Iha apóstolu sira-nia tempu, apóstolu Paulo hatete ba katuas sira neʼebé serbí iha kongregasaun Éfeso hanesan neʼe: “Tau matan didiʼak ba imi-nia an no ba bibi-lubun tomak, ida neʼebé espíritu santu hili ona imi atu dirije nuʼudar bibi-atan, hodi tau matan ba Maromak nia kongregasaun neʼebé nia sosa ona ho ninia Oan rasik nia raan.” (Apóstolu 20:28) Ohin loron, oinsá mak espíritu santu ajuda hodi hili katuas ka atan ba kongregasaun sira?

Primeiru, tanba espíritu santu mak halo ema neʼebé hakerek Bíblia hodi hakerek kritériu sira ba ema neʼebé atu sai katuas ka atan ba kongregasaun. Iha 1 Timóteo 3:1-7, ita bele haree kritériu ba katuas sira iha maizumenus hamutuk 16. Kritériu balu seluk bele hetan husi Tito 1:5-9 no Tiago 3:17, 18. Kritériu ba atan kongregasaun nian bele haree iha 1 Timóteo 3:8-10, 12, 13. Segundu, sira neʼebé halo rekomendasaun no sira neʼebé foti irmaun ida, sira halo orasaun hodi husu Jeová nia espíritu santu dirije sira atu haree didiʼak se irmaun neʼe hakaʼas an ona hodi kumpre Bíblia nia kritériu ka lae. Terseiru, irmaun neʼebé hetan rekomendasaun mós presiza hatudu hahalok neʼebé mai husi Maromak nia espíritu santu iha ninia moris rasik. (Galásia 5:22, 23) Entaun, atu foti irmaun ida, presiza duni Maromak nia espíritu hodi halaʼo prosesu neʼe.

Maibé, atu foti irmaun ida, knaar neʼe loloos sé-nian? Tuir arranju uluk nian, atu halo rekomendasaun ba katuas ka atan kongregasaun ida, irmaun sira haruka rekomendasaun neʼe ba sukursál. Iha neʼebá, irmaun sira neʼebé hetan ona knaar husi Grupu Administradór sei haree didiʼak rekomendasaun sira-neʼe depois mak foti irmaun neʼe atu sai katuas ka atan ba kongregasaun. Hotu tiha, sukursál fó-hatene ba grupu katuas nian iha irmaun neʼe nia kongregasaun, no katuas sira-neʼe fó-hatene fali ba irmaun neʼe kona-ba foti ona nia atu sai katuas ka atan ba kongregasaun ida. Maibé antes neʼe, katuas sira sei husu uluk irmaun neʼe se nia hakarak ka lakohi atu simu knaar foun neʼe ka nia rasik sente katak tuir loloos nia seidauk kumpre kritériu atu simu knaar neʼe. Prosesu ikus mak fó-hatene ba kongregasaun tomak katak ita iha ona katuas ka atan ba kongregasaun foun ida.

Iha apóstolu sira-nia tempu, sira uza prosesu saida? Dala ruma apóstolu sira mak foti kedas irmaun ida hodi halo knaar ruma, hanesan iha tempu ida sira foti mane naʼin-hitu tau matan hodi fahe hahán loroloron nian ba feto-faluk sira. (Apóstolu 6:1-6) Maibé, mane sira-neʼe karik serbí hela nuʼudar katuas ida, no agora hanesan simu tan knaar foun deʼit.

Maski eskritura sira la esplika prosesu ida-idak kona-ba oinsá mak sira foti irmaun ida iha tempu uluk, maibé ita bele haree matadalan balu oinsá mak sira foti irmaun sira. Eskritura hatete katak  bainhira Paulo no Barnabé fila husi sira-nia knaar misionáriu primeiru nian, iha dalan “sira hili katuas sira iha kongregasaun ida-idak, no sira hasaʼe orasaun ho jejún, tuirmai sira entrega katuas sira-neʼe ba Jeová, ida neʼebé sira fiar ona.” (Apóstolu 14:23) Tinan hirak liutiha, Paulo hakerek ba ninia maluk vizita kongregasaun nian naran Tito: “Haʼu husik ó atu hela iha Kreta, hodi nuneʼe ó bele hadiʼa buat neʼebé la loos no atu foti katuas sira iha sidade ida-idak, nuʼudar haʼu haruka ó atu halo.” (Tito 1:5) Nuneʼe mós ho maluk vizita kongregasaun Timóteo, apóstolu Paulo fó autoridade hanesan Tito nian. (1 Timóteo 5:22) Husi neʼe ita bele haree momoos katak katuas vizita kongregasaun sira mak foti irmaun ida, laʼós apóstolu ka katuas sira iha Jeruzalein mak foti.

Tanba haree ba Bíblia nia ezemplu sira-neʼe mak Grupu Administradór husi Testemuña ba Jeová halo ona mudansa ida kona-ba oinsá atu foti katuas ka atan ba kongregasaun ida. Komesa husi loron 1 Setembru 2014, prosesu atu foti irmaun ida mak tuirmai neʼe: Se katuas área nian mak simu rekomendasaun kona-ba irmaun ida, nia sei haree didiʼak ba rekomendasaun ida-neʼe. Bainhira nia vizita kongregasaun neʼe, nia sei hakaʼas an hodi koñese liután irmaun neʼe, se bele haklaken hamutuk ho nia. Tuirmai nia sei koʼalia hamutuk ho grupu katuas nian kona-ba rekomendasaun neʼebé sira fó iha irmaun neʼe nia kongregasaun. Katuas área nian mak iha responsabilidade atu foti katuas ka atan ba kongregasaun ida iha ninia área. Neʼe hodi halo tuir sistema apóstolu sira-nian.

