1, 2. (a) Tanbasá mak kongregasaun iha Koloso besik lakon sira-nia unidade? (b) Konsellu saida mak ajuda sira proteje sira-nia relasaun ho Maromak?

 IHA tempu apóstolu nian, kongregasaun iha Koloso besik ona lakon sira-nia unidade. Irmaun balu fó sai katak ema hotu tenke halo tuir Moisés nia Ukun-Fuan. Irmaun seluk dehan katak sala atu moris ho kontente. Paulo fó konsellu ba sira kona-ba perigu atu tuir hanorin falsu sira-neʼe hodi dehan: “Kuidadu bá atu ema ida la kaer imi ho lasu liuhusi ema nia matenek no hanorin bosok neʼebé la iha folin. Buat sira-neʼe tuir deʼit ema nia lisan no tuir dalan mundu neʼe nian, laʼós tuir Kristu.”—Koloso 2:8.

² Se ema kose-mina sira-neʼe halo tuir ema nia matenek deʼit, sira sei la simu tan oportunidade nuʼudar Maromak nia oan sira. (Koloso 2:20-23) Paulo ajuda sira atu proteje sira-nia relasaun ho Maromak hodi dehan: “Kontinua hanoin kona-ba buat leten nian, laʼós kona-ba buat neʼebé iha rai.” (Koloso 3:2) Ema kristaun sira-neʼe presiza hanoin-hetan kona-ba sira-nia esperansa furak atu moris iha lalehan.—Koloso 1:4, 5.

3. (a) Ema kristaun kose-mina sira iha esperansa saida? (b) Pergunta saida deʼit mak ita sei koʼalia hamutuk iha lisaun neʼe?

 ³ Ema kose-mina ohin loron mós hanoin deʼit kona-ba Maromak nia Ukun no sira-nia esperansa atu ukun hamutuk ho Kristu iha lalehan. (Roma 8:14-17) Maibé, oinsá ho ema sira neʼebé iha esperansa atu moris iha rai? Oinsá mak Paulo nia liafuan mós diʼak ba sira? Oinsá mak sira bele hanoin nafatin “buat leten nian”? (João 10:16) Abraão no Moisés hanoin deʼit kona-ba buat leten nian maski iha tempu neʼebé susar. Oinsá mak ita bele banati-tuir sira?

4. Oinsá mak ema kristaun neʼebé iha esperansa atu moris iha rai bele hanoin nafatin kona-ba buat leten nian?

⁴ Ema neʼebé iha esperansa atu moris iha rai tenke kontinua hanoin kona-ba buat leten nian. Sira halo ida-neʼe kuandu sira tau uluk Jeová no ninia Ukun iha sira-nia moris. (Lucas 10:25-27) Hodi halo nuneʼe, ita banati-tuir Jesus Kristu. (1 Pedro 2:21) Ema kristaun iha tempu apóstolu nian moris iha fatin neʼebé nakonu ho hanoin la loos, filozofia, no hakarak deʼit rikusoin. Ohin loron, ita mós haree ida-neʼe iha Satanás nia mundu aat neʼe. (Lee 2 Korinto 10:5.) Ita presiza banati-tuir Jesus no proteje ita-nia an husi buat sira-neʼe neʼebé bele estraga ita-nia relasaun ho Jeová.

5. Saida mak ita presiza husu ba ita-nia an kona-ba osan no rikusoin?

⁵ Ita husik mundu nia haree kona-ba osan no rikusoin atu kona ita ka lae? Ita hatudu sai buat neʼebé ita hadomi liuhusi ita-nia hanoin no hahalok. Jesus esplika kona-ba neʼe kuandu nia dehan: “Iha fatin neʼebé ó tau ó-nia rikusoin, iha fatin neʼe mós ó-nia fuan sei hela bá.” (Mateus 6:21) Atu hatene saida mak folin-boot iha ita-nia laran ita presiza husu ba ita-nia an: ‘Haʼu gasta tempu hira atu hanoin kona-ba osan, serbisu diʼak, ka iha moris neʼebé diʼak liu? Ka haʼu hakaʼas an atu halaʼo moris simples no tau uluk haʼu-nia relasaun ho Jeová?’ (Mateus 6:22) Jesus dehan katak se ita hanoin liu kona-ba ‘haloot rikusoin iha rai’, karik ita bele lakon ita-nia relasaun ho Jeová.—Mateus 6:19, 20, 24.

