Iha dalan saida deʼit mak Jeová hadomi ita?
“Haree bá oinsá Aman nia domin boot tebes ba ita!”—1 JOÃO 3:1.
KNANANUK: 51, 13
1. Apóstolu João nia liafuan book ita atu halo saida, no tanbasá?
APÓSTOLU JOÃO hatete: “Haree bá oinsá Aman nia domin boot tebes ba ita.” (1 João 3:1) Liafuan neʼe book duni ita atu hanoin didiʼak kona-ba Jeová nia domin neʼebé boot mai ita. Bainhira ita hanoin didiʼak kona-ba oinsá mak Jeová iha domin neʼebé boot no oinsá mak nia hatudu ninia domin, neʼe sei halo ita hakbesik liután ba nia no hametin liután ita-nia relasaun ho nia.
2. Tanbasá mak ema balu sente susar atu komprende katak Maromak iha domin ba sira?
2 Ba ema balu, susar ba sira atu komprende katak Maromak iha domin ba ema. Tanba tuir sira-nia hatene, Maromak neʼe mak atu taʼuk ka tenke tuir deʼit. No tanba hanorin falsu, ema balu fiar katak Maromak la iha domin no katak ita la bele hadomi nia. Iha mós ema neʼebé mak fiar katak Maromak hadomi ema hotu, ita atu halo saida mós, nia hadomi nafatin ita. Maibé se kuandu ita estuda Bíblia, ita sei hatene didiʼak kona-ba Maromak Jeová. Ita sei hatene katak domin mak ninia hahalok prinsipál no tan ninia domin neʼe mak book nia hodi fó ninia Oan-Mane mesak mate ba ita. (João 3:16; 1 João 4:8) Maibé tanba ita ida-idak moris no boot iha situasaun neʼebé la hanesan, karik neʼe bele halo ita sente la hanesan kona-ba Maromak nia domin.
3. Saida mak bele ajuda ita atu komprende katak Jeová iha domin ba ita?
3 Atu komprende kona-ba Jeová nia domin ba ita, uluknanain ita presiza hatene katak Jeová mak ita-nia Aman no ita mak ninia oan. Nia mak ita-nia Kriadór. (Lee Salmo [Mazmur] 100:3-5. *) Tan neʼe mak Bíblia bolu Adão nuʼudar “Maromak nia oan” ida, no Jesus mós hanorin ninia dixípulu hotu atu bolu Maromak nuʼudar “ami Aman iha lalehan”. (Lucas 3:38; Mateus 6:9) Husi neʼe ita bele hatene katak Jeová mak fó moris ba ita, nia mak ita-nia Aman. Jeová hadomi tebes ita hanesan aman diʼak ida neʼebé hadomi ninia oan.
4. (a) Oinsá mak Jeová la hanesan ho aman ida-idak? (b) Ita sei koʼalia kona-ba saida iha lisaun neʼe no ida tuirmai?
4 Ita hatene katak aman ida iha família ida-idak mak ema sala-naʼin, no maski sira hakaʼas an atu hatudu domin, maibé sira la bele hatudu domin neʼebé perfeitu hanesan Jeová hatudu ninia domin ba ita. Ema balu sei hanoin-hetan oinsá sira-nia apá trata sira iha dalan neʼebé aat husi kiʼik kedas. Buat triste neʼebé sira hasoru halo sira sente kanek no belit hela iha sira-nia neon toʼo ohin loron. Jeová, Aman neʼebé perfeitu nunka trata ninia oan iha dalan hanesan neʼe. (Salmo [Mazmur] 27:10) Jeová hadomi tebes ita ida-idak, nia hanoin ita. Ninia hahalok diʼak sira-neʼe halo ita hakarak tebes atu hakbesik liután ba nia, loos ka lae? (Tiago 4:8) Iha lisaun neʼe ita sei koʼalia kona-ba dalan haat oinsá mak Jeová hatudu ninia domin mai ita, no lisaun tuirmai ita sei haree fali dalan haat oinsá mak ita hatudu katak ita hadomi Jeová.
