Tanbasá mak Jesus la hola parte iha polítiku?

IHA Jesus nia tempu, ema barak hatene katak nia mak Mesias neʼebé profeta sira fó-hatene nanis, no katak nia halo milagre oioin hodi fó isin-diʼak ba ema moras no mós fó moris hiʼas ba ema mate. Hanoin toʼok saida mak akontese iha lokraik ida iha tinan 32. Iha lokraik neʼe, ema-lubun boot sente hakfodak tanba Jesus halo milagre oioin no hanorin lia-loos kona-ba Maromak. Tuirmai, nia haruka ema-lubun boot neʼebé hamlaha hela atu tuur halo grupu-grupu. Nia halo orasaun ba Maromak Jeová no hodi halo milagre ida tan, nia fó hahán ba sira hotu. Depois, nia halibur hahán restu tanba nia lakohi soe deʼit. Ema sira-neʼe sente oinsá?—Joao 6:1-13.

Kuandu sira haree Jesus halo milagre no haree dalan neʼebé nia tau matan ba sira ho matenek no laran-diʼak, ema sira-neʼe hakarak Jesus atu sai sira-nia liurai. (Joao 6:14) Ita la hakfodak katak sira sente nuneʼe, tanba iha tempu neʼebá Roma ukun no hanehan sira. Tan neʼe, sira buka namanas ulun-naʼin neʼebé matenek. Nuneʼe, sira husu kedan Jesus atu hola parte iha polítiku. Hanoin kona-ba situasaun neʼe, nuʼudar ita koʼalia kona-ba saida mak Jesus halo.

Bíblia hatete: “Wainhira nia hatene katak sira atu kaer nia hodi foti nia nuʼudar liurai, Jesus subar an mesak hodi fila fali ba foho.” (Joao 6:15) Jesus hatudu ho klaru katak nia lakohi hola parte iha polítiku. Nia nunka mete iha buat polítiku, maski iha ninia rai rasik. Nia mós hatete katak nia dixípulu sira labele hola parte iha polítiku. (Joao 17:16) Tanbasá?

Tansá mak Jesus la fó apoiu ba parte ida?

Jesus la fó apoiu ba parte ida tanba nia halo tuir Bíblia nia matadalan sira. Hanoin toʼok kona-ba matadalan rua tuirmai neʼe.

“Ema ukun ema toʼo nia hetan susar.” (Eclesiastes 8:9) Liafuan husi Bíblia neʼe esplika ho klaru rezultadu husi ema nia ukun iha mundu neʼe. Jesus hela iha lalehan kleur ona antes nia mai toʼo rai nuʼudar ema. (Joao 17:5) Tan neʼe, nia hatene katak ema la iha kbiit atu tau matan ba ema rihun ba rihun neʼebé moris iha rai. Maski ema balu ho laran-diʼak hakarak ukun ema seluk, maibé neʼe laʼós Maromak nia hakarak ba nia kriatura sira. (Jeremias 10:23) Jesus hatene katak laʼós ema nia governu sira mak bele rezolve ema nia problema.

“Mundu tomak sei iha aat-naʼin nia ukun.” (1 Joao 5:19) Liafuan neʼe halo Ita sente hakfodak ka lae? Ema barak sente hakfodak. Sira sente nuneʼe tanba sira hanoin kona-ba ukun-naʼin neʼebé laran-diʼak, neʼebé hakarak halo mundu neʼe sai diʼak liu no seguru liu. Maibé, maski ukun-naʼin sira-neʼe hakaʼas an beibeik, sira mós la bele kontrola ida neʼebé Jesus bolu nuʼudar “ukun-naʼin mundu neʼe nian”. (Joao 12:31; 14:30) Tan neʼe Jesus hatete ba ulun-naʼin polítiku ida: “Haʼu-nia reinu laʼós raiklaran neʼe nian.” (Joao 18:36) Maromak hili tiha Jesus nuʼudar Liurai ba nia Reinu, ka governu, iha lalehan. Se Jesus mete iha buat polítiku, neʼe dehan katak nia la hatudu laran-metin ba nia Aman nia governu.

Nuneʼe, Jesus hanorin katak nia dixípulu sira lalika halo tuir governu sira iha rai ka lae? Lae, nia hanorin katak sira tenke tetu didiʼak hodi bele halo desizaun sira neʼebé loos kona-ba halo tuir buat neʼebé Maromak husu no buat neʼebé ema nia governu sira husu.

