Harii moris família nian neʼebé metin no solok
“Se laʼós Jeová mak harii uma neʼe, badain serbisu makaʼas mós saugati deʼit”.—SALMO (MAZMUR) 127:1a.
1-3. Susar saida deʼit mak kaben-naʼin sira hasoru? (Haree dezeñu iha leten.)
LAʼEN ida kaben ho kontente ba tinan 38 ona koʼalia hanesan neʼe: “Se ita hakaʼas an no hatudu katak ita hakarak ita-nia moris kaben nian kontente, Jeová mós sei fó bensaun ba moris kaben neʼe.” Loos duni, feen ho laʼen bele moris kontente hamutuk no apoia malu iha tempu susar hotu.—Provérbios (Amsal) 18:22.
2 Se problema ruma mosu iha moris kaben nian, keta hakfodak, moris mak hanesan neʼe duni. Tanba Bíblia fó-hatene nanis katak “sira neʼebé kaben sei hetan susar iha sira-nia isin”. (1 Korinto 7:28) Tanbasá mak Bíblia koʼalia hanesan neʼe? Tanba problema loroloron nian bele koko moris kaben nian. No tanba nuʼudar kriatura sala-naʼin, feen-laʼen mós dala ruma hakanek malu, la komprende malu, ka koʼalia liafuan sira neʼebé la hanoin uluk. (Tiago 3:2, 5, 8) Feen-laʼen balu, tanba serbisu fó todan no presiza mós tau matan ba oan, buat sira-neʼe halo sira estrese no kolen. Ida-neʼe halo susar ba sira atu bele buka tempu hametin sira-nia moris kaben nian. Problema ho osan, moras ka susar seluk mós bele neineik-neineik han menus sira-nia domin ba malu no sira-nia respeitu ba malu. Kaben balu, maski haree hanesan metin tebes, maibé ikusmai “isin nia hahalok sira” mak estraga fali sira, hanesan sala-foʼer, hahalok neʼebé la iha moe, odi malu, istori malu, laran-moras ba malu, sai hirus, buka atu manán deʼit, no haketak malu.—Galásia 5:19-21.
3 Buat neʼebé aat liután mak ema iha “loron ikus” sira-neʼe hanoin deʼit sira-nia an rasik no la hatudu respeitu ba Maromak. Hahalok hanesan neʼe mós bele halo moris kaben nian sai moruk. (2 Timóteo 3:1-4) Aumenta tan ho Satanás neʼebé hakarak tebes atu estraga moris kaben nian, neʼe halo susar tebes ba umakain ida atu hamriik metin. Nuneʼe mak apóstolu Pedro fó avizu mai ita: “Imi-nia inimigu, katak Diabu, laʼo bá-mai hanesan leaun ida neʼebé hasai lian makaʼas no buka atu han ema ruma.”—1 Pedro 5:8; Apokalipse 12:12.
4. Tanbasá mak ita bele fiar katak bele iha moris kaben neʼebé metin no solok?
4 Laʼen ida husi Japaun dehan nuneʼe: “Osan halo haʼu estrese tebes. No tanba haʼu la koʼalia didiʼak ba haʼu-nia feen, nia mós sai estrese tebes. Aumenta tan ho foin daudauk nia moras todan, dala ruma tanba buat sira-neʼe, ami naʼin-rua sai hirus malu.” Loos, susar bele mosu iha moris kaben nian, maibé neʼe la dehan katak ai-moruk la iha ona. Ho Jeová nia ajuda, kaben-naʼin bele harii moris kaben nian neʼebé metin no iha relasaun neʼebé solok. (Lee Salmo [Mazmur] 127:1. *) Harii moris kaben nian hanesan deʼit ho harii uma ida. Agora, mai ita koʼalia hamutuk kona-ba dalan lima atu oinsá bele harii moris kaben neʼebé metin no dura ba nafatin. No haree toʼok oinsá mak simente domin nian bele reboka metin moris kaben nian.