JEOVÁ TAU MATAN ITA-NIA MORIS HO DOMIN
5. Apóstolu Paulo hatete saida ba ema iha sidade Atenas?
5 Bainhira apóstolu Paulo iha rai-Grésia, nia nota iha sidade Atenas nakonu ho estátua oioin no ema iha neʼebá fiar katak maromak sira-neʼe mak fó moris no tau matan ba sira-nia presiza loroloron nian. Tan neʼe mak Paulo hatete ba sira: “Maromak neʼebé halo mundu no buat hotu neʼebé iha nia, . . . fó moris no fó buat hotu ba ema. . . . Liuhusi nia mak ita hetan moris, book an no iha.” (Apóstolu 17:24, 25, 28) Loos duni, tanba domin mak Jeová fó ita buat hotu neʼebé ita presiza atu moris. Ita bele haree kona-ba buat hirak tuirmai neʼe.
6. Oinsá mak mundu hatudu sai Jeová nia domin? (Haree foto iha pájina 18.)
6 Hanoin toʼok kona-ba ita-nia mundu. Jeová kria mundu neʼe hodi “fó ba ema”. (Salmo [Mazmur] 115:15, 16) Sientista sira uza ona osan barak atu buka tan planeta ida hanesan ita-nia mundu iha espasu-liʼur. Maski sira deskobre ona planeta foun barak, maibé sira seidauk buka-hetan ida neʼebé bele iha moris hanesan mundu. Mundu mak planeta neʼebé úniku tebes, tanba husi planeta hotu neʼebé Jeová kria, só mundu deʼit mak Jeová kria iha dalan neʼebé furak neʼebé ema bele hela! (Isaías [Yesaya] 45:18) Se ita mak tuur hodi hanoin didiʼak ba buat hotu neʼebé Jeová kria fó ba ita, ita bele sente duni Jeová nia domin.—Lee Jó (Ayub) 38:4, 7 *; Salmo (Mazmur) 8:3-5. *
7. Oinsá mak dalan neʼebé Jeová kria ita hatudu katak nia hadomi tebes ita?
7 Maski Jeová kria ona mundu neʼebé furak ba ita, maibé nia hatene katak atu ita bele moris diʼak no kontente, kria deʼit presiza isin nian ba ita seidauk toʼo. Nia mós kria ita ema tuir ninia ilas atu ita bele sente ninia domin no hadomi fali nia. Neʼe hanesan ho oan sira, sira sente kontente se sira hatene katak sira-nia inan-aman hadomi sira. (Gênesis [Kejadian] 1:27) Tan neʼe mak Jesus hatete: “Kontente ba sira neʼebé hatene katak sira presiza Maromak nia matadalan.” (Mateus 5:3) Nuʼudar Aman neʼebé iha domin, Jeová “fó ho laran-luak buat hotu neʼebé halo ita kontente”, presiza isin nian no mós presiza espirituál nian.—1 Timóteo 6:17; Salmo (Mazmur) 145:16.
JEOVÁ HANORIN LIA-LOOS BA ITA HO DOMIN
8. Tanbasá mak ita hakarak Jeová, “Maromak lia-loos nian” hanorin ita?
8 Aman ida-idak hadomi no hakarak proteje sira-nia oan atu ema la bele bosok sira. Maibé iha inan-aman barak ohin loron sente susar atu fó matadalan neʼebé diʼak ba sira-nia oan tanba sira rasik la halo tuir Bíblia nia matadalan sira. No neʼe halo sira-nia oan konfuzaun no triste. (Provérbios [Amsal] 14:12) Jeová la hanesan neʼe, tanba nia mak “Maromak lia-loos nian”. (Salmo [Mazmur] 31:5) Nia hadomi tebes ninia oan hotu no nia sempre kontente atu uza lia-loos hodi hanorin sira oinsá atu halaʼo moris, liuliu dalan atu adora nia. (Lee Salmo [Mazmur] 43:3. *) Entaun, Jeová hanorin lia-loos saida ba ita, no oinsá mak ida-neʼe hatudu katak nia hadomi tebes ita?
Aman kristaun sira halo tuir Jeová nia ezemplu hodi hanorin lia-loos ba sira-nia oan no ajuda sira atu haburas relasaun ho sira-nia Aman iha lalehan (Haree parágrafu 8-10)
9, 10. Oinsá mak Jeová hanorin lia-loos ba ita kona-ba (a) ninia an? (b) ita ema?
