1. Tanbasá mak ita fó agradese ba Jeová?

JEOVÁ fó mai ita “prezente diʼak ida-idak no prezente hotu neʼebé kompletu”. (Tiago 1:17) Iha razaun barak atu ita fó agradese ba nia. Nia mak ita-nia Bibi-Atan neʼebé hadomi ita no tau matan ba ita. (Salmo [Mazmur] 23:1-3) Nia mak hanesan “fatin protesaun no forsa mai ita”, liuliu bainhira ita hasoru susar. (Salmo [Mazmur] 46:1) Ita sente hanesan ema neʼebé hakerek salmu ida, nia dehan: “Fó agradese ba Jeová, tanba nia diʼak. Ninia domin neʼebé ho laran-metin iha ba nafatin.”—Salmo (Mazmur) 106:1.

2, 3. (a) Tansá perigu atu la hatudu agradese? (b) Iha lisaun neʼe, ita sei koʼalia kona-ba pergunta saida deʼit?

² Iha loron ikus sira-neʼe, ema barak la hatene ona fó agradese, hanesan Bíblia fó-hatene nanis. (2 Timóteo 3:2) Barak la hafolin bensaun sira neʼebé sira simu husi Maromak Jeová. No ema barak la kontente ho buat neʼebé sira iha ona tanba kompañia sira iha mundu neʼe halo promosaun barabarak hodi book ema hola sasán oioin neʼebé loloos sira la presiza. Se ita la kuidadu, ita bele sai hanesan ema Izraél sira. Sira la hafolin Jeová nia bensaun sira  no la agradese ba sira-nia relasaun diʼak ho nia. Nuneʼe, importante tebes ba ita atu hatudu agradese nafatin.—Salmo (Mazmur) 106:7, 11-13.

³ Hanoin mós buat neʼebé bele akontese bainhira ita hasoru susar sira. Karik ita hanoin liu kona-ba ita-nia problema toʼo ita haluha ona ita-nia bensaun sira. (Salmo [Mazmur] 116:3) Entaun, saida mak ita bele halo atu hatudu agradese nafatin ba Jeová? No saida mak bele ajuda ita atu la sente laran-tun demais bainhira ita hasoru susar sira? Ita sei buka-hatene resposta ba pergunta sira-neʼe.

4. Oinsá mak ita bele sente agradese nafatin ba Jeová?

⁴ Se ita hakarak agradese nafatin ba Jeová, ita presiza hanoin didiʼak kona-ba bensaun sira neʼebé Jeová fó mai ita ida-idak. Depois, hanoin kona-ba oinsá bensaun sira-neʼe hatudu Maromak nia domin boot mai ita. Bainhira ema neʼebé hakerek salmu hanoin didiʼak kona-ba neʼe, nia hakfodak tanba Jeová halo ona buat furak barak ba nia.—Lee Salmo (Mazmur) 40:5; * 107:43. *

5. Saida mak ita aprende husi apóstolu Paulo kona-ba fó agradese?

⁵ Ita bele aprende atu hatudu agradese ba Jeová hodi halo tuir ezemplu husi apóstolu Paulo nian. Ita hatene katak nia hanoin didiʼak ninia bensaun sira tanba bainhira nia halo orasaun nia sempre fó agradese ba Maromak. Paulo hatene katak uluk, nia “koʼalia kontra Maromak no fó-terus no koʼalia aat ninia povu”. Nuneʼe mak nia agradese tebes tanba Maromak no Kristu hatudu laran-sadiʼa ba nia hodi fó knaar espesiál ba nia atu haklaken ba ema seluk. (Lee 1 Timóteo 1:12-14.) Paulo mós hafolin ninia irmaun-irmán kristaun sira no nia fó agradese beibeik ba Jeová tanba sira-nia hahalok no serbisu diʼak. (Filipe 1:3-5, 7; 1 Tesalónika 1:2, 3) Paulo mós fó kedas agradese ba Jeová tanba ajuda neʼebé nia simu husi ninia maluk sira bainhira nia hasoru hela susar. (Apóstolu 28:15; 2 Korinto 7:5-7) Nuneʼe, ita la hakfodak tanba apóstolu Paulo anima ema kristaun sira: “Hatudu bá katak imi agradese. . . . Fó laran-manas ba malu ho salmu no hahiʼi ba Maromak, no kanta knananuk adorasaun nian ho agradese.”—Koloso 3:15-17.

