BAINHIRA Anita * sai Testemuña ba Jeová, ninia laʼen komesa atu kontra nia. (Haree nota iha kraik.) Nia hanetik Anita hodi tuir reuniaun no bandu nia atu la bele temi Maromak nia naran. Se nia rona nia feen temi naran Jeová, nia sai hirus tebes.

Atu ajuda ninia oan sira aprende kona-ba Jeová mós susar tanba nia laʼen lakohi Anita lori sira bá tuir reuniaun. Tan neʼe, nia presiza hanorin sira subasubar hodi nia laʼen la hatene.

Husi Anita nia esperiénsia ita hatene katak ita-nia família ruma karik sei koko hapara ita atu serbí Jeová. Karik ita mós bele hasoru problema seluk, hanesan moras todan, ita-nia oan ka kaben mak mate, ka ita-nia família ruma husik tiha Jeová. Se ita hasoru situasaun hanesan neʼe, saida mak ita presiza halo atu laran-metin nafatin ba Jeová?

Apóstolu Paulo hatete: “Imi presiza atu tahan.” (Ebreu 10:36) Se nuneʼe, saida mak bele ajuda ita atu tahan?

Dalan importante ida atu tahan hasoru terus mak sadere ba Jeová liuhusi orasaun. Irmán ida naran Ana halo hanesan neʼe. Nia ho ninia laʼen kaben ba tinan 30 ona. Maibé loron ida ninia laʼen mate derrepente. Nia bá serbisu maibé nunka fila uma. Nia tinan 52.

Ana okupadu tebes ho ninia serbisu, maibé neʼe la halakon ninia triste. Saida mak ajuda nia? Nia hatete: “Haʼu fó sai haʼu-nia sentimentu hotu ba Jeová no husu nia atu ajuda haʼu.” Nia hatene Jeová ajuda nia tanba halo tiha orasaun, nia sente hakmatek no dame iha laran. Nia hatete: “Haʼu la iha dúvida katak Jeová sei fó moris-hiʼas ba haʼu-nia laʼen iha mundu foun.”—Filipe 4:6, 7.

Jeová, Ida neʼebé rona orasaun promete katak nia sei fó ba ninia atan sira buat neʼebé sira presiza atu serbí nia. (Salmo [Mazmur] 65:2) Hodi hatene ida-neʼe sei ajuda ita atu laran-metin nafatin, maski ita hasoru situasaun neʼebé susar.

Iha buat seluk tan neʼebé Jeová fó atu ajuda ita tahan bainhira hasoru susar. Neʼe mak ita-nia irmaun-irmán sira iha kongregasaun. Iha apóstolu sira-nia tempu, kongregasaun iha Tesalónika hasoru terus barak. Tan neʼe apóstolu Paulo hatete ba ema kristaun sira-neʼe: “Kontinua fó aten-brani ba malu no hametin malu, hanesan imi halo daudaun ona.” (1 Tesalónika 2:14; 5:11) Hodi halibur hamutuk no hatudu domin ba malu, sira ajuda sira-nia maluk atu laran-metin nafatin ba Jeová. Oinsá mak ita bele banati-tuir sira-nia ezemplu?

Iha tempu susar sira, ita mós presiza sai belun ho irmaun-irmán sira iha kongregasaun no “hametin malu”. (Roma 14:19) Apóstolu Paulo hasoru terus barak iha ninia moris, maibé Jeová ajuda nia atu tahan. Dala barak, Jeová fó ajuda neʼe liuhusi Paulo nia maluk fiar-naʼin sira. Kona-ba ninia belun sira-neʼe, nia hatete: “Sira fó kmaan mai haʼu.” (Koloso 4:10, 11) Tanba sira hadomi tebes Paulo, neʼe book sira atu ajuda no anima nia bainhira nia presiza ajuda. Karik Ita mós sei hanoin-hetan kona-ba tempu neʼebé irmaun-irmán sira hatete ka halo ona buat ruma hodi ajuda Ita iha dalan hanesan neʼe.

Jeová mós fó mai ita katuas kongregasaun sira. Irmaun sira-neʼe sai “hanesan subar-fatin husi anin no fatin seguru husi udan boot, hanesan bee neʼebé suli iha rai-maran, hanesan fatuk boot nia mahon iha rai neʼebé maran”. (Isaías [Yesaya] 32:2) Se ita hasoru problema ruma, aproveita arranju neʼe hodi bá buka koʼalia ho katuas sira. Irmaun sira-neʼe sempre prontu atu ajuda hodi ita bele serbí nafatin Jeová.

Katuas sira mós ema sala-naʼin, tan neʼe sira la bele rezolve ita-nia problema hotu. (Apóstolu 14:15) Maibé bainhira sira halo orasaun ba ita, neʼe bele ajuda ita sente diʼak liu. (Tiago 5:14, 15) Porezemplu iha rai-Itália, iha irmaun ida neʼebé tahan ba tinan barak ona ho moras todan ida. Kona-ba katuas kongregasaun sira, nia hatete: “Irmaun sira-neʼe vizita haʼu no hatudu domin mai haʼu. Tanba sira mak haʼu bele tahan.” Se Ita mós hasoru susar ruma, Jeová hakarak Ita buka ajuda husi katuas sira.

Se ita tau fokus nafatin ba atu serbí Jeová, ita sei haree oinsá Jeová ajuda ita atu tahan. Ezemplu husi João hatudu ida-neʼe. Bainhira nia tinan 39, nia hetan moras kankru. Nia sente neʼe la justisa tanba nia seidauk idade liu. Nia mós hanoin barak kona-ba ninia feen no oan-mane tinan tolu. Nia hatete: “Haʼu-nia feen tenke tau matan ba haʼu, ami-nia oan, no nia mós presiza ajuda lori haʼu beibeik ba doutór.” Tanba tratamentu neʼebé nia simu, João sente kole beibeik no estómagu moras. Liután neʼe, João nia aman mós moras todan no presiza ema ruma tau matan ba nia.

Saida mak ajuda João no ninia família? Maski João sempre kole, maibé nia ho ninia família la husik sira-nia atividade espirituál nian. Nia hatete: “Ami tuir reuniaun sira hotu, bá haklaken semana-semana, no halaʼo nafatin adorasaun família nian, maski dala ruma susar ba ami atu halo nuneʼe.” João hatene katak importante tebes ninia relasaun ho Jeová sempre metin nafatin. Nia hatete katak maski foufoun nia hanoin barak, maibé lakleur nia sente kmaan tanba nia hatene Jeová hadomi nia no fó forsa ba nia. Jeová mós bele ajuda ita hanesan neʼe. João hatete: “Jeová bele ajuda Ita tahan, hanesan nia halo ona ba haʼu.”

Bainhira hasoru susar sira, hanoin nafatin apóstolu Paulo nia liafuan: “Imi presiza atu tahan.” Sadere ba Jeová liuhusi orasaun, sai besik nafatin ba ita-nia maluk sira iha kongregasaun, husu ajuda husi katuas sira, no kaer metin ba ita-nia atividade espirituál nian. Hanesan neʼe, Jeová sei ajuda ita ho problema naran deʼit neʼebé ita hasoru agora, ka iha futuru.