6. Oinsá mak ita bele manán hasoru ita-nia hakarak sala?

⁶ Ita hotu mak sala-naʼin, entaun fasil ba ita atu halo sala. (Lee Roma 7:21-25.) Se ita la sadere ba Maromak nia espíritu santu, ita bele envolve an iha “festa arbiru ka lanu”, sala-foʼer, ka “hahalok neʼebé la iha moe”, no la iha respeitu ba Maromak nia ukun-fuan. (Roma 13:12, 13) Ita nafatin kontra hasoru hakarak neʼebé sala. Maibé, atubele manán ida-neʼe ita presiza hanoin kona-ba buat leten nian. Ita presiza hakaʼas an no halo buat neʼebé Paulo dehan: “Haʼu kontrola haʼu-nia isin-lolon no ukun nia hanesan atan.” (1 Korinto 9:27) Ita mós presiza kontrola ita-nia an. Mai ita koʼalia kona-ba buat neʼebé Maromak nia atan naʼin-rua halo hodi laran-metin ba nia.—Ebreu 11:6.

7, 8. (a) Susar saida mak Abraão no Sara hasoru? (b) Abraão hanoin beibeik kona-ba saida?

⁷ Kuandu Jeová haruka Abraão atu muda ho ninia família hodi ba rai-Kanaán, nia halo tuir kedas ida-neʼe. Tanba Abraão nia fiar no laran-metin, Jeová halo aliansa ida ho nia, dehan: “Haʼu sei halo ó sai nasaun boot ida, no haʼu sei haraik bensaun ba ó.” (Gênesis  [Kejadian] 12:2) Maibé, tinan barak depois neʼe, Abraão no nia feen Sara la iha oan. Karik Abraão bele hanoin katak Jeová haluha ninia promete ba nia. Liután neʼe, moris iha rai-Kanaán mak laʼós buat neʼebé fasil. Abraão tenke husik moris diʼak iha sidade riku naran Ur no tenke laʼo dook maizumenus kilómetru 1.600 hodi toʼo rai-Kanaán. Nia no ninia família moris iha tenda, dala ruma kuran hahán, no hasoru perigu husi naʼok-teen sira. (Gênesis [Kejadian] 12:5, 10; 13:18; 14:10-16) Maski nuneʼe, Abraão no ninia família lakohi atu fila fali ba Ur hodi hetan moris diʼak.—Lee Ebreu 11:8-12, 15.

⁸ Abraão “tau fiar ba Jeová” no la hanoin kona-ba “buat neʼebé iha rai”. (Gênesis [Kejadian] 15:6) Nia hanoin beibeik kona-ba Maromak nia promete ba nia. Jeová haree Abraão nia fiar no dehan ba nia: “‘Favór ida, haree ba leten, haree ba lalehan no sura toʼok fitun sira, se ó bele sura sira hotu.’ No nia dehan tan ba Abraão: ‘Ó-nia bei-oan sei sai barak hanesan neʼe.’” (Gênesis [Kejadian] 15:5) Kuandu Abraão rona ida-neʼe, nia hatene katak Jeová la haluha nia. Dala hotu neʼebé nia hateke ba fitun sira, nia hanoin-hetan Jeová nia promete atu fó nia bei-oan barak. No kuandu toʼo tempu neʼebé Jeová deside ona, Abraão iha duni oan ida, neʼe tuir Maromak nia promete.—Gênesis (Kejadian) 21:1, 2.

9. Oinsá mak ita bele banati-tuir Abraão?

⁹ Hanesan Abraão, ita mós hein atu Jeová nia promete sai loos. (2 Pedro 3:13) Se ita la hanoin nafatin kona-ba buat leten nian, karik ita bele sente katak promesa sira-neʼe mak tarde loos no karik ita-nia laran-manas ba Jeová sei sai menus. Karik uluk ita husik buat barak tanba Jeová, hodi ita bele serbí nuʼudar pioneiru ka serbí iha dalan espesiál seluk. Maibé, oinsá ho ohin loron? Ita hanesan Abraão neʼebé hakaʼas an atu serbí Jeová no hateke deʼit ba futuru ka lae? (Ebreu 11:10) Abraão “tau fiar ba Jeová” no nia sai nuʼudar Maromak nia belun.—Roma 4:3.