6. Tanba razaun saida deʼit mak Ita rasik agradese ba Jeová?

⁶ Oinsá mak ita bele banati-tuir Paulo nia ezemplu? Ita bele hanoin didiʼak kona-ba buat neʼebé Maromak Jeová halo ona mai ita. (Salmo [Mazmur] 116:12) Oinsá mak Ita sei hatán se ema husu ba Ita, ‘Ita agradese ba bensaun saida deʼit husi Jeová?’ Ita sei sura Ita-nia relasaun diʼak ho Jeová ka lae? Ka hetan perdua ba Ita-nia sala liuhusi Jesus nia sakrifísiu? Ita sei temi irmaun-irmán sira-nia naran neʼebé ajuda Ita durante iha Ita-nia tempu susar ka lae? Oinsá ho Ita-nia kaben no oan sira? Uza tempu hodi hanoin didiʼak kona-ba bensaun oioin neʼebé Maromak fó ona ba Ita. Tanba hodi halo nuneʼe, bele book Ita-nia laran atu fó agradese ba nia loroloron.—Lee Salmo (Mazmur) 92:1, 2. *

7. (a) Tanbasá mak ita tenke fó agradese ba Jeová iha ita-nia orasaun? (b) Fó agradese ba Jeová lori buat diʼak saida mai ita?

⁷ Bainhira ita hanoin didiʼak ba bensaun sira husi Jeová, neʼe sei book ita atu fó obrigadu ba nia iha ita-nia orasaun. (Salmo [Mazmur] 95:2; 100:4, 5) Ema balu halo orasaun ba Maromak Jeová tanba atu husu deʼit buat ruma.  Maibé Jeová kontente tebes se ita mós fó agradese ba nia kona-ba buat neʼebé nia halo ona mai ita. Iha Bíblia laran, ita bele lee kona-ba Maromak nia atan barak hanesan Ana no Ezekias, neʼebé fó agradese ba Jeová iha sira-nia orasaun. (1 Samuel 2:1-10; Isaías [Yesaya] 38:9-20) Nuneʼe, banati-tuir sira-nia ezemplu diʼak hodi fó agradese ba Jeová iha ita-nia orasaun. (1 Tesalónika 5:17, 18) Tanba se Ita halo nuneʼe, Ita sei sente kmaan, Ita-nia domin ba Jeová sei sai buras liután, no Ita sei hakbesik ba nia nafatin nuʼudar ninia belun.—Tiago 4:8.

8. Saida mak bele halo ita la hafolin tan bensaun sira husi Jeová?

⁸ Se ita la kuidadu, karik ita la sente tan agradese ba Jeová nia bensaun sira. Tanbasá? Tanba ita ema sala-naʼin no ita simu hahalok neʼe husi ita-nia inan-aman primeiru. Maromak Jeová fó ba Adão no Eva jardín furak atu sai sira-nia hela-fatin no nia fó ba sira buat hotu neʼebé sira presiza. Tuir loloos, sira bele moris ba nafatin iha dame laran. (Gênesis [Kejadian] 1:28) Maibé sira la hafolin bensaun sira-neʼe. Sira kaan-teen no la hatene agradese. Ikusmai, sira lakon bensaun hotu. (Gênesis [Kejadian] 3:6, 7, 17-19) Ohin loron, tanba ita moris iha mundu neʼebé ema barak la hatene fó agradese, karik ita mós sei la hafolin tan buat hotu neʼebé Jeová fó mai ita, hanesan ita-nia relasaun diʼak ho nia, no ita-nia priviléjiu hodi sai parte ba família kristaun sira iha mundu tomak. Karik ita mós komesa atu hanoin liu kona-ba buat mundu neʼe nian. (1 João 2:15-17) Atu ita la sai hanesan neʼe, ita presiza hanoin kleʼan kona-ba bensaun sira husi Jeová, no fó agradese beibeik tanba ita mak Jeová nia povu.—Lee Salmo (Mazmur) 27:4. *

