Maromak la presiza feen ida atu nuneʼe nia bele iha oan sira tanba nia mak Kriadór ba buat hotu. Maromak kria ema iha dalan neʼebé sira bele halo tuir ninia hahalok. Tan neʼe Adão, ema primeiru neʼebé Maromak kria, bolu nuʼudar “Maromak nia oan”. Hanesan neʼe mós ho Jesus, bolu nuʼudar “Maromak nia Oan-Mane” tanba Maromak kria Jesus ho hahalok neʼebé hanesan ho ninia Aman nian.—Lee Lucas 3:38; Joao 1:14, 49.

Maromak kria Jesus antes nia kria Adão no liuhusi Jesus mak Maromak kria buat seluk hotu inklui mós anju sira. Tan neʼe Bíblia bolu Jesus “Oan boot liu sasán hotu-hotu nian” neʼebé Maromak kria.—Lee Koloso 1:15, 16.

Antes Jesus moris iha Belém, nia moris ona nuʼudar kriatura espíritu ida iha lalehan. Kuandu tempu toʼo, Maromak muda Jesus nia moris husi lalehan ba Maria nia knotak, nuneʼe Jesus bele moris iha rai nuʼudar ema.—Lucas 1:30-32; Joao 6:38; 8:23.

Tanbasá mak Maromak hakarak Jesus atu moris nuʼudar ema iha mundu? Saida mak Jesus nia knaar espesiál? Ita bele hetan resposta ba pergunta sira-neʼe iha Bíblia, no ida-neʼe sei ajuda ita atu komprende no hafolin saida mak Maromak no Jesus halo ona mai ita.