“TANBASÁ mak ó lakohi fiar ó-nia beiʼala sira? Ó la hatene katak tan sira mak ó bele moris? Ó lakohi hatudu agradese ba sira ka? Ó sei soe deʼit kostume neʼebé ita tuir ba jerasaun barak ona ka? Se ó la adora ita-nia beiʼala sira, neʼe hanesan ó dehan ita-nia adorasaun mak laloos.” Haʼu-nia amá mak koʼalia liafuan sira-neʼe mai haʼu. Koʼalia tiha, haʼu-nia amá komesa tanis.

Tuir loloos, haʼu-nia amá mak arranja ba haʼu atu estuda Bíblia. Uluk, Testemuña ba Jeová husu nia atu estuda. Maibé tanba nia sente la diʼak atu dehan lakohi, entaun nia dudu fali haʼu ba estuda ho sira. Tan neʼe haʼu hakfodak haʼu-nia amá koʼalia hanesan neʼe mai haʼu. Iha haʼu-nia moris tomak, haʼu sempre halo tuir nia, no iha tempu neʼe haʼu sente haʼu mós tenke halo tuir deʼit nia. Maibé se haʼu hakarak halo kontente Jeová, haʼu la bele halo tuir haʼu-nia amá. Jeová ajuda tebes haʼu, no se la ho nia, haʼu la bele.

Iha rai-Japaun ema barak mak tuir relijiaun Buda, no ami-nia família mós Buda. Maibé bainhira estuda tiha ho Testemuña sira ba fulan rua, haʼu fiar katak Bíblia mak lia-loos. Haʼu aprende katak haʼu iha Aman ida iha lalehan, no haʼu hakarak tebes atu koñese nia. Haʼu no amá sempre kontente atu koʼalia kona-ba buat neʼebé haʼu aprende. Haʼu komesa tuir reuniaun sira iha domingu-domingu iha Reuniaun-Fatin no haʼu-nia matenek kona-ba Bíblia aumenta. Ikusmai haʼu fó-hatene ba haʼu-nia amá katak haʼu sei la halo tan ona Buda nia kostume sira. Derrepente, ninia hahalok troka. Nia hatete: “Ó lori moe ba ami tanba ó la hadomi ita-nia beiʼala sira.” Nia haruka haʼu atu para estuda Bíblia no tuir reuniaun sira. Haʼu nunka hanoin haʼu-nia amá sei koʼalia hanesan neʼe. Nia la hanesan uluk ona.

Haʼu-nia apá mós apoia amá nia desizaun. Iha Éfeso kapítulu 6 haʼu aprende katak Jeová hakarak haʼu atu halo tuir haʼu-nia inan-aman, entaun foufoun, haʼu uza neʼe nuʼudar razaun atu rona ba sira. Haʼu hanoin, ‘Se haʼu rona ba haʼu-nia inan-aman, ami-nia família bele iha dame fali.’ Haʼu mós presiza uza tempu atu prepara ba ezame iha eskola entaun haʼu dehan ba sira katak haʼu sei halo tuir buat neʼebé sira hakarak haʼu halo ba fulan tolu. Haʼu mós promete ba Jeová katak, fulan tolu neʼe hotu tiha, haʼu sei tuir fali reuniaun sira.

Maibé haʼu-nia desizaun neʼe la diʼak duni tanba razaun rua. Primeiru, haʼu hanoin iha fulan tolu nia laran, haʼu-nia sentimentu ba Jeová sei la troka. Maibé lalais deʼit haʼu komesa sente dook husi Jeová. Segundu, haʼu-nia  amá-apá la kaer metin ba sira-nia liafuan. Fulan tolu liutiha, sira hakaʼas fali haʼu atu la bele halo atividade kona-ba adorasaun neʼebé loos.

Bainhira haʼu sei tuir hela reuniaun sira, haʼu koñese ema barak neʼebé hasoru hela susar husi sira-nia família neʼebé kontra lia-loos. Sira anima haʼu katak Jeová sei hametin haʼu. (Mateus 10:34-37) Sira fó-hanoin katak haʼu mak haʼu-nia família nia esperansa atu lori sira ba dalan salvasaun nian. Tan neʼe, haʼu komesa halo orasaun makaʼas atu oinsá bele sadere ba Jeová.