9. Bainhira ita hasoru susar sira, tanbasá mak ita presiza hanoin didiʼak ita-nia bensaun sira?

⁹ Se ita agradese nafatin, neʼe sei ajuda ita  tahan susar boot sira. Karik ita sente laran-susar tebes tanba ita-nia situasaun moris nian troka derrepente deʼit. Porezemplu karik ita-nia kaben la hatudu laran-metin ona ba ita, ka ita hetan moras todan, ita-nia família ruma mate, ka dezastre naturais kona ita. Maibé hanoin didiʼak kona-ba bensaun sira husi Jeová sei fó kmaan no forsa ba ita atu tahan, hanesan esperiénsia sira tuirmai hatudu.

10. Tanba Rina hanoin didiʼak kona-ba ninia bensaun sira, oinsá mak ida-neʼe ajuda nia?

¹⁰ Rina * mak pioneiru regulár husi Estadus Unidus. Nia kaben ho katuas kongregasaun ida maibé nia la hatudu laran-metin ba Rina no sira-nia oan sira. Saida mak ajuda Rina atu la husik Jeová iha ninia tempu susar neʼe? Rina hatete: “Haʼu agradese tebes tanba Jeová hanoin no tau matan haʼu. Loroloron haʼu fó obrigadu ba bensaun hotu iha haʼu-nia moris. Jeová hatene no hadomi haʼu, no ida-neʼe mak buat neʼebé espesiál tebes. Haʼu fiar Jeová sei nunka husik haʼu.” Maski Rina hasoru susar barak iha ninia moris, maibé nia bele tahan nafatin no anima fali ema seluk tanba nia hatudu agradese nafatin.

11. Saida mak ajuda Hana atu tahan moras todan?

¹¹ Irmán ida naran Hana hela iha rai-Ásia no pioneiru hamutuk ho ninia laʼen ba tinan 20 liu. Derrepente nia kona kankru iha pulmaun no doutór sira dehan nia bele moris tahan toʼo fulan tolu ka neen deʼit. Hana ho ninia laʼen, uluk hasoru susar oioin, maibé nunka hasoru susar kona-ba sira-nia saúde. Hana hatete: “Haʼu-nia moras neʼe halo haʼu laran-susar tebes. Haʼu sente haʼu lakon buat hotu no haʼu taʼuk tebes.” Saida mak ajuda Hana atu tahan? Nia hatete: “Kalan-kalan, antes haʼu atu toba, haʼu saʼe ba uma kakuluk no reza ho lian makaʼas kona-ba buat lima neʼebé haʼu hafolin husi loron neʼe. Halo tiha ida-neʼe, haʼu sente kmaan, no haʼu bele hatoʼo haʼu-nia domin ba Jeová.” Reza ba Jeová kalan-kalan hanesan neʼe ajuda Hana ka lae? Nia hatete: “Agora haʼu fiar duni katak Jeová ajuda ita atu tahan durante ita-nia tempu susar, no tuir loloos bensaun sira neʼebé ita simu husi Jeová mak barak liu fali susar sira.”

12. Bainhira Jason nia feen mate, saida mak halo nia hetan kmaan fali?

¹² Jason serbí iha sukursál iha rai-Áfrika, nia halo serbisu tempu-tomak ba Jeová ba tinan 30 liu ona. Nia hatete: “Haʼu-nia feen mate iha tinan hitu ona, no dala ruma haʼu sente haʼu mout iha haʼu-nia triste. Se haʼu hanoin kona-ba terus neʼebé nia hasoru hodi luta hasoru moras kankru, haʼu sai laran-tun tebes.” Saida mak ajuda Jason? Nia hatete: “Loron ida haʼu hanoin fila fali kona-ba tempu diʼak ida neʼebé ami hamutuk. Haʼu fó obrigadu ba Jeová ba memória neʼe no haʼu sente kmaan uitoan. Husi tempu neʼe, haʼu komesa fó obrigadu beibeik ba Jeová tanba haʼu bele hanoin-hetan fali tempu furak sira-neʼe. Maski haʼu-nia laran nafatin triste tanba haʼu lakon haʼu-nia feen, maibé haʼu bele iha hanoin neʼebé pozitivu. Neʼe tanba haʼu fó agradese ba Jeová ba haʼu-nia moris kaben nian neʼebé diʼak, no tanba uluk haʼu bele serbí hamutuk ho ema neʼebé hadomi tebes Jeová.”

