Jesus sei hatán oinsá?

Ema barak neʼebé tuir relijiaun sente katak relijiaun tenke envolve an iha buat polítiku. Sira fiar katak relijiaun bele ajuda atu rezolve ema nia problema sira. Maibé, ema balu hanoin katak relijiaun no polítiku tenke ketak malu. Oinsá ho Ita? Tuir Ita-nia hanoin, relijiaun no polítiku bele serbisu hamutuk ka lae?

EMA barak dehan katak Jesus Kristu mak “ema neʼebé importante liu iha relijiaun nia istória”. Hanoin toʼok ita bele husu ba Jesus pergunta tuirmai neʼe: Relijiaun tenke mete iha buat polítiku ka lae? Jesus sei hatán oinsá? Kuandu Jesus sei iha rai, nia fó resposta ba pergunta neʼe liuhusi ninia liafuan no hahalok. Porezemplu, iha diskursu neʼebé Jesus hatoʼo iha foho ida, nia fó matadalan neʼebé ajuda ninia dixípulu sira oinsá atu sai sidadaun neʼebé diʼak no ajuda komunidade. Mai ita koʼalia kona-ba liafuan balu neʼebé Jesus temi iha ninia diskursu neʼe.

 Ajuda ema seluk

Jesus fó-hatene hahalok saida deʼit mak ninia dixípulu sira presiza hatudu iha mundu neʼe. Nia hatete: “Imi masin rai nian, maibé masin lakon karik nia meer, oinsá loos mak sei hameer fali nia? Nia la soʼi ona ba buat ida; masin neʼe soʼi deʼit atu soe ba liʼur atu ema sama nia. Imi mundu nia [naroman] . . . imi-nia [naroman] sei nabilan . . . iha ema sira oin, atu sira haree imi-nia hahalok diʼak sira hodi hahiʼi imi-nia Aman iha lalehan.” (Mateus 5:13-16) Tanbasá mak Jesus kompara ninia dixípulu sira ho masin no naroman?

Jesus nia liafuan neʼe hatudu katak ninia dixípulu sira hanesan ho masin, laʼós ba ema uitoan deʼit, maibé ba ema hotu. No sira hanesan naroman, laʼós ba ema balu deʼit, maibé ba sira hotu neʼebé hakarak hatene Maromak. Hodi kompara sira ho masin no naroman, Jesus hatudu ho klaru katak nia lakohi ninia dixípulu sira atu haketak sira-nia an husi komunidade. Tanbasá?

Hanoin toʼok kona-ba neʼe: Masin la bele halo hahán ruma tahan ba tempu kleur se la tau masin ba hahán neʼe. No ahi-oan la bele halo naroman kuartu ida se ida-neʼe la tau iha kuartu laran. Ho nuneʼe, ita bele komprende tansá Jesus la haruka ninia dixípulu sira atu harii rasik komunidade iha fatin ida. No Jesus mós nunka hatete ba ninia dixípulu sira atu haketak an husi ema seluk no la koʼalia ho ema neʼebé tuir relijiaun seluk. Maibé, hanesan masin presiza kahur ho hahán ruma, no ahi-oan presiza tau iha kuartu laran hodi fó naroman, nuneʼe mós ema kristaun sira presiza envolve an iha sira-nia komunidade hodi sira bele ajuda ema seluk.

“Laʼós mundu neʼe nian”

Maibé, Jesus nia mandamentu atu la bele haketak an husi ema seluk, hamosu pergunta importante kona-ba oinsá ema kristaun nia haree kona-ba buat polítiku. Lakleur antes Jesus mate, nia harohan ba Maromak kona-ba ninia dixípulu sira hodi dehan: “Haʼu la husu atu Ita hasai sira husi mundu, maibé atu Ita hadook sira husi aat-naʼin. Sira laʼós mundu neʼe nian nuʼudar haʼu mós laʼós mundu neʼe nian.” (Joao 17:15, 16) Entaun, oinsá mak ema kristaun sira bele envolve an iha komunidade, no iha tempu hanesan la sai parte husi mundu neʼe? Atu hatene kona-ba neʼe, mai ita hanoin kona-ba pergunta tolu seluk tan:

• Saida mak Jesus nia haree kona-ba buat polítiku?

• Ohin loron, ema kristaun bele hola parte iha buat polítiku ka lae?

• Oinsá mak ema kristaun nia mensajen ajuda komunidade?

[Liafuan neʼebé foti husi pájina 4]

Jesus hatete ho klaru katak nia lakohi ninia dixípulu sira atu haketak an husi ema seluk