Livru primeiru husi Bíblia esplika oinsá mak lalehan no rai hahú, hodi dehan: “Iha tempu uluk kedas Maromak kria lalehan no rai.” (Gênesis [Kejadian] 1:1) Nia mós kria ai-horis no animál sira, no ikusliu nia kria ema primeiru, Adão ho Eva. Sira la hanesan ho animál tanba sira bele haleno Maromak nia hahalok sira hanesan domin, no mós iha liberdade atu foti desizaun. Ida-neʼe katak desizaun neʼebé sira foti bele kona sira rasik nia moris. Se Adão ho Eva halo tuir Maromak nia hakarak, sira no sira-nia família bele moris haksolok no hakmatek, no moris ba nafatin ho isin neʼebé perfeitu iha mundu neʼe.

Maibé, anju ida dada ema atu tuir ninia rasik nia hakarak. Hodi halo nuneʼe, nia sai Satanás, katak “Kontradór”. Liuhusi samea, Satanás lohi Eva hodi fiar katak ninia moris sei sai diʼak liu se nia la halo tuir Maromak. Adão ho Eva halo tuir Satanás, no hakotu sira-nia relasaun diʼak ho Kriadór. Tanba ita-nia inan-aman primeiru foti desizaun sala, sira lakon moris rohan-laek no hadaʼet sira-nia sala ba ita, no tan sala, ita hotu mate.

Maibé Maromak fó sai kedas ninia hakarak atu hadiʼa situasaun aat neʼe hodi loke dalan ba Adão nia oan no bei-oan sira atu hetan fali moris rohan-laek. Maromak fó-hatene nanis katak “bei-oan” ida mak sei halakon Satanás no hadiʼa terus hotu neʼebé Satanás, Adão no Eva lori mai. (Gênesis [Kejadian] 3:15) Entaun, sé mak “bei-oan” neʼe? Liutiha tempu balu, ema sei hatene.

Maibé saida mak Satanás halo durante tempu neʼebá? Nia kontinua atu kontra hasoru Maromak, no mundu neʼe sai nakonu lalais ho ema neʼebé aat. Tan neʼe, Maromak deside atu halakon buat aat hotu hodi halo udan boot no rai-nabeen. Nia haruka ema diʼak ida naran Noé atu halo ró boot neʼebé hanesan kaixote boot hodi bele salva ninia an no ninia família, hamutuk ho animál sira neʼebé nia hatama iha ró laran.

Tinan ida liutiha husi tempu neʼebé udan boot komesa tun, Noé ho ninia família sai husi ró atu hela iha rai neʼebé la iha ona buat neʼebé aat. Maibé “bei-oan” neʼebé Maromak promete seidauk mosu.

—Informasaun neʼe husi Gênesis [Kejadian] kapítulu 1-11; Judas 6, 14, 15; Apokalipse 12:9.