Sé mak tau matan ba prosesu sira-neʼe? Hanesan ita hatene ona, “atan laran-metin no matenek” mak iha responsabilidade atu tau matan ba Naʼi nia atan sira seluk. (Mateus 24:45-47) Neʼe inklui mós ho espíritu santu nia ajuda, sira buka-hatene eskritura ida-idak hodi fó matadalan oinsá atu uza Bíblia nia prinsípiu sira hodi kongregasaun iha mundu tomak bele organiza ho diʼak. Atan laran-metin mak foti katuas área nian no mós irmaun sira iha Grupu Koordenadór ba Sukursál. Bainhira iha matadalan foun ida, sukursál ida-idak sei ajuda oinsá atu implementa matadalan neʼe. Grupu katuas kongregasaun ida-idak iha responsabilidade hodi haree didiʼak ba kritériu husi eskritura sira kona-ba irmaun sira neʼebé sira atu halo rekomendasaun hodi serbí iha Maromak nia kongregasaun. Katuas área nian ida-idak iha responsabilidade todan hodi haree didiʼak no halo orasaun kona-ba rekomendasaun neʼebé sira simu husi katuas kongregasaun sira no depois mak sira foin foti irmaun sira neʼebé kumpre ona kritériu husi eskritura sira.

Bainhira ita komprende didiʼak prosesu neʼe, ita hafolin duni tanba espíritu santu mak ajuda prosesu neʼe laʼo ho diʼak. Ida-neʼe mós halo ita tau fiar no respeitu liután ba irmaun sira neʼebé serbí daudaun iha kongregasaun.—Ebreu 13:7, 17.

Apokalipse 11:3 koʼalia kona-ba sasin-naʼin rua neʼebé sei fó sai profesia ba loron 1.260, depois animál fuik sei “manán sira no oho sira”. Maibé liutiha “loron tolu ho balu”, sasin-naʼin rua neʼe moris fali, no ema neʼebé haree sira hakfodak tebes.—Apokalipse 11:7, 11.

Sasin-naʼin rua neʼe mak sé? Informasaun husi eskritura sira tuirmai bele ajuda ita hodi buka-hatene sira-neʼe sé. Eskritura esplika katak primeiru, “sira naʼin-rua mak ai-oliveira rua no ahi-oan fatin rua”. (Apokalipse 11:4) Profeta Zacarias mós koʼalia kona-ba ahi-oan fatin no ai-oliveira rua. Iha ninia profesia, ai-oliveira rua reprezenta “sasin-naʼin rua ida-neʼebé hili ona hamriik hela iha Naʼi raiklaran nia sorin”, sira mak governadór Zorobabel ho Amlulik Boot Josué. (Zacarias [Zakharia] 4:1-3, 14) Segundu, sasin-naʼin rua halo milagre hanesan ho Moisés no Elias nian.—Kompara Apokalipse 11:5, 6 ho Números (Bilangan) 16:1-7, 28-35 no 1 Reis (Raja-Raja) 17:1; 18:41-45.

Eskritura iha Apokalipse no Zacarias koʼalia kona-ba buat ida deʼit. Eskritura ida-idak refere ba ema sira neʼebé Maromak hili hodi dirije ninia povu iha tempu susar. Entaun, Apokalipse kapítulu 11 refere ba irmaun kose-mina sira neʼebé dirije serbisu haklaken iha tinan 1914, iha tempu neʼebé Maromak nia Ukun harii iha lalehan. Sira haklaken ho “hatais hena karón” nian ba tinan tolu ho balu.

Tempu haklaken ho hatais karón nian ramata tiha, ema kaer sira ba komarka, maibé ba tempu badak deʼit. Eskritura kompara tempu neʼe hanesan loron tolu ho balu deʼit, tempu neʼe hanesan ema oho tiha sira. Iha sira-nia inimigu nia matan, neʼe hanesan ema oho tiha sira-nia serbisu haklaken. Ida-neʼe halo inimigu sira kontente tebes.—Apokalipse 11:8-10.

Maibé neʼe hanesan loloos ho buat neʼebé profesia hatete, liutiha loron tolu ho balu sasin-naʼin rua moris fali. Sira sai husi kadeia no tanba sira hatudu ona laran neʼebé metin, Jeová uza Jesus hodi fó knaar espesiál ida ba sira iha tinan 1919 hodi serbí nuʼudar “atan laran-metin no matenek”. Sira mak tau matan ba Maromak nia povu nia presiza espirituál nian iha loron ikus sira.—Mateus 24:45-47; Apokalipse 11:11, 12.

Apokalipse 11:1, 2 liga akontesimentu iha leten ho tempu neʼebé sukat templu espirituál nian. Malaquias (Maleakhi) kapítulu 3 dehan katak bainhira tempu sukat ka rabista liu tiha, tuirmai mak tempu atu hamoos templu espirituál nian. (Malaquias [Maleakhi] 3:1-4) Entaun, revista no hamoos templu neʼe gasta tempu hira? Neʼe komesa husi tinan 1914 toʼo tinan 1919 nia hahú. Tan neʼe, loron 1.260 (fulan 42) no loron tolu ho balu neʼebé temi iha Apokalipse kapítulu 11 mak inklui hotu iha tempu sira-neʼe.

Ho laran tomak ita hakarak fó agradese ba Jeová, tanba nia arranja tempu hamoos nian hodi hamoos povu ida hodi halaʼo nia serbisu! (Tito 2:14) Ita mós agradese ba ezemplu husi ema kose-mina neʼebé dirije serbisu haklaken iha tempu susar nian neʼebé sai mós nuʼudar sasin-naʼin rua. a