Pergunta sanulu kona-ba seks hetan resposta

1 Sala neʼebé Adão no Eva halo iha jardín Eden mak relasaun seksuál ka lae?

▪ Resposta: Ema barak hanoin katak ai-fuan iha jardín Eden neʼebé Maromak bandu reprezenta relasaun seksuál. Maibé Bíblia la hanorin ida-neʼe.

Hanoin toʼok kona-ba neʼe: Maromak seidauk kria Eva kuandu nia fó ukun-fuan ba Adão atu labele han ai-fuan husi “ai-hun koñesimentu nian kona-ba diʼak no aat”. (Gênesis [Kejadian] 2:15-18) Tanba Adão mesak deʼit kuandu Maromak fó ukun-fuan neʼe, klaru katak ukun-fuan neʼe laʼós kona-ba relasaun seksuál. No mós, Maromak haruka Adão no Eva atu “iha oan no bei-oan . . . no sai barak, no halo mundu nakonu, no haburas mundu tomak”. (Gênesis 1:28) Hodi “halo mundu nakonu” ho ema, ida-neʼe envolve halo relasaun seksuál. Entaun, oinsá mak Maromak domin nian haruka sira atu iha oan, maibé depois neʼe oho sira maski sira halo tuir ninia mandamentu neʼe?—1 Joao 4:8.

Liután neʼe, Eva la hamutuk ho ninia laʼen kuandu nia “foti ai-fuan [neʼebé Maromak bandu] husi ai-hun neʼe no han”. Bíblia hatete katak depois Eva han ai-fuan mak nia foin “fó balu ba nia laʼen kuandu hamutuk ho nia no nia mós komesa atu han”.—Gênesis 3:6.

No mós, Maromak la tesi lia ba Adão no Eva kuandu sira halo relasaun seksuál atu bele hetan oan. (Gênesis 4:1, 2) Entaun, klaru katak ai-fuan neʼebé Adão no Eva han la reprezenta relasaun seksuál, maibé neʼe mak ai-fuan duni husi ai-hun ida.

2 Bíblia bandu ema atu haksolok ho relasaun seksuál ka lae?

▪ Resposta: Livru primeiru iha Bíblia hatete katak Maromak mak kria ema nuʼudar “mane no feto”. Maromak fó sai katak ninia kriasaun “diʼak tebes”. (Gênesis 1:27, 31) Depois, Maromak leno ema ida atu hakerek liafuan tuirmai neʼe ba laʼen sira: “Haksolok bá ho ó-nia feen husi tempu joven nian . . . Husik ninia  susun halanu ó iha tempu hotu.” (Provérbios [Amsal] 5:18, 19) Entaun, liafuan neʼe hatudu katak Bíblia la bandu ema atu haksolok ho relasaun seksuál.

Klaru katak Maromak kria oin-lulik, laʼós deʼit atu ema bele hetan oan, maibé hodi kaben-naʼin sira bele hatudu domin ba malu iha dalan neʼebé lori ksolok ba sira naʼin-rua. Relasaun seksuál bele fó oportunidade ba kaben-naʼin sira neʼebé hadomi malu atu sente kontente iha laran no iha sira-nia moris.

3 Tuir Bíblia, mane no feto bele moris hamutuk se sira seidauk kaben tuir lei ka lae?

▪ Resposta: Bíblia hatete ho klaru katak “Maromak sei tesi lia ba sira neʼebé halo sala-foʼer”. (Ebreu 13:4) Liafuan sala-foʼer iha lia-gregu mak porneía. Ida-neʼe inklui relasaun seksuál naran deʼit neʼebé ema halo ho ida neʼebé laʼós sira-nia kaben. * Tan neʼe, tuir Maromak nia haree, sala ba mane no feto atu moris hamutuk, maski sira iha planu atu kaben iha futuru.

Maski mane no feto hadomi malu tebes, maibé Maromak hakarak sira atu kaben antes sira bele halo relasaun seksuál. Maromak mak kria ita ho kapasidade atu hatudu domin. Maromak nia hahalok boot liu hotu mak domin. Tan neʼe, Maromak iha razaun diʼak atu fó lei katak kaben-naʼin sira deʼit mak bele halo relasaun seksuál, hanesan informasaun iha pájina 8 sei esplika.

4 Ema ida bele ka lae iha kaben rua ka liu?

▪ Resposta: Ba tempu uitoan, Maromak fó lisensa ba mane atu hola feto rua ka liu. (Gênesis 4:19; 16:1-4; 29:18–30:24) Maibé Maromak la kria ema atu iha feen ka laʼen barak. Nia fó feen ida deʼit ba Adão.

Maromak haruka Jesus Kristu atu temi fali Ninia hakarak husi uluk kedas katak ema tenkesér iha kaben ida deʼit. (Joao 8:28) Kuandu ema husu Jesus kona-ba moris kaben nian, Jesus hatete: “Horiuluk kedas Maromak halo mane ho feto hodi dehan: ‘Tan neʼe mak mane sei husik nia aman ho nia inan hodi  moris hamutuk ho nia feen; sira naʼin-rua sei sai isin ida deʼit.’”—Mateus 19:4, 5.

Maromak leno Jesus nia dixípulu ida atu hakerek: “Mane ida-idak iha feen rasik no feto ida-idak iha laʼen rasik.” (1 Korinto 7:2, A Bíblia Sagrada, João Ferreira Almeida) Bíblia mós hatete katak atu laʼen ida bele simu knaar iha kongregasaun kristaun, nia tenke sai laʼen ba feen “ida deʼit”.—1 Timoteo 3:2, 12.