ENVOLVE JEOVÁ IHA MORIS KABEN NIAN
5, 6. Feen-laʼen sira bele halo saida deʼit hodi envolve Jeová iha moris kaben nian?
5 Dalan importante liu atu iha moris kaben neʼebé dura no solok mak laran-metin ba Jeová no halo tuir nia. (Lee Eclesiastes [Pengkhotbah] 4:12. *) Feen-laʼen ida hatudu katak sira mós hakarak envolve Jeová iha sira-nia moris kaben nian liuhusi halo tuir Maromak nia matadalan. Bíblia hatete: “Se ó lakon dalan no laʼo sees ba karuk ka ba loos, ó sei rona lian ida husi ó-nia kotuk dehan: ‘Dalan mak neʼe. Laʼo tuir bá.’” (Isaías [Yesaya] 30:20, 21) Se feen-laʼen lee Bíblia hamutuk, neʼe mak dalan sira “rona” ba Jeová nia liafuan. (Salmo [Mazmur] 1:1-3) Sira-nia kaben bele sai metin liután se sira la falta halaʼo adorasaun família neʼebé solok no hametin malu. No kuandu sira halo orasaun hamutuk loroloron, sira bele harii moris kaben neʼebé metin hodi hasoru Satanás nia mundu.
Halaʼo atividade espirituál hamutuk bele hametin relasaun ho Jeová no relasaun ho malu hodi kria umakain neʼebé metin no solok (Haree parágrafu 5, 6)
6 Gerhard husi rai-Alemaña hatete: “Iha tempu neʼebé ami la kontente ba malu tanba problema ruma ka sala komprende malu, konsellu husi Bíblia sempre ajuda ami hodi pasiénsia ba malu no fó perdua ba malu. Hatudu hahalok rua neʼe importante tebes hodi halaʼo moris kaben nian neʼebé susesu.” Se feen-laʼen sira mak hakaʼas an hodi envolve Maromak iha sira-nia moris hodi halaʼo atividade espirituál nian hamutuk, sira-nia relasaun ho Jeová no ba malu mós sei kesi metin hamutuk.
LAʼEN HATUDU DOMIN NUʼUDAR FAMÍLIA NIA ULUN
7. Laʼen tenkesér trata feen iha dalan oinsá?
7 Dalan neʼebé laʼen ida halaʼo ninia knaar nuʼudar ulun mós bele harii moris kaben neʼebé metin no kontente. Bíblia dehan: “Mane ida-idak nia ulun mak Kristu, no feto nia ulun mak mane.” (1 Korinto 11:3) Neʼe katak sá? Neʼe katak laʼen tenkesér trata ninia feen hanesan dalan neʼebé Jesus trata ninia dixípulu sira. Jesus nunka hakaʼas ka siʼak sira. Nia sempre hatudu domin, laran-diʼak, la ulun toos, laran-maus no haraik-an ba sira.—Mateus 11:28-30.
8. Oinsá mak laʼen bele halo feen hadomi no respeitu sira?
8 Hanesan Kristu, laʼen sira la presiza hakaʼas feen atu hatudu respeitu ba sira. Maibé laʼen mak presiza fali ‘kontinua moris ho sira-nia feen hodi komprende sira ho didiʼak. Hatudu respeitu ba sira nuʼudar sanan-rai neʼebé fraku liu’. (1 Pedro 3:7) Atu iha ema nia oin ka iha uma laran, laʼen tenkesér uza liafuan neʼebé respeitu no mamar. Se laʼen trata feen iha dalan hanesan neʼe, sira hatudu katak feen mak folin boot tebes ba sira-nia moris. (Provérbios [Amsal] 31:28) Kuandu laʼen trata feen ho domin, feen mós sei hadomi fali laʼen no hatudu respeitu. Jeová mós sei haraik bensaun ba sira-nia moris kaben nian.