9 Primeiru Jeová hanorin lia-loos kona-ba ninia an rasik. Nia fó-hatene ita kona-ba ninia naran rasik, naran neʼebé mosu iha Bíblia barak liu fali naran sira seluk. Liuhusi dalan neʼe mak Jeová fó koñese ninia an no hakbesik ita. (Tiago 4:8) Jeová mós hanorin ita kona-ba ninia hahalok sira hodi ita bele hatene nia mak Maromak hanesan saida. Porezemplu, liuhusi buat hotu neʼebé nia kria, ita bele haree katak nia mak Maromak neʼebé forsa no matenek tebes. No liuhusi Bíblia, nia hanorin ita katak nia mak Maromak neʼebé hadomi justisa no iha domin. (Roma 1:20) Bainhira ita lee Bíblia kona-ba ninia hahalok diʼak sira, neʼe halo fasil ba ita atu hakbesik nia no iha relasaun neʼebé diʼak ho nia.
10 Jeová mós hanorin ita lia-loos kona-ba ema. Nia fó-hatene ita katak nia kria ita ema atu iha dame no unidade nuʼudar família kriatura ida. Bíblia hatete katak Maromak nunka kria ita atubele ukun an no livre husi nia hodi halo desizaun rasik. (Jeremias [Yeremia] 10:23) Hatene lia-loos ida-neʼe importante tebes ba ita-nia moris. Tanba hodi halo tuir deʼit Jeová mak ita bele iha dame no unidade. Jeová hanorin lia-loos sira-neʼe ba ita tanba nia hadomi tebes ita hotu.
11. Jeová promete saida mak hatudu katak nia hanoin no hadomi ita?
11 Aman neʼebé hadomi ninia oan sempre hanoin kona-ba oan sira-nia futuru, nia hakarak sira atu iha moris neʼebé diʼak. Maibé ita sente triste tanba ema barak ohin loron la hatene saida mak sei akontese iha futuru, sira uza sira-nia tempu atu duni buat neʼebé mak lori diʼak ba temporáriu deʼit. (Salmo [Mazmur] 90:10) Nuʼudar Maromak nia oan, ita bele sente katak Jeová hadomi duni ita tanba nia promete futuru furak ida mai ita. Neʼe halo ita sente katak ita-nia moris iha folin boot duni.
JEOVÁ FÓ KONSELLU NO DIXIPLINA BA NINIA OAN
12. Oinsá mak konsellu neʼebé Jeová fó ba Caim no Baruc hatudu katak nia hanoin no hadomi sira?
12 Bainhira Jeová haree Caim atu halo buat neʼebé sei lori perigu ba ninia moris, Jeová fó konsellu ba nia: “Tanbasá ó sai hirus tebes no oin-buis? Se ó fila fali hodi halo buat diʼak, haʼu mós sei simu ó, loos ka lae?” (Gênesis [Kejadian] 4:6, 7) Maibé triste tanba Caim lakohi rona ba Jeová no nia lori terus ba ninia an rasik. (Gênesis [Kejadian] 4:11-13) Buat neʼebé hanesan mós akontese ba Baruc, Jeremias nia sekretáriu. Bainhira Jeová haree katak nia iha hanoin neʼebé sala no komesa sai kole no laran-tun, Jeová fó konsellu ba nia atu ajuda nia troka ninia hahalok sira. Maibé Baruc la hanesan ho Caim. Nia rona ba Jeová nia konsellu no ikusmai neʼe salva duni nia husi mate.—Jeremias (Yeremia) 45:2-5.
