Hakarak hatene?

Jesus família ho ninia apóstolu naʼin-12 balu ka lae?

▪ Bíblia la fó resposta neʼebé klaru ba pergunta neʼe. Maibé, iha informasaun balu husi Bíblia no mós istória neʼebé laʼós husi Bíblia hatudu katak karik Jesus família ho nia apóstolu balu.

Ema neʼebé hakerek Evanjellu fó-hatene feto balu nia naran neʼebé hakbesik ba Jesus bainhira nia atu mate iha ai-riin terus nian. João fó-hatene kona-ba feto naʼin-haat neʼebé hakbesik ba Jesus iha tempu neʼebá, neʼe mak “nia inan [Maria] no alin-feto husi nia inan, Maria, Clopas nia feen, no Maria Madalena”. (João 19:25, Bíblia Sagrada Para o Terceiro Milénio da Encarnação) Kuandu ita kompara versíkulu ida-neʼe ho liafuan neʼebé Mateus no Marcos hakerek kona-ba feto sira neʼebé hakbesik Jesus iha tempu neʼebá, ita bele hanoin katak Jesus nia inan nia alin mak Salomé. Bíblia konta kona-ba Zebedeu nia oan, Tiago no João. Karik sira-nia inan mak Salomé. (Mateus 27:55, 56; Marcos 15:40) Neʼe katak karik Tiago no João mak Jesus nia primu. Jesus konvida maun-alin sira-neʼe, neʼebé peskadór, atu sai ninia dixípulu sira.—Mateus 4:21, 22.

Istória ida neʼebé laʼós husi Bíblia hatete katak feto sira-neʼe ida neʼebé hakbesik ba Jesus bainhira nia atu mate, nia laʼen mak Cleófas (Clopas), neʼebé mós bolu Alfeu. Istória neʼe hatete katak feto neʼe mak José, Jesus nia aman hakiak, nia alin. Se istória neʼe loos, neʼe katak Tiago, Alfeu nia oan, neʼebé apóstolu ida, mós Jesus nia primu.—Mateus 10:3.

Jesus ho João Batista família ka lae?

▪ Ema fiar katak sira naʼin-rua mak primu. Sira fiar neʼe tanba Bíblia balu tradús Lucas 1:36 iha dalan neʼebé ladún loos. Porezemplu, King James Version, hatete katak Isabel, João nia inan, no Maria, Jesus nia inan, mak prima.

Maibé tuir loloos, liafuan husi lia-gregu neʼebé tradús nuʼudár prima iha arti família neʼebé besik, ka dook uitoan. Ida-neʼe dehan katak Isabel no Maria mak husi família ida, maibé ita la hatene loos se sira prima, ka tia-sobriña, ka iha relasaun seluk. Disionáriu ida (The Interpreterʼs Dictionary of the Bible) hatete: “Liafuan neʼe iha arti barak, no ita la bele hatene ho loos kona-ba sira-nia relasaun.” Nuneʼe, tanbasá mak ema fiar katak João mak Jesus nia primu? Livru The Catholic Encyclopedia esplika: “Informasaun kona-ba . . . Maria nia inan-aman . . . mai husi livru antigu neʼebé koʼalia kona-ba Bíblia maibé laʼós parte husi Bíblia.”

Nuneʼe, Jesus no João mai husi família ida, maibé ita la hatene se sira primu ka iha relasaun seluk.