FEEN NEʼEBÉ HAKRUʼUK AN NO HARAIK-AN
9. Oinsá mak feen bele hatudu katak nia ema haraik-an?
9 Domin ba Jeová husi laran bele ajuda ita haraik an ba Maromak kbiit-naʼin nia liman. (1 Pedro 5:6) Dalan importante ida oinsá feen bele hatudu respeitu ba Jeová nia kbiit ka autoridade mak liuhusi serbisu hamutuk ka apoia laʼen. Bíblia hatete: “Imi feen sira, hakruʼuk an ba imi-nia laʼen, tanba neʼe mak buat neʼebé diʼak iha Naʼi.” (Koloso 3:18) Dala ruma karik feen la gosta desizaun neʼebé laʼen halo. Maibé, se laʼen nia desizaun mak la kontra Maromak nia ukun-fuan ruma, feen neʼebé haraik-an hakarak hakruʼuk an hodi apoia laʼen nia desizaun neʼe.—1 Pedro 3:1.
10. Tanbasá mak hakruʼuk an ho domin importante ba feen?
10 Iha umakain ida, Jeová fó knaar folin boot ida ba feen. Neʼe mak atu sai laʼen nia “pár”. (Malaquias [Maleakhi] 2:14) Bainhira halo família nia desizaun hamutuk, feen bele fó sai ninia hanoin no sentimentu ho respeitu. Maibé nia presiza nafatin hakruʼuk ba ninia laʼen. Laʼen mós presiza rona didiʼak ba buat neʼebé feen hatoʼo. (Provérbios [Amsal] 31:10-31) Hakruʼuk an ba laʼen ho domin bele lori solok, dame, no hakmatek ba família. Ikusmai feen ho laʼen bele sente kontente hamutuk tanba sira hatene katak buat neʼebé sira halo fó solok ba Maromak.—Éfeso 5:22.
KONTINUA FÓ PERDUA BA MALU HO LARAN TOMAK
11. Tanbasá mak importante atu fó perdua ba malu?
11 Atu harii moris kaben neʼebé dura, feen ho laʼen tenkesér hatene oinsá atu fó perdua ba malu. Se sira “kontinua hatudu pasiénsia ba malu no fó perdua ba malu ho laran tomak”, sira-nia relasaun mós sei sai metin liután. (Koloso 3:13) Maibé, se feen-laʼen mak sempre keʼe sai sala ida-idak nian hodi uza fali hanesan kartús hodi ataka malu, neʼe sei halo fraku sira-nia moris kaben nian. Ita bele kompara neʼe hanesan ho didin lolon neʼebé nakfera, kuak sira-neʼe bele halo uma ida sai fraku. Laran-kanek ka hirus iha laran bele halo susar ba feen ho laʼen atu fó perdua ba malu ka apoia malu. Maibé, se sira mak fó perdua ba malu hanesan mós Jeová perdua sira-nia sala, sira-nia moris kaben nian mós sei sai metin.—Miquéias (Mikha) 7:18, 19.
12. Domin “taka sala barak” katak sá?
12 Domin neʼebé loos “la hanoin fali buat aat neʼebé nia simu”, maibé “taka sala barak”. (1 Korinto 13:4, 5; lee 1 Pedro 4:8.) Domin la haree ba dala hirak mak ita bele fó perdua ba malu. Hodi nuneʼe mak bainhira apóstolu Pedro husu dala hira mak nia presiza fó perdua ba ema ida, Jesus hatán ba nia: “Toʼo dala hitunulu-resin-hitu.” (Mateus 18:21, 22) Jesus nia liafuan katak sá? Nia hatete katak ba ema kristaun ida, ema halo sala dala hira mós ita tenke nafatin fó perdua ba sira.—Provérbios (Amsal) 10:12. * (Haree nota iha kraik.)
13. Saida mak ita bele halo hodi fasil atu fó perdua ba malu?
13 Annette husi rai-Alemaña hatete: “Se feen-laʼen lakohi perdua malu, neʼe bele halo sira odi no deskonfia malu beibeik. Hahalok hanesan neʼe bele halo moruk sira-nia moris kaben nian. Fó perdua ba malu bele hametin relasaun no halo ita hakbesik ba malu.” Buka oportunidade atu fó sai agradesimentu ba malu. Gaba buat diʼak sira neʼebé ita-nia kaben halo. Se halo hanesan neʼe, fasil liu atu fó perdua ba malu. (Koloso 3:15) Ikusmai ita mós bele iha dame, unidade, no Maromak nia bensaun.—Roma 14:19.