10. Nuʼudar joven, Moisés halaʼo ninia moris oinsá?

¹⁰ Mane ida tan neʼebé hanoin nafatin buat leten nian mak Moisés. Nia sai boot mai nuʼudar parte ba família liurai nian iha Ejitu no iha tempu neʼe Ejitu mak nuʼudar Ukun neʼebé boot iha mundu. Bíblia dehan katak nia “simu hanorin kona-ba Ejitu nia matenek hotu”. Edukasaun boot neʼe halo Moisés “koʼalia ho kbiit no halo hahalok boot sira”. (Apóstolu 7:22) Tanba edukasaun sira-neʼe, Moisés iha oportunidade barak atu bele sai ema importante iha Ejitu. Maski nuneʼe, Moisés sente katak iha buat ida neʼebé importante liu ba nia, neʼe mak halo Maromak nia hakarak.

11, 12. Edukasaun saida mak importante tebes ba Moisés? Oinsá mak ita bele hatene ida-neʼe?

¹¹ Kuandu Moisés sei labarik, ninia inan, Jokebed, hanorin nia kona-ba Maromak Ebreu nian. Nia sente katak matenek kona-ba Jeová mak importante liu fali buat seluk. Nia ho laran husik oportunidade atu hetan kbiit no sai riku iha Liurai Ejitu nia umakain. (Lee Ebreu 12:24-27.) Treinu neʼebé Moisés hetan husi kiʼik no ninia fiar ba Jeová ajuda nia atu hanoin deʼit buat leten nian.

 ¹² Maski Moisés simu edukasaun neʼebé diʼak liu hotu iha Ejitu, maibé nia la uza ida-neʼe atu hetan kbiit, sai naran boot, ka sai ema riku. Tuir loloos Bíblia dehan katak nia “la simu atu ema bolu nia nuʼudar oan husi Liurai Ejitu nia oan-feto kuandu nia sai boot ona. Nia hili atu hetan terus hamutuk ho Maromak nia povu duké hetan ksolok ba tempu uitoan iha sala laran”. Tinan barak depois neʼe, Moisés uza ninia matenek kona-ba Jeová atu dirije ema Izraél.

13, 14. (a) Antes Moisés bele halo livre Jeová nia povu, nia presiza aprende saida? (b) Ita mós presiza aprende saida?

¹³ Moisés hadomi Jeová no Ninia povu. Kuandu Moisés tinan 40, nia hanoin katak nia prontu ona atu halo Maromak nia povu sai livre husi situasaun nuʼudar atan. (Apóstolu 7:23-25) Maibé, Jeová hatene katak Moisés seidauk prontu atu halo knaar neʼe. Moisés tenke aprende atu haburas hahalok sira hanesan haraik an, pasiénsia, laran-diʼak, no kontrola an. (Provérbios [Amsal] 15:33) Moisés presiza treinu neʼebé ajuda nia atu prontu tahan susar sira neʼebé sei mosu. Hodi sai nuʼudar bibi-atan ba tinan 40 ajuda nia atu haburas hahalok sira-neʼe.

¹⁴ Moisés aprende husi treinu neʼebé nia simu nuʼudar bibi-atan ka lae? Sin, nia aprende duni! Maromak nia Liafuan dehan katak “Moisés mak mane neʼebé laran-maus liu fali ema seluk hotu neʼebé moris iha rai”. (Números [Bilangan] 12:3) Tanba nia aprende ona atu sai haraik an, nia bele hatudu pasiénsia ba ema oioin no mós sira-nia problema. (Êxodo [Keluaran] 18:26) Ita mós presiza hahalok neʼebé sei ajuda ita atu hetan salvasaun iha “terus boot” no tama ba Maromak nia mundu foun. (Apokalipse 7:14) Ita sempre iha dame ho ema neʼebé ita hanoin mak hirus-teen ka laran-kanek lalais ka lae? Apóstolu Pedro nia liafuan tuirmai bele ajuda: “Hatudu respeitu ba ema oioin, hadomi maluk fiar-naʼin hotu.”—1 Pedro 2:17.