Jesus respeitu ema nia governu nia kbiit

Bainhira Jesus hanorin iha templu, ninia inimigu sira koko nia hodi husu kona-ba selu  impostu ka taxa. Se Jesus hatete, ‘Ema lalika selu taxa,’ neʼe katak nia kontra governu Roma, no karik ema hanoin Jesus hakarak sira atu funu hasoru Roma hodi bele ukun an. Maibé se Jesus hatete, ‘Ema tenke selu taxa,’ karik ema hanoin katak Jesus apoia Roma nia ukun neʼebé hanehan sira. Jesus nia resposta matenek tebes. Nia hatete: “Fó ba Sezar buat neʼebé Sezar nian, no ba Maromak buat neʼebé Maromak nian.” (Lucas 20:21-25) Neʼe hatudu katak Jesus nia dixípulu tenke halo tuir sira-nia responsabilidade ba Maromak no mós ba Sezar, neʼebé reprezenta ema nia governu hotu.

Governu sira lori buat diʼak ruma ba sira-nia povu. Tan neʼe sira haruka povu atu selu taxa no halo tuir lei. Jesus hatudu ezemplu saida kona-ba “fó ba Sezar buat neʼebé Sezar nian”? Jesus nia inan-aman hatudu ezemplu diʼak ba nia hodi halo tuir lei maski dala ruma neʼe susar. Porezemplu, kuandu Maria isin-rua, José lori nia ba Belein, sira laʼo kilómetru 150, hodi halo tuir estadu Roma nia lei kona-ba tau naran. (Lucas 2:1-5) Hanesan sira, Jesus mós halo tuir lei. Nia mós selu taxa neʼebé tuir loloos nia lalika selu. (Mateus 17:24-27) Nia mós kuidadu atu la mete ho ukun-naʼin sira-nia responsabilidade. (Lucas 12:13, 14) Sin, maski Jesus la hola parte iha polítiku, maibé nia respeitu ema nia governu nia kbiit. Maibé, Jesus nia liafuan kona-ba fó “ba Maromak buat neʼebé Maromak nian” katak sá?

Jesus fó “ba Maromak buat neʼebé Maromak nian”

Loron ida, ema husu ba Jesus kona-ba Maromak nia ukun-fuan ida neʼebé mak boot liu. Kristu hatán: “Ó sei hadomi Naʼi, ó-nia Maromak ho neon ho laran, ho  ó-nia klamar tomak. Ida-neʼe mak ukun-fuan uluk no boot liu hotu. Ida tuirmai hanesan nia: ‘Ó sei hadomi ema seluk hanesan ó-nia an rasik.’” (Mateus 22:37-39) Jesus hanorin katak fó “ba Maromak buat neʼebé Maromak nian” envolve hadomi Nia. Domin neʼe envolve hadomi Maromak ho laran tomak no hatudu laran-metin ba nia. Neʼe mak importante liu.

Ita bele fahe domin hanesan neʼe ka lae? Ita bele hatudu laran-metin ba Maromak nia governu iha lalehan no mós ba ema nia governu sira iha rai ka lae? Lae. Jesus rasik dehan sai matadalan tuirmai neʼe: “Ema ida la bele serbí ba naʼi-ulun rua, basá nia sei rai odi hasoru ida hodi hadomi ida seluk, ka nia sei serbí ida hodi hakribi ida seluk.” (Mateus 6:24) Iha versíkulu neʼe, Jesus koʼalia kona-ba labele hatudu laran-metin ba Maromak no mós ba rikusoin. Maibé klaru katak, tuir Jesus nia hanoin, matadalan neʼe mós envolve labele hola parte iha polítiku. Oinsá ho Jesus nia dixípulu sira iha apóstolu nia tempu?

Iha livru antigu sira neʼebé koʼalia kona-ba ema nia istória, konta katak Jesus nia dixípulu iha tempu antigu la hola parte iha polítiku. Sira adora deʼit Ida neʼebé Kristu adora, tan neʼe sira la promete atu laran-metin ba nasaun Roma no nia liurai, sira la sai soldadu, no sira la simu knaar nuʼudar ukun-naʼin. Tan sira la hola parte, ema odi no kontra hasoru sira. Ema mós duun katak sira odi ema seluk. Neʼe loos ka lae?

