Hakbesik ba Maromak

“Ita sei hatudu laran-metin”

2 SAMUEL 22:26

KUANDU ema ida neʼebé ita fiar tebes la hatudu laran-metin mai ita, ida-neʼe hakanek tebes ita-nia laran. Iha mundu neʼe, hahalok hanesan neʼe akontese beibeik. (2 Timoteo 3:1-5) Se nuneʼe, ba sé mak ita bele fiar? Sé mak sempre hatudu laran-metin mai ita? Mai ita haree kona-ba Liurai David nia esperiénsia iha Izraél antigu.

Durante David nia moris, nia hasoru situasaun balu neʼebé susar tebes tanba ema la hatudu laran-metin ba nia. Maski David la halo sala ida, nia tenke halai subar tanba Saul, Izraél nia liurai primeiru, neʼebé laran-moras ba nia. Iha David nia família rasik, ninia feen Mical la hatudu laran-metin ba nia, Mical “komesa odi nia iha ninia laran”. (2 Samuel 6:16) Aitofel, belun neʼebé fó konsellu ba David, sai traidór no hola parte iha grupu ida neʼebé kontra hasoru David. Sé mak ulun-naʼin ba planu aat neʼe? Neʼe mak Absalão, David nia oan rasik! Tanba David hasoru beibeik situasaun neʼebé ema la hatudu laran-metin ba nia, ida-neʼe halo nia sente katak la iha ona ema ruma neʼebé bele hatudu laran-metin nafatin ba nia ka lae?

Ita bele hetan resposta ba ida-neʼe husi David nia liafuan rasik neʼebé hakerek iha 2 Samuel 22:26, neʼebé dehan: “Ba ema neʼebé laran-metin, Ita sei hatudu laran-metin.” Ho fiar, David hakerek knananuk neʼe ba Maromak Jeová. Maski ema seluk hakanek David nia laran, maibé nia fiar katak Maromak Jeová sempre hatudu laran-metin ba nia.

Mai ita haree didiʼak ba David nia liafuan sira-neʼe. Liafuan ebraiku neʼebé tradús “hatudu laran-metin” mós bele tradús nuʼudar “hatudu laran-diʼak neʼebé nakonu ho domin”. Ida-neʼe hatudu katak hun ba laran-metin neʼebé loos mak domin. Maromak Jeová ho domin belit nia an ba sira neʼebé laran-metin ba nia. *

Haree mós katak hatudu laran-metin laʼós sentimentu deʼit, maibé envolve halo buat ruma. Hanesan David haree rasik, Maromak Jeová hatudu laran-metin. Iha tempu susar liu durante David nia moris, Maromak Jeová halo buat barak atu ajuda nia hodi proteje no fó matadalan ba nia. David agradese tebes ba Maromak Jeová tanba salva nia “husi ninia inimigu hotu nia liman”.—2 Samuel 22:1.

David nia liafuan sira-neʼe katak sá mai ita? Maromak Jeová la laran-rua kona-ba halo tuir ninia hakarak no la muda. (Tiago 1:17) Nia sempre halo tuir ninia matadalan sira no sempre kumpre buat hotu neʼebé nia promete. Iha David nia salmu ida seluk, nia hatete: “Maromak Jeová . . . sei la husik ema neʼebé laran-metin ba nia.”—Salmo 37:28.

Maromak Jeová hafolin ita-nia laran-metin ba nia. Nia mós hafolin kuandu ita halo tuir nia, no nia hakarak ita atu halo tuir ninia ezemplu kona-ba hatudu laran-metin ba ema seluk. (Efeso 5:1) Se ita hatudu laran-metin iha dalan sira-neʼe, ita bele fiar katak Maromak sei nunka husik ita. Maski ema seluk la hatudu laran-metin mai ita, ita bele fiar katak Maromak Jeová sei hatudu laran-metin mai ita hodi ajuda ita hasoru susar naran deʼit. Ida-neʼe book Ita atu hakbesik liután ba Maromak Jeová, neʼebé “laran-metin iha buat hotu neʼebé nia halo”, loos ka lae?—Salmo 145:17.

[Nota–rodapé]