Hakarak hatene?

Iha mós livru seluk neʼebé temi Jesus nuʼudar ema ida neʼebé moris duni iha tempu uluk ka lae?

▪ Matenek-naʼin balu neʼebé moris iha tempu neʼebé besik hanesan ho Jesus mós hakerek kona-ba Jesus. Sira ida mak naran Cornélio Tácito, neʼebé hakerek istória kona-ba rai-Roma iha tempu neʼebé imperadór sira mak ukun. Kuandu Tácito hakerek kona-ba sidade Roma neʼebé sai motuk tanba ahi han iha tinan 64, nia hatete katak, tuir lia-anin, imperadór Nero mak iha responsabilidade ba dezastre neʼe. Maibé, nia mós hakerek katak Nero koko atu duun fali grupu ida neʼebé ema bolu nuʼudar kristaun. Tácito hakerek: “Sira foti sira-nia naran neʼe husi Kristu neʼebé hetan kastigu-mate iha governadór Pónsiu Pilatos nia liman, iha tempu neʼebé imperadór Tibério mak ukun.”—Annals, XV, 44.

Ema judeu ida naran Flávio Josefo mós hakerek kona-ba Jesus. Kuandu nia hakerek kona-ba buat neʼebé akontese iha tempu governadór Roma ukun iha rai-Judeia naran Festo mate maizumenus iha tinan 62, no Albino neʼebé atu troka nia fatin seidauk toʼo rai-Judeia, Josefo hatete katak Amlulik Boot Anás “halibur tesi-lia naʼin sira iha Sinédriu no lori ba sira-nia oin mane ida naran Tiago, alin husi Jesus neʼebé bolu nuʼudar Kristu, no ema seluk tan”.—Jewish Antiquities, XX, 200 (ix, 1).

Tansá mak ita bolu Jesus nuʼudar Kristu?

▪ Tuir Evanjellu, kuandu anju Gabriel bá vizita Maria atu fó-hatene katak nia sei koʼus Maromak nia oan, nia mós haruka Maria atu hanaran nia Jesus. (Lucas 1:31) Iha tempu Bíblia nian, ema judeu barak iha naran Jesus. Iha livru neʼebé matenek-naʼin kona-ba istória naran Josefo mak hakerek, nia temi ema barak neʼebé ho naran Jesus, inklui mós ema naʼin-12 neʼebé la temi iha Bíblia laran. Ba Jesus neʼebé Maria nia oan, ema bolu “Jesus Nazaré”, nuneʼe ema bele hatene loloos. (Marcos 10:47) Lakleur, ema mós koñese nia nuʼudar “Kristu”, ka Jesus Kristu. (Mateus 16:16) Entaun, liafuan “Kristu” katak sá?

“Kristu” mai husi liafuan gregu Kristós, no liafuan ida-neʼe iha arti hanesan ho liafuan iha lia-ebraiku Maxíah (Mesias). Liafuan rua neʼe katak “ema neʼebé hetan kose-mina”. Ema balu neʼebé moris antes Jesus mós simu títulu ida-neʼe. Porezemplu, Bíblia bolu Moisés, Aarão, no Liurai David nuʼudar ema neʼebé hetan kose-mina, neʼe katak Maromak hili sira atu halaʼo knaar no responsabilidade espesiál. (Levítico 4:3; 8:12; 2 Samuel 22:51; Ebreu 11:24-26) Nuʼudar Mesias neʼebé promete nanis ona, Jesus mak ida neʼebé simu knaar espesiál atu reprezenta Maromak Jeová. Tan neʼe, loos atu Jesus simu títulu nuʼudar “Kristu, Maromak moris nia Oan”.—Mateus 16:16; Daniel 9:25.

[Dezeñu iha pájina 15]

Flávio Josefo