Ema kristaun loos hanoin ema seluk

Hanoin fali Jesus nia liafuan kona-ba ukun-fuan sira neʼebé boot liu. Ukun-fuan segundu mak: “Ó sei hadomi ema seluk hanesan ó-nia an rasik.” Klaru katak Jesus lakohi nia dixípulu atu odi ema seluk. Jesus hadomi ema seluk,  nia hakaʼas an atu ajuda ema, inklui ho problema baibain neʼebé ema hasoru.—Marcos 5:25-34; Joao 2:1-10.

Maibé, ema koñese Jesus nuʼudar ema neʼebé halo serbisu saida? Maski Jesus halo milagre oioin, ema la bolu nia nuʼudar Ida neʼebé Fó Isin-Diʼak, ka Ida neʼebé Fó-Han ema rihun ba rihun, ka Ida neʼebé Fó Moris Hiʼas ba ema mate. Ema bolu nia nuʼudar Mestre, no neʼe loos. (Joao 1:38; 13:13) Jesus hatete katak razaun importante ida neʼebé nia mai toʼo rai mak atu hanorin ema kona-ba Maromak nia Reinu, ka Maromak nia ukun.—Lucas 4:43.

Tanba neʼe, ema kristaun sira neʼebé loos hakaʼas an atu halo serbisu neʼebé sira-nia Naʼi halo kuandu nia iha rai. Sira hanorin ema seluk kona-ba Maromak nia ukun. Jesus haruka nia dixípulu sira atu hanorin ema seluk kona-ba neʼe toʼo mundu nia rohan. (Mateus 24:14; 28:19, 20) Governu neʼe harii iha lalehan no sei ukun Maromak nia kriatura hotu iha dalan neʼebé loos, tuir ukun-fuan domin nian. Governu neʼe sei halo Maromak nia hakarak sai loos, inklui halakon susar hotu no mate. (Mateus 6:9, 10; Apokalipse 21:3, 4) Hanesan Bíblia dehan, Kristu nia mensajen neʼe mak “lia-foun diʼak” duni!—Lucas 8:1.

Se Ita hakarak hasoru Jesus Kristu nia dixípulu neʼebé loos ohin loron, oinsá mak Ita bele hatene sira? Sira hola parte iha mundu nia polítiku ka lae? Ka sira hakaʼas an atu halo tuir knaar neʼebé Jesus fó ba sira, katak haklaken no hanorin kona-ba Maromak nia ukun?

Ita hakarak hatene liután kona-ba Maromak nia ukun no oinsá ukun neʼe kona Ita-nia moris ohin loron ka lae? Ami konvida Ita atu koʼalia ho Testemuña ba Jeová ka loke sira-nia sítiu iha internét, www.watchtower.org.

[Kaixa/Dezeñu iha pájina 24]

Testemuña ba Jeová ajuda ema seluk

Testemuña ba Jeová la envolve an iha polítiku. Maibé, sira ajuda ema husi rai oioin neʼebé hela iha sira-nia fatin. Porezemplu:

▪ Testemuña ba Jeová naʼin-7.000.000 liu uza oras 1.500.000.000 liu atu hanorin ema atu haree oinsá Bíblia bele ajuda sira atu sai livre husi toman neʼebé la diʼak, halo sira-nia moris família nian sai kontente liu, no buat seluk tan.

▪ Sira tradús livru ba língua 500 liu no fahe livru sira-neʼe hodi la husu osan. Sira halo livru iha língua balu neʼebé livru seluk la iha.

▪ Sira halaʼo kursu neʼebé ajuda ema rihun ba rihun atu koʼalia iha dalan neʼebé moos no klaru iha ema seluk nia oin.

▪ Sira mós halaʼo kursu neʼebé ajuda ema rihun ba rihun iha mundu tomak atu hatene lee no hakerek.

▪ Sira iha Grupu atu Arranja Harii Uma hamutuk 400 neʼebé fó treinu ba voluntáriu sira atu harii adorasaun fatin, fatin neʼebé ema aprende kona-ba Bíblia. Iha tinan sanulu liubá nia laran, sira harii adorasaun fatin 20.000 liu.

▪ Kuandu iha dezastre, Testemuña ba Jeová fó ajuda ba sira-nia maluk no mós ba ema seluk. Porezemplu, kuandu anin boot kona rai-Estadus Unidus Amérika, Testemuña ba Jeová harii fali adorasaun fatin 90 liu no uma 5.500 liu iha tinan rua nia laran deʼit.

[Dezeñu iha pájina 23]

Kuandu ema hakaʼas Jesus atu hola parte iha polítiku, nia “subar an mesak hodi fila fali ba foho”