5 Sala ka lae, atu kaben-naʼin sira uza buat ruma atu labele iha oan?

▪ Resposta: Jesus la haruka ninia eskolante sira atu iha oan ka la iha oan. Jesus nia dixípulu sira mós la koʼalia kona-ba neʼe. La iha eskritura iha Bíblia laran neʼebé bandu ema atu uza buat ruma hodi feto la sai isin-rua.

Tan neʼe, kaben-naʼin sira bele foti desizaun rasik atu iha oan ka lae. Sira mós bele deside atu iha oan naʼin-hira no bainhira mak sira hakarak iha oan. Se laʼen no feen hakarak atu uza buat ruma atu feen la sai isin-rua (naran katak sira la uza buat ruma neʼebé bele oho bebé iha kabun laran), neʼe mak sira-nia desizaun. * No ema ida labele tesi lia ba sira.—Roma 14:4, 10-13.

6 Sala ka lae atu halo abortu?

▪ Resposta: Moris mak buat neʼebé sagradu ba Maromak. Maski bebé iha kabun laran seidauk forma kompletu, maibé Maromak haree ida-neʼe nuʼudar buat neʼebé moris ona. (Salmo [Mazmur] 139:16) Maromak hatete katak ema sei hetan kastigu se nia hakanek ka hamate bebé neʼebé iha kabun laran. Tan neʼe iha Maromak nia haree, hamate bebé iha kabun laran, neʼe hanesan oho-ema.—Êxodo (Keluaran) 20:13; 21:22, 23.

Maibé oinsá se situasaun perigu akontese kuandu inan atu tuur ahi, no bebé ka inan bele mate tanba situasaun perigu neʼe? Se nuneʼe, kaben-naʼin tenke deside se mak sira sei salva.

7 Bíblia bandu ema atu soe malu ka lae?

▪ Resposta: Bíblia hatete katak iha razaun ida deʼit atu ema bele soe malu. Jesus koʼalia kona-ba neʼe hodi hatete: “Haʼu dehan ba imi katak ema neʼebé soe nia feen, sala-foʼer deʼit mak lae, hodi hola fali feto seluk, ema neʼe halo sala adultériu nian.” (Mateus 19:9) Tan neʼe razaun ida deʼit atu ema bele soe malu mak kuandu ema halo relasaun seksuál ho ema neʼebé laʼós nia kaben.

Maromak la gosta duni haree ema soe malu ho razaun neʼebé la loos. Nia sei tesi lia ba sira neʼebé soe sira-nia kaben, liuliu se sira halo nuneʼe tanba hakarak atu hola fali ema seluk.—Malaquias [Maleakhi] 2:13-16; Marcos 10:9.

8 Maromak simu hahalok omoseksualidade ka lae?

▪ Resposta: Bíblia bandu hahalok sala-foʼer, neʼe inklui mós omoseksualidade, katak relasaun seksuál entre mane ho mane no feto ho feto. (Roma 1:26, 27; Galasia 5:19-21) Maski Bíblia hatudu ho klaru katak Maromak la simu hahalok sira-neʼe, maibé ita hatene katak “Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek”.—Joao 3:16.

Maski ema kristaun loos la simu hahalok hanesan neʼe, maibé sira hatudu laran-diʼak ba ema hotu. (Mateus 7:12) Maromak hakarak ita atu “hamtaʼuk ema tomak”. Tan neʼe, ema kristaun loos la odi sira neʼebé halo hahalok omoseksualidade.—1 Pedro 2:17.

9 Sala atu rona no haruka mensajen ka foto kona-ba seks liuhusi telemovel ka internét ka lae?

▪ Resposta: Maski Bíblia la temi kona-ba hahalok sira-neʼe, maibé Bíblia hatete: “Hanesan ema santu sira, keta husik ema ida iha imi leet temi sala-foʼer eh buat foʼer tomak, eh laran karak-teen nian. Hadook tiha lia-foʼer, beik eh halimar naranaran deʼit nian; sira-neʼe hotu folin la iha.” (Efeso 5:3, 4) Hodi uza telemovel ka internét atu halo hahalok hanesan neʼe, bele halo ema iha hanoin neʼebé la moos kona-ba relasaun seksuál no book sira atu buka ksolok iha dalan oioin. Dalan sira-neʼe la ajuda ema atu kontrola sira-nia hakarak seksuál nian, maibé halo sira buka deʼit sira rasik nia ksolok.

10 Saida mak Bíblia nia haree kona-ba masturbasaun?

▪ Resposta: Masturbasaun mak kaer ka halimar ho oin-lulik, neʼebé aumenta hakarak seksuál nian. Maski Bíblia la temi liafuan masturbasaun, maibé Bíblia haruka ema kristaun hodi dehan: “Oho hakarak rai neʼe nian neʼebé book imi-nia laran, hanesan sala-foʼer, hanoin foʼer, hakarak foʼer.”—Koloso 3:5.

Masturbasaun halo ema hanoin deʼit kona-ba sira rasik nia hakarak seksuál nian no halo sira uza sira-nia isin iha dalan neʼebé la tuir Maromak nia hakarak. Bíblia hatete katak Maromak bele fó “kbiit makaʼas” ba sira neʼebé hakaʼas an atu para toman aat neʼe.—2 Korinto 4:7; Filipe 4:13.

[Nota–rodapé]