Bainhira mak funu Armagedon sei mosu?

“Haʼu haree ema-lubun boot ida, sura la bele, husi nasaun, rasa, umakain no lia hotu-hotu . . . sira mak sira neʼebé terus makaʼas.”—APOKALIPSE 7:9, 14.

OINSÁ mak ita hatene katak buat hotu prontu ona atu Armagedon bele mosu?

Ohin loron iha ona povu neʼebé mai husi rai oioin iha mundu tomak neʼebé serbí Maromak Jeová no moris tuir Bíblia nia matadalan kona-ba morál. Ho Maromak nia ajuda, ema rihun ba rihun husi nasaun, rasa, no lia hotu-hotu halibur hamutuk daudauk atu sai parte iha família boot neʼebé iha unidade. Testemuña ba Jeová mak hanesan família boot neʼe.—Joao 13:35.

Maski Satanás ataka ona Maromak nia povu iha tempu uluk, maibé lakleur tan Satanás sei halibur ninia tropa no ataka iha dalan neʼebé boot liután, sira neʼebé moris ho unidade no haree hanesan ema kbiit-laek. (Ezequiel [Yehezkiel] 38:8-12; Apokalipse 16:13, 14, 16) Oinsá mak ita hatene katak lakleur tan ida-neʼe sei akontese? Bíblia fó-hatene kona-ba akontesimentu sira neʼebé sei ajuda ita atu hatene bainhira mak funu Armagedon sei mosu. Tuir loloos, akontesimentu barak neʼebé Bíblia temi, sai loos daudauk iha ita-nia tempu.

Akontesimentu sira neʼebé ita haree sai loos daudauk

Jesus nia dixípulu sira husu nia kona-ba oinsá mak ema hatene katak “mundu neʼe atu hotu”. (Mateus 24:3) Jesus fó resposta ba sira hodi fó-hatene kona-ba tempu neʼebé “povu sei hamriik hasoru povu, reinu hasoru reinu; rai sei hamlaha no nakdoko iha fatin oioin”. Jesus hatutan tan: “Neʼe hotu sei hatudu katak terus foin hahú.” (Mateus 24:7, 8) Apóstolu Paulo mós koʼalia kona-ba tempu neʼe nuʼudar “loron ikus sira” hodi hatete katak iha tempu neʼe “susar barak sei mosu mai”. (2 Timoteo 3:1) Ita bele haree katak  ohin loron buat sira-neʼe akontese duni, loos ka lae?

Apóstolu João fó razaun tansá susar barak sei mosu mai iha tempu neʼe. Nia fó-hatene nanis katak durante tempu badak, Satanás no ninia anju aat sira sei halaʼo sira-nia atividade iha mundu. Bíblia mós hatete katak iha tempu neʼe Satanás “laran-nakali”. (Apokalipse 12:7-12) Ita haree ka lae, ohin loron ema hatudu laran-nakali no halo violénsia, laʼós iha fatin ida deʼit maibé iha mundu tomak?

Jesus mós fó-hatene nanis katak iha tempu susar neʼe, ema sei halaʼo serbisu importante. Nia hatete: “Lia-foun reinu nian neʼe, ema sei haklaken iha mundu tomak hodi fó sasin ba povu hotu. Iha oras neʼebá, buat hotu nia rohan sei toʼo mai.” (Mateus 24:14) Ohin loron, Testemuña ba Jeová haklaken kona-ba Maromak nia Reinu, ka ukun iha rai hamutuk 235 liu ho língua hamutuk 500 liu. Livru rua kona-ba Bíblia neʼebé sira halo, naran Livru Haklaken no Sedarlah! fahe ba ema iha mundu tomak, no la iha livru seluk neʼebé fahe barak hanesan neʼe. Sira mós tradús ona Bíblia ba língua maizumenus 100. Testemuña ba Jeová la manán osan hodi halo serbisu neʼe, no sira-nia serbisu hetan apoiu husi ema neʼebé hakarak fó ho laran. Ita bele haree ka lae, katak serbisu haklaken neʼebé halaʼo iha mundu tomak kumpre liafuan neʼebé Jesus fó-hatene nanis?

Bíblia mós fó-hatene akontesimentu sira neʼebé sei lori funu entre Maromak Jeová no sira neʼebé kontra hasoru nia. Hanoin toʼok kona-ba sinál tolu neʼebé sei sai loos iha futuru.

Sinál sira neʼebé Ita sei haree akontese

Sinál 1. Bíblia hatete katak ukun-naʼin sira sei dehan sai “hakmatek no iha dame”. Karik sira hanoin katak sira besik ona atu rezolve problema hotu iha mundu neʼe. Maibé buat neʼebé sei akontese tuirmai hatudu katak sira-nia liafuan neʼe la loos.—1 Tesalonika 5:1-3.

Sinál 2. Tuirmai, governu sira sei ataka relijiaun sira iha mundu. Iha livru Apokalipse koʼalia kona-ba balada, no balada neʼe reprezenta governu sira-neʼe, no feto aat neʼebé tuur iha balada nia leten reprezenta relijiaun falsu sira iha mundu. (Apokalipse 17:3, 15-18) La ho neon, governu sira sei halo Maromak nia hakarak hodi halakon relijiaun sira neʼebé dehan katak sira reprezenta Maromak.

Apóstolu João esplika kona-ba neʼe hodi hatete: “Dikur sanulu neʼebé ó haree: sira no balada sei foti liman hasoru feto-aat neʼe, hodi kolu nia hatais no husik nia isin-tanan; sira sei han nia isin-lolon hodi sunu nia iha ahi laran, basá Maromak tau ona iha sira-nia laran atu halaʼo Nia hakarak.”—Apokalipse 17:16, 17.

Sinál 3. Depois governu sira halakon tiha relijiaun falsu, Satanás sei halibur nasaun sira atu ataka sira neʼebé adora Maromak Jeová.—Apokalipse 7:14; Mateus 24:21.

Oinsá mak ida-neʼe sei kona Ita?

Se Ita seidauk hetan oportunidade atu estuda Bíblia ho didiʼak, karik Ita ladún fiar katak sinál sira neʼebé foin temi sei akontese duni. Maibé ita iha razaun atu fiar katak lakleur tan buat hotu neʼe sei sai loos. Buat barak neʼebé Bíblia fó-hatene nanis neʼebé sai loos ona fó fiar mai ita katak buat sira-neʼe sei akontese duni. *

Entaun, diʼak atu fó tempu hodi buka-hatene tansá Testemuña ba Jeová fiar katak “funu iha loron boot Maromak kbiit waʼin nian” besik ona atu akontese, no tansá ita lalika taʼuk kona-ba neʼe. Husu sira atu fó-hatene ba Ita buat neʼebé Bíblia hatete atu Ita halo hodi sai parte ba povu neʼebé Maromak Jeová sei proteje. (Apokalipse 16:14) Karik buat neʼebé Ita aprende kona-ba neʼe bele troka Ita-nia hanoin kona-ba futuru.

[Nota–rodapé]

[Liafuan neʼebé foti husi pájina 8]

Tuir Ita-nia hanoin, serbisu neʼebé Testemuña ba Jeová halo ohin loron kumpre liafuan neʼebé Jesus fó-hatene nanis ka lae?