13. Tanbasá mak Jeová husik ninia atan sira hasoru terus no susar?
13 Apóstolu Paulo hatete katak: “Jeová fó dixiplina ba sira neʼebé nia hadomi; tuir loloos, nia fó kastigu ba ema ida-idak neʼebé nia simu nuʼudar ninia oan.” (Ebreu 12:6) Dixiplina iha signifika oioin, laʼós kastigu deʼit. Porezemplu, bainhira ita lee Bíblia, ita bele lee kona-ba Maromak nia atan sira bainhira sira hasoru terus ruma, no terus neʼe sai hanesan treinu ida ba sira. Hanoin toʼok kona-ba José, Moisés, no David. Iha sira-nia moris, sira hasoru susar oioin, maibé Bíblia hatete katak iha tempu neʼebé sira hasoru susar, Jeová sempre hamutuk ho sira. Bainhira ita lee kona-ba istória oinsá Jeová ajuda ninia atan sira hasoru susar no terus, no ikusmai nia uza sira atu halaʼo ninia hakarak sira, neʼe halo ita sente katak Jeová hanoin no hadomi duni ninia atan sira.—Lee Provérbios (Amsal) 3:11, 12. *
14. Se ita mak halo sala ruma, oinsá mak ita hatene katak Jeová hadomi nafatin ita?
14 Bainhira Jeová fó dixiplina, neʼe mós hatudu nia iha domin. Porezemplu, bainhira Jeová fó dixiplina ba ema neʼebé halo sala no ema neʼe arrepende husi ninia sala, Jeová sei “fó perdua neʼebé boot tebes” ba ema neʼe. (Isaías [Yesaya] 55:7) Liafuan “fó perdua neʼebé boot tebes” katak sá? Husi David nia liafuan tuirmai neʼe ita bele haree kona-ba Jeová nia perdua neʼebé ho laran-luak neʼe. Nia dehan: “Nia fó perdua ba ó-nia sala hotu, no kura ó-nia moras hotu. Nia salva fali ó-nia moris husi rai-kuak. No tau koroa ba ó ho domin neʼebé laran-metin no ho laran-sadiʼa. Hanesan lorosaʼe dook liu husi loromonu, nuneʼe mós nia tau ita-nia sala dook tebes husi ita.” (Salmo [Mazmur] 103:3, 4, 12) Tan neʼe mak ita tenke rona ba Jeová nia konsellu sira, simu ninia dixiplina, no halo tuir kedas, tanba liuhusi dalan sira-neʼe mak Jeová hatudu ninia domin neʼebé kleʼan ba ita.—Salmo (Mazmur) 30:5.
JEOVÁ PROTEJE ITA
15. Saida mak hatudu katak Jeová nia povu iha folin boot tebes ba nia?
15 Aman neʼebé iha domin hakarak proteje ninia família husi perigu sira. Ita-nia Aman iha lalehan, Jeová mós hakarak halo hanesan neʼe. Ema neʼebé hakerek salmu hatete: “Nia tau matan ba ema laran-metin nia moris, no nia salva sira husi ema aat nia liman.” (Salmo [Mazmur] 97:10) Hanoin toʼok kona-ba ita-nia matan, ita sempre hakarak proteje ita-nia matan tanba matan importante ka folin boot ba ita hotu. Jeová mós haree ita hanesan ninia matan. Tan neʼe mak nia hakarak atu proteje ita.—Lee Zacarias (Zakharia) 2:8. *
16, 17. Konta toʼok oinsá mak Jeová proteje ninia povu iha tempu uluk no ohin loron.
16 Dalan ida neʼebé Jeová proteje ninia povu mak liuhusi anju sira. (Salmo [Mazmur] 91:11) Anju ida deʼit bele oho soldadu naʼin-185.000 hodi salva Jeruzalein husi ema Asíria sira. (2 Reis [Raja-Raja] 19:35) Anju mós salva apóstolu Pedro, Paulo, no ema seluk tan husi komarka laran. (Apóstolu 5:18-20; 12:6-11) Iha ita-nia tempu, Jeová mós fó ajuda ba ninia povu iha dalan neʼebé hanesan. Foin daudauk ita-nia irmaun reprezentante ida husi sede jerál bá vizita sukursál ida iha rai-Áfrika. Uluk, rai neʼe iha konflitu boot polítiku no relijiozu nian. Ema oho malu, lelan sasán, estraga feto sira, no situasaun iha rai neʼe sai aat tebes. Maski ita-nia irmaun-irmán balu lakon hotu sira-nia sasán, maibé la iha irmaun ka irmán ida mak mate. Bainhira husu sira kona-ba sira-nia novidade iha tempu neʼebá, sira dehan: “Ami hotu diʼak, agradese tanba Jeová!” Sira sente duni katak Jeová mak proteje sira.