HALO TUIR UKUN-FUAN OSAN-MEAN
14, 15. Saida mak Ukun-Fuan Osan-Mean, no oinsá mak ukun-fuan neʼe bele hametin moris kaben nian?
14 Ita hotu hakarak ema trata ita ho respeitu no dignidade. Ita gosta ema rona ita no hanoin kona-ba ita-nia sentimentu. Maibé, uluk ita rona ona ema koʼalia hanesan neʼe ka lae? “Haʼu sei selu fali ba nia buat neʼebé nia uluk halo mai haʼu.” Dala ruma ita komprende tansá mak ema koʼalia nuneʼe. Maibé Bíblia dehan: “Keta hatete: ‘Haʼu sei halo fali buat neʼebé nia halo mai haʼu.’” (Provérbios [Amsal] 24:29) Jesus hanorin dalan diʼak ida atu rezolve problema. Ninia liafuan neʼe ema bolu nuʼudar Ukun-Fuan Osan-Mean. Nia hatete: “Buat neʼebé imi hakarak ema halo ba imi, halo mós nuneʼe ba sira.” (Lucas 6:31) Jesus hatete katak ita tenke trata ema seluk hanesan mós ita hakarak oinsá ema seluk trata ita, laʼós atu selu fali aat ho aat. Neʼe dehan katak se ita hakarak ita-nia kaben trata ita ho diʼak, ita mós tenke trata nia ho diʼak.
15 Relasaun kaben nian sei sai metin liután se feen-laʼen hanoin kona-ba sira ida-idak nia sentimentu. Laʼen ida husi Áfrika Súl hatete: “Ami sempre halo tuir Ukun-Fuan Osan-Mean nian. Dala ruma ami hirus malu, maibé ami sempre hakaʼas an hodi hatudu hahalok diʼak ba malu iha dalan neʼebé ami mós hakarak ema halo mai ami. Neʼe mak respeitu malu no hanoin ida-idak nia dignidade.”
16. Saida mak feen no laʼen sei nunka bele halo ba malu?
16 Labele konta ita nia kaben nia fraku sira ba ema seluk ka sempre tara hela iha ita-nia ibun toman aat balu husi ita-nia kaben neʼebé ita la gosta. Uza buat sira-neʼe hodi koʼalia halimar deʼit mós labele. Tenke komprende katak iha kaben laran, laʼós atu taru sé mak forsa liu, ka sé mak hakilar makaʼas liu, ka se mak bele koʼalia liafuan neʼebé moruk liu. Ita hatene katak ita hotu ema sala-naʼin no dala ruma ita halo ema seluk hirus, maibé neʼe la fó lisensa ba feen ka laʼen atu hamoe malu ka uza liafuan moruk ba malu, aat liu se sira dudu ka baku malu.—Lee Provérbios (Amsal) 17:27; * 31:26. *
17. Oinsá mak laʼen bele moris tuir Ukun-Fuan Osan-Mean nian?
17 Iha kultura balu, ema hanoin katak se laʼen ida mak hanehan ka baku ninia feen, laʼen neʼe mak mane duni. Maibé Bíblia hatete: “Ema neʼebé la hirus lalais mak diʼak liu fali mane forte ida, no ema neʼebé kontrola ninia nervozu diʼak liu fali ema neʼebé hadau sidade ida.” (Provérbios [Amsal] 16:32) Atu bele kontrola an hanesan Jesus Kristu, presiza duni mentál neʼebé forte. Mane ida neʼebé tolok ka baku feen, nia laʼós mane, nia rasik sei hakotu ninia relasaun ho Jeová. David, mane ida neʼebé forte no brani hatete hanesan neʼe iha Salmo: “Sai hirus, maibé keta halo sala. Koʼalia deʼit iha imi-nia laran, iha imi-nia toba-fatin, no nonook deʼit bá.”—Salmo (Mazmur) 4:4.