15, 16. (a) Tanbasá mak ita tenke hanoin nafatin buat leten nian? (b) Tanbasá mak ema kristaun presiza hatudu hahalok diʼak?

¹⁵ Ita moris iha loron ikus sira neʼebé “mosu problema barak neʼebé susar atu tahan”. (2 Timóteo 3:1) Entaun, importante tebes atu kontinua hanoin buat neʼebé leten nian atu bele hakbesik nafatin ba Jeová. (1 Tesalónika 5:6-9) Mai ita haree dalan tolu atu halo ida-neʼe.

¹⁶ Ita-nia hahalok: Pedro fó sai katak importante tebes atu hatudu hahalok diʼak. Nia dehan: “Hatudu nafatin hahalok diʼak iha nasaun sira-nia leet, atu nuneʼe . . . sira bele sai sasin ba imi-nia hahalok diʼak, no rezultadu mak, sira sei hahiʼi Maromak.” (1 Pedro 2:12) Liuhusi ita-nia hahalok kuandu ita iha uma, serbisu-fatin, eskola, halimar, ka haklaken, ita tenke halo buat hotu neʼebé ita bele atu fó hahiʼi ba Maromak. Klaru katak ita hotu mak ema sala-naʼin. (Roma 3:23) Maibé ita keta sai laran-tun. Ho Jeová nia ajuda ita bele “halo funu neʼebé loos atu defende fiar”.—1 Timóteo 6:12.

17. Oinsá mak ita bele iha hanoin loos hanesan Jesus? (Haree foto iha pájina 28.)

¹⁷ Ita-nia hanoin: Atu nafatin hatudu hahalok diʼak, ita presiza iha hanoin neʼebé loos. Apóstolu Paulo dehan: “Kontinua hatudu hahalok neʼebé  Kristu Jesus mós hatudu.” (Filipe 2:5) Hahalok saida mak Jesus hatudu? Nia haraik an, no ida-neʼe book nia atu husik ninia hakarak rasik atu serbí Jeová. Nia sempre hanoin kona-ba haklaken liafuan diʼak kona-ba Maromak nia Ukun. (Marcos 1:38; 13:10) Ba Jesus, Maromak nia Liafuan mak matadalan neʼebé importante liu hotu. (João 7:16; 8:28) Nia estuda didiʼak Eskritura sira hodi nia bele esplika no defende Maromak nia Liafuan. Se ita iha hanoin hanesan Kristu, ita mós sei haraik an, laran-manas atu haklaken no estuda Bíblia didiʼak .

18. Iha dalan importante saida deʼit mak ita apoia Jeová nia serbisu?

¹⁸ Ita-nia hakaʼas-an: Maromak hakarak atu “sira neʼebé iha lalehan no sira neʼebé iha rai” atu hakruʼuk an ba Jesus. (Filipe 2:9-11) Maski Jesus iha pozisaun neʼebé aas, nia ho haraik an hakruʼuk ba ninia Aman. Ita mós tenke halo hanesan. (1 Korinto 15:28) Ita hola parte iha Jeová nia serbisu kuandu ita halo ‘ema husi nasaun hotu atu sai dixípulu’. (Mateus 28:19) Ita mós “halo buat neʼebé diʼak ba ema hotu”, inklui mós maluk kristaun sira.—Galásia 6:10.

19. Ita hakarak tebes atu halo saida?

¹⁹ Ita agradese tebes tanba Jeová haruka ita atu kontinua hanoin kona-ba buat leten nian! Ita presiza “hakaʼas an atu halai toʼo rohan” no kontinua hanoin kona-ba buat neʼebé loos. (Ebreu 12:1) Mai ita hotu serbisu ‘ho laran tomak hanesan ita halo ba Jeová’, no ita-nia Aman iha lalehan sei haraik bensaun barak ba ita.—Koloso 3:23, 24.