Nínive mak kapitál ba Asíria nia ukun. Sidade neʼe forte tebes no iha palásiu furak barak, templu sira, iha estrada neʼebé luan no moru neʼebé metin. Profeta ebreu naran Naum dehan katak Nínive mak “sidade fakar raan nian”.—Naum (Nahum) 3:1.

Liafuan neʼe loos duni, tanba iha Senaquerib nia palásiu iha Nínive, dezeñu neʼebé bahat iha didin hatudu duni ema Asíria laran-aat. Dezeñu ida hatudu dadur-naʼin neʼebé ema kaer no hanehan ba rai, no ema rasta sai ninia nanál. Liafuan neʼebé bahat iha fatuk sira mós hatudu katak ema tau kail ba dadur-naʼin sira-nia inus ka ibun hodi dada sira ho tali. Ema Asíria tesi liurai sira-nia ulun nuʼudar kastigu no obriga ninia ema-boot neʼebé sai dadur atu tara ulun neʼe iha sira-nia kakorok.

Matenek-naʼin kona-ba Asíria naran Archibald Henry Sayce, esplika kona-ba buat neʼebé ema Asíria halo kuandu sira hadau sidade ida. Nia hatete katak kuandu funu-naʼin sira halo funu, sira hada ema nia ulun iha dalan. Labarik feto no mane sira sunu moris-moris, ka oho iha dalan neʼebé aat liután. Sira prega mane sira iha ai-riin, no ema nia kulit sira lees moris-moris. Sira mós sukit sai ema nia matan, no tesi kotu ema nia liman-ain, inus no tilun.

Maromak haruka ema judeu sira: “Se ó harii uma foun, ó tenke halo mós moru badak neʼebé haleʼu uma-kakuluk, hodi la simu sala kona-ba ema nia raan tanba ema neʼebé monu husi kakuluk leten.” (Deuteronômio [Ulangan] 22:8) Ema judeu iha Bíblia nia tempu sempre uza sira-nia uma kakuluk atu halo atividade oioin. Tan neʼe, moru badak neʼe mak atu halo fatin neʼe seguru.

Ema Israel nia uma barak iha kakuluk neʼebé tetuk. Fatin neʼe mak diʼak atu tuur hodi koʼalia halimar iha loron, simu anin fresku, no halo serbisu uma nian. Kuandu tempu manas, uma-kakuluk mak fatin diʼak atu toba iha kalan. (1 Samuel 9:26) Toos-naʼin sira dala ruma uza uma-kakuluk atu habai figu, uvas no trigu antes atu dulas.—Josué (Yosua) 2:6

Ema mós uza uma-kakuluk atu halaʼo adorasaun ba Maromak neʼebé loos no la loos. (Neemias [Nehemia] 8:16-18; Jeremias [Yeremia] 19:13) Apóstolu Pedro saʼe ba uma-kakuluk iha tempu meiudia atu halo orasaun. (Apostolu 10:9-16) Se uvas nia hun ka ai-tahan mak halo mahon uma-kakuluk, neʼe sei sai fatin diʼak duni atu deskansa.

Livru ida (The Land and the Book) hatete katak ema Israel nia uma iha eskada iha liʼur atu ema bele saʼe ba uma-kakuluk. Hodi nuneʼe, uma-naʼin bele tun husi uma-kakuluk hodi la tama uma laran. Ida-neʼe ajuda ita atu komprende Jesus nia avizu kona-ba halai sees husi sidade neʼebé atu lakon. Jesus hatete: “Ema neʼebé iha uma nia kakuluk, keta tun atu foti buat ida iha uma laran.”—Mateus 24:17.