13. Saida mak ajuda Sheril tahan bainhira nia lakon ninia família?

¹³ Iha tinan 2013 anin no udan boot ida naran Haiyan kona rai-Filipinas. Sheril neʼebé tinan 13 hatete: “Haʼu lakon haʼu-nia família no ami-nia uma.” Ninia apá, amá no alin naʼin-tolu mate tanba bee lori sira. Saida mak ajuda Sheril atu tahan dezastre neʼe hodi la sente laran-kanek?  Sheril nafatin agradese ba Jeová tanba nia hanoin didiʼak kona-ba ninia bensaun sira. Nia hatete: “Haʼu haree oinsá irmaun-irmán sira fó kmaan no anima sira neʼebé presiza ajuda. No haʼu hatene haʼu-nia maluk sira iha mundu tomak temi haʼu iha sira-nia orasaun.” Nia hatutan tan: “Haʼu agradese tebes tanba Jeová mak haʼu-nia Maromak. Nia sempre fó buat neʼebé ita presiza.” Neʼe loos duni, bainhira ita hatudu agradese ba buat diʼak neʼebé ita simu, ita sei la sente laran-tun demais no ita bele tahan hasoru ita-nia susar sira.—Éfeso 5:20; lee Filipe 4:6, 7.

14. Ita iha esperansa furak saida? (Haree dezeñu iha pájina 8.)

¹⁴ Husi uluk toʼo agora, Jeová nia povu sempre hatudu agradese ba bensaun sira neʼebé Jeová fó. Porezemplu, bainhira ema Izraél sira hetan salvasaun husi liurai Ejitu nian iha Tasi Mean, sira kanta ho haksolok ba Jeová hodi fó agradese ba nia. (Êxodo [Keluaran] 15:1-21) Ohin loron, bensaun furak ida neʼebé ita iha mak esperansa katak aban-bainrua sei la iha tan buat ida atu halo ita tanis. (Salmo [Mazmur] 37:9-11; Isaías [Yesaya] 25:8; 33:24) Hanoin toʼok oinsá ita sei sente, bainhira Jeová halakon ninia inimigu hotu no lori ita tama ba mundu foun neʼebé nakonu ho dame no justisa. Iha loron neʼe ita sei fó agradese liután ba Jeová!—Apokalipse 20:1-3; 21:3, 4.

15. Saida mak Ita hakarak halo iha tinan 2015?

¹⁵ Durante tinan 2015, ita sei simu bensaun barak tan husi Jeová. No maski ita mós sei hasoru susar balu maibé Jeová sei nunka husik ita. (Deuteronômio [Ulangan] 31:8; Salmo [Mazmur] 9:9, 10) Jeová sempre fó buat neʼebé ita presiza hodi adora nia ho laran-metin. Mai ita iha hanoin hanesan ho profeta Habacuc nia liafuan neʼebé dehan: “Maski ai-figeira la fó fuan tan, no uvas hun la fó tan fuan, no ai-oliveira la fó tan rezultadu diʼak, no toʼos sira la fó tan ai-han; bibi sira la iha luhan, no la iha tan luhan ba animál sira; maibé ba haʼu, haʼu sei haksolok iha Jeová; haʼu sei haksolok iha Maromak haʼu-nia salvasaun nian.” (Habacuque [Habakuk] 3:17, 18) Durante tinan ida-neʼe, mai ita kontinua hanoin nafatin kona-ba ita-nia bensaun sira hotu no halo tuir eskritura ba tinan 2015 nian: “Fó agradese ba Jeová, tanba nia mak diʼak.”—Salmo (Mazmur) 106:1.