ba sira ho klaru katak Maromak sei halo ema mate moris hiʼas duni iha rai.—Êxodo (Keluaran) 3:1-6.

Terseiru: Se Jesus hatete katak ema neʼebé moris-hiʼas iha lalehan sei la kaben, neʼe katak ema neʼebé moris hiʼas iha rai bele kaben ka lae? Maromak nia Liafuan la hatete. Se Jesus koʼalia deʼit kona-ba moris-hiʼas iha lalehan, ida-neʼe la hatán ba pergunta kona-ba ema neʼebé moris hiʼas iha mundu foun, se sira bele kaben ka lae.

Tuir Maromak nia Liafuan, buat neʼebé hakotu relasaun kaben nian mak mate. Tan neʼe, ida neʼebé sai faluk la presiza sente sala kuandu nia deside atu kaben fali. Neʼe mak ema ida-idak nia desizaun, no ita labele kritika ema neʼebé hakarak kaben fali.—Roma 7:2, 3; 1 Korinto 7:39.

Tuir loloos, ita iha pergunta barak kona-ba moris iha mundu foun. Atu hatene resposta ho loloos, ita presiza hein duké siʼik deʼit kona-ba buat oioin neʼebé Bíblia la fó sai. Maibé ita bele fiar metin katak, ema neʼebé halo tuir Jeová sei sai kontente iha mundu foun, tanba Jeová sei halo ema hotu nia moris kontente.—Salmo (Mazmur) 145:16.