Haʼu-nia inan-aman koko buat oioin atu halo haʼu para estuda. Amá husu makaʼas haʼu atu para no koko fó razaun tanbasá haʼu tenke para. Baibain amá koʼalia, haʼu nonook deʼit. Ami naʼin-rua iha ami-nia razaun rasik, tan neʼe se haʼu mak hatán amá, neʼe halo ami naʼin-rua diskute malu. Tuir loloos, haʼu tenke komprende ba amá nia sentimentu no ninia fiar tanba karik ida-neʼe sei ajuda ami-nia situasaun. Haʼu-nia inan-aman fó serbisu barak ba haʼu atu haʼu la iha tempu atu sai. Dala ruma mós sira la rai hahán ba haʼu no sira xave uma hodi haʼu la bele tama.

Amá buka ajuda husi ema seluk. Nia bá koʼalia ho haʼu-nia mestre, maibé haʼu-nia mestre la todan ba sorin. Amá mós koko lori haʼu ba koʼalia ho ninia patraun atu nia patraun bele esplika ba haʼu tanbasá relijiaun hotu la iha folin. Amá mós telefone ninia família sira no tanis husu sira atu ajuda. Ida-neʼe halo haʼu sente triste, maibé katuas sira iha kongregasaun anima haʼu, sira dehan katak tuir loloos, maski amá la hatene, maibé nia fó sasin ba ema barak liuhusi ninia hahalok neʼe.

Tuirmai haʼu hasoru problema ida tan. Haʼu-nia inan-aman planu atu hatama haʼu  ba universidade hodi haʼu bele hetan serbisu diʼak. Susar atu ami koʼalia ba malu ho kalma, entaun haʼu hakerek karta balu ba sira hodi esplika didiʼak haʼu-nia planu sira ba futuru. Haʼu-nia apá hirus tebes no nia hatete: “Se ó hanoin ó bele hetan serbisu mesak, ó tenkesér hetan aban, se lae, ó sai husi uma neʼe.” Haʼu halo orasaun ba Jeová kona-ba neʼe. Loron tuirmai, bainhira haʼu haklaken hela, irmán naʼin-rua husu haʼu atu hanorin sira-nia oan. Haʼu-nia apá la kontente kona-ba neʼe, no nia la koʼalia tan ho haʼu, no la liga tan haʼu. Amá mós dehan, diʼak liu haʼu sai malandru duké sai Testemuña ba Jeová.

Dala ruma haʼu hanoin, ‘Jeová hakarak duni haʼu atu kontra haʼu-nia inan-aman nia hakarak toʼo sai hanesan neʼe ka lae?’ Maibé haʼu halo orasaun no hanoin eskritura sira kona-ba Jeová nia domin. Ida-neʼe ajuda haʼu iha hanoin neʼebé loos bainhira ema kontra haʼu no atu komprende katak tuir loloos, haʼu-nia inan-aman hanoin tebes haʼu mak sira hatudu hahalok hanesan neʼe. Jeová ajuda tebes hodi hatudu dalan neʼebé haʼu tenke tuir. Haʼu mós gosta hola parte beibeik iha serbisu haklaken toʼo haʼu halo planu atu foti pioneiru.

Irmán balu hatene haʼu-nia planu atu foti pioneiru, no sira dehan atu hein uitoan toʼo haʼu-nia inan-aman la hirus ona. Haʼu husu Jeová fó matenek mai haʼu no buka informasaun neʼebé ajuda ho haʼu-nia situasaun. Haʼu hanoin kona-ba tanbasá mak haʼu hakarak foti pioneiru, no haʼu mós koʼalia ho irmaun-irmán maduru sira. Ikusmai haʼu deside katak haʼu hakarak tebes atu halo Jeová kontente. No haʼu hanoin, se haʼu demora uitoan atu foti pioneiru mós neʼe la dehan katak haʼu-nia inan-aman sei troka sira-nia hanoin.

Besik atu remata eskola sekundária mak haʼu foti pioneiru. Haʼu pioneiru tiha ba tempu uitoan, haʼu iha planu atu serbí iha fatin neʼebé presiza tan haklaken-naʼin sira. Maibé amá-apá lakohi haʼu sai husi uma. Entaun, haʼu hein toʼo haʼu tinan 20. Atu amá la hanoin barak kona-ba haʼu, haʼu husu sukursál atu muda haʼu ba Japaun nia parte súl hodi pioneiru iha neʼebá, tanba ami iha família iha neʼebá.