“TAU DOMIN NUʼUDAR IMI-NIA HATAIS”
18. Tanbasá importante atu haburas nafatin domin?
18 Lee 1 Korinto 13:4-7. Domin mak hahalok importante liu hotu iha moris kaben nian. Eskritura hatete: “Tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia. Iha buat sira-neʼe hotu nia leten, tau domin nuʼudar imi-nia hatais, tanba domin mak kesi ita hamutuk iha dalan neʼebé kompletu.” (Koloso 3:12, 14) Domin hanesan Kristu nian mak hanesan simente neʼebé kaer metin kaben-naʼin hamutuk. Se kaben laran mak iha domin, atu toman aat ruma, moras ruma, problema ho osan, ka problema ho banin sira mós sei la sobu umakain neʼe.
19, 20. (a) Oinsá mak kaben-naʼin sira bele halaʼo moris kaben nian neʼebé metin no solok? (b) Iha lisaun tuirmai ita atu koʼalia kona-ba saida?
19 Atu halaʼo moris kaben nian neʼebé susesu, presiza hakaʼas an, hatudu domin, no promete ba malu hodi laran-metin ba malu. Bainhira problema ruma mosu, duké foti liman kedas, feen-laʼen tenkesér hakaʼas an hodi hametin no haburas sira-nia relasaun nafatin. Se feen-laʼen mak hadomi Jeová no hadomi malu, bainhira problema ida mosu, sira hakarak rezolve problema neʼe ho domin, tanba “domin nunka lakon”.—1 Korinto 13:8; Mateus 19:5, 6; Ebreu 13:4.
20 Susar tebes atu harii moris kaben neʼebé metin no solok, liuliu “iha loron ikus” sira-neʼe. (2 Timóteo 3:1) Maibé ho Jeová nia ajuda, buat hotu bele deʼit. Maski nuneʼe, kaben-naʼin mós presiza luta hasoru mundu nia hanoin kona-ba seks. Iha lisaun tuirmai, ita sei koʼalia kona-ba oinsá mak feen ka laʼen bele hamriik metin hanesan moru hodi hahalok la morál la bele halo sira monu.
^ par. 4 Salmo 127:1: “Se laʼós Jeová mak harii uma neʼe, badain serbisu makaʼas mós saugati deʼit. Se laʼós Jeová mak hein sidade neʼe, guarda matan-moris mós saugati deʼit.”
^ par. 5 Eclesiastes 4:12: “No se ema ida bele manán hasoru ida deʼit, naʼin-rua hamutuk bele hamriik hasoru nia. No tali tolu neʼebé bobar hamutuk la bele kotu lalais.”
^ par. 12 Kaben-naʼin koko atu fó perdua ba malu no buka dalan atu rezolve sira-nia problema, maibé Bíblia dehan katak kona-ba sala-foʼer, feen ka laʼen ida iha direitu atu hili bele fó perdua ka soe malu deʼit ho ninia kaben neʼebé toba ona ho ema seluk. (Mateus 19:9) Haree informasaun kona-ba “Pandangan Alkitab: Perzinaan—Mengampuni atau Tidak Mengampuni?” iha Sedarlah! 8 Agostu 1995, no livru “Hela Nafatin iha Maromak nia Domin”, apéndise iha pájina 219-221, “Bíblia nia haree kona-ba soe-malu no haketak-malu”.
^ par. 16 Provérbios 17:27: “Ema neʼebé tahan ninia liafuan iha koñesimentu, no ema neʼebé matenek iha hahalok hakmatek.”
^ par. 16 Provérbios 31:26: “Nia loke nia ibun hodi koʼalia buat neʼebé matenek, no nia nanál sempre koʼalia ho laran-diʼak neʼebé nakonu ho domin.”