17 Maski dala ruma Jeová husik inimigu sira oho ninia atan, hanesan Estevão, maibé Jeová sempre proteje ninia povu nuʼudar grupu ida liuhusi fó avizu sira kona-ba Satanás nia lasu sira. (Éfeso 6:10-12) Jeová uza ninia Liafuan no livru sira husi ninia organizasaun hodi fó avizu kona-ba rikusoin nia lohi, hahalok la morál, atividade halimar nian, internét, no buat seluk tan neʼebé bele estraga ita. Buat sira-neʼe hatudu ho momoos katak Jeová mak hanesan Aman neʼebé iha domin, nia hakarak proteje ninia povu sira.
BENSAUN BOOT
18. Ita rasik sente oinsá kona-ba Jeová nia domin ba Ita?
18 Koʼalia tiha dalan balu oinsá Jeová hatudu ninia domin ba ita, ita-nia sentimentu ba Jeová nia domin mak hanesan ho Moisés nian bainhira nia serbí tiha Jeová ba tempu kleur, nia hatete: “Halo haksolok ami ho Ita-nia domin neʼebé ho laran-metin iha dadeer, hodi ami bele haklalak ho kontente no haksolok iha ami-nia moris tomak.” (Salmo [Mazmur] 90:14) Hodi komprende no esperiénsia rasik Jeová nia domin mak bensaun neʼebé boot tebes ba ita ohin loron. Neʼe halo ita fó sai ita-nia sentimentu hanesan apóstolu João nian: “Haree bá oinsá Aman nia domin boot tebes ba ita!”—1 João 3:1.
^ par. 3 Salmo 100:3-5: “3 Hatene bá katak Jeová mak Maromak. Nia mak ida-neʼebé kria ita, no ita mak ninian. Ita mak ninia povu no ninia bibi-lubun. 4 Tama ba ninia portaun ho agradese, tama bá ninia pátiu ho hahiʼi. Fó agradese ba nia, hahiʼi ninia naran. 5 Tanba Jeová mak diʼak, Ninia domin neʼebé ho laran-metin iha ba nafatin, no ninia laran-metin iha husi jerasaun ida toʼo jerasaun seluk.”
^ par. 6 Jó 38:4, 7: “4 Ó iha neʼebé kuandu haʼu tau rai neʼe nia hun? Se ó hanoin ó hatene, fó-hatene haʼu bá.” “7 Bainhira fitun dadeer nian haklalak hamutuk ho haksolok, no Maromak nia oan hotu haklalak hodi hahiʼi nia?”
^ par. 6 Salmo 8:3-5: “3 Kuandu haʼu haree Ita-nia lalehan, buat neʼebé Ita-nia liman mak halo, fulan no fitun sira neʼebé Ita prepara, 4 sé mak ema atu Ita hanoin-hetan nia, no sé mak ema nia oan hodi Ita tau matan ba nia? 5 Ita halo nia sai kiʼik liu fali anju sira, no Ita fó glória no kbiit nuʼudar koroa ba nia.”
^ par. 8 Salmo 43:3: “Haruka Ita-nia naroman no Ita-nia lia-loos. Husik buat sira-neʼe mak lori haʼu. Husik sira lori haʼu ba Ita-nia foho santu no ba Ita-nia tabernákulu boot.”
^ par. 13 Provérbios 3:11, 12: “11 Oh haʼu-nia oan, simu bá dixiplina husi Jeová; no keta odi ninia dixiplina. 12 Tanba Jeová fó dixiplina ba ema neʼebé nia hadomi hanesan aman ida fó dixiplina ba oan neʼebé monu loos ba nia laran.”
^ par. 15 Zacarias 2:8: “Tanba neʼe mak liafuan husi Jeová Naʼi funu-naʼin, neʼebé hetan tiha glória, no haruka haʼu ba nasaun sira neʼebé fó-terus ba imi: ‘Sé deʼit neʼebé mak book imi book haʼu-nia matan-fuan.’”
Karik Ita sei gosta
LIVRU HAKLAKEN—ESTUDU NIAN
Jeová proteje no fó buat oioin ba ita
Hafolin Maromak Jeová, ita-nia Aman iha lalehan. Aprende oinsá atu hametin ita-nia relasaun ho Maromak, neʼebé proteje no fó buat oioin ba ita.