Iha haʼu-nia knaar foun neʼe, haʼu kontente haree haʼu-nia estudante balu hetan batizmu. Durante tempu neʼe haʼu komesa aprende lia-inglés atu ajuda haʼu aumenta haʼu-nia serbisu ba Jeová iha futuru. Iha haʼu-nia kongregasaun iha irmaun naʼin-rua neʼebé serbí nuʼudar pioneiru tempu-tomak. Haʼu haree sira-nia laran manas no oinsá sira ajuda tebes ema seluk. Hodi haree sira-nia ezemplu, haʼu halo planu atu loron ida, sai pioneiru tempu-tomak. Dala rua, haʼu-nia amá sai moras todan, no haʼu fila fali ba uma hodi tau matan ba nia. Nia hakfodak ho ida-neʼe no hahalok neʼebé nia hatudu ba haʼu komesa sai mamar uitoan.

Tinan hitu liutiha, haʼu simu karta husi Atsushi, irmaun ida husi pioneiru tempu-tomak naʼin-rua neʼebé haʼu hasoru uluk. Iha ninia karta neʼe, nia dehan katak nia hanoin hela atu kaben, no nia husu haʼu iha sentimentu hanesan neʼe ba nia ka lae. Tuir loloos, haʼu nunka iha sentimentu ba nia, haʼu mós la hanoin nia iha sentimentu ba haʼu. Maibé fulan ida liutiha, haʼu fó resposta katak haʼu mós hakarak koñese nia diʼak liután. Nuʼudar ami koñese malu, ami haree katak ami naʼin-rua iha planu barak neʼebé hanesan, porezemplu, ami hakarak kontinua iha serbisu tempu-tomak nian no prontu atu serbí iha knaar naran deʼit. Ikusmai ami kaben. Haʼu kontente tebes haʼu-nia amá, apá no família seluk mós tuir ami-nia kazamentu!

Liutiha tempu uitoan, ami komesa serbisu nuʼudar pioneiru regulár no Atsushi mós  hetan knaar atu sai katuas área rezerva nian. Lakleur ami mós hetan bensaun seluk. Ami hetan knaar nuʼudar pioneiru tempu-tomak, no depois neʼe haʼu-nia laʼen hetan konvite atu serbí nuʼudar katuas área nian. Bainhira ami vizita tiha kongregasaun hotu iha ami-nia área ba dala primeiru, ami simu konvite husi sukursál. Sira husu se ami hakarak bá rai-Nepál hodi vizita kongregasaun sira iha neʼebá.

Haʼu hanoin oinsá haʼu-nia inan-aman sei sente kona-ba neʼe tanba rai-Nepál dook husi Japaun. Haʼu telefone atu fó-hatene sira, no apá hatán dehan: “Neʼe mak fatin neʼebé furak tebes.” Tuir loloos, semana ida antes neʼe, haʼu-nia apá nia kolega ida fó ba nia livru kona-ba Nepál, no nia hanoin loron ida nia hakarak ba pasiar iha rai neʼe.

Ami gosta tebes ami-nia knaar vizita kongregasaun sira iha Nepál no koñese irmaun-irmán laran-diʼak sira. Depois, ami simu bensaun ida tan. Sukursál hakarak ami atu vizita mós rai-Bangladexe. Rai-Bangladexe neʼe besik loos ba rai-Nepál maibé kultura no kostume sira mak la hanesan duni, iha serbisu haklaken mós ita hetan ema oioin. Bainhira ami serbí ba tinan lima iha área neʼe, ami hetan knaar foun atu fila fali ba Japaun hodi vizita kongregasaun sira iha neʼebá.

Japaun, Nepál no Bangladexe, iha sira ida-idak nia kostume rasik, rai no ema ida-idak mós úniku. Hodi serbí iha rai sira-neʼe, haʼu aprende buat barak kona-ba Jeová. Haʼu haree oinsá Jeová hanoin ema ida-idak, oinsá nia simu sira-nia adorasaun ba nia, no oinsá nia ajuda no fó bensaun ba sira.

Jeová mós fó bensaun ba haʼu. Agora haʼu hatene lia-loos kona-ba nia, haʼu kontente ho haʼu-nia knaar, no haʼu mós iha laʼen neʼebé diʼak. Jeová ajuda haʼu atu foti desizaun sira neʼebé loos, no haʼu iha relasaun diʼak ho nia no haʼu-nia família. Tanba Jeová nia ajuda, haʼu no haʼu-nia amá sai fali belun diʼak. Haʼu agradese tebes tanba haʼu hetan dame ho Maromak no mós haʼu-nia amá.