Iha Bíblia nia tempu, Maromak uza tesi-lia naʼin sira atu salva ninia povu husi situasaun neʼebé la justisa. (Juízes [Hakim-Hakim] 2:18) Bíblia fó-hatene nanis kona-ba Loron Tesi-Lia nian nuʼudar tempu haksolok bainhira Maromak Jeová sei halaʼo ninia justisa nuʼudar Tesi-Lia Naʼin ba mundu tomak atu salva ita ema.—Lee Salmo (Mazmur) 96:12, 13; Isaías (Yesaya) 26:9.

Maromak hili ona Jesus atu tesi lia ba ema mate no ema moris. (Apóstolu 10:42; 17:31) Ema barak neʼebé mate tiha ona, sira seidauk hatene kona-ba Maromak neʼebé loos. Durante Loron Tesi-Lian nian, Jesus sei fó moris-hiʼas ba ema sira hanesan neʼe atu sira mós bele hatene didiʼak kona-ba Maromak no hadomi nia.—Lee Apóstolu 24:15.

Durante tinan rihun ida nia laran, ema mate sira sei moris hiʼas fali. (Apokalipse 20:4, 12) Sira sei presiza tempu atu aprende kona-ba Maromak nia hakarak no moris tuir. Bíblia fó sai katak ema sira-neʼe sei hetan tesi-lia laʼós tuir hahalok neʼebé sira halo antes sira mate, maibé tuir hahalok neʼebé sira halo depois sira moris hiʼas fali ona.—Lee Roma 6:7.

Bíblia mós esplika kona-ba tempu neʼebé ema sei hetan tesi-lia antes tinan rihun ida hahú. Tempu neʼe sei toʼo mai derrepente deʼit no Bíblia mós bolu tempu neʼe nuʼudar mundu nia rohan. Iha tempu neʼebá, Maromak sei halakon ema aat hotu husi mundu neʼe. (2 Pedro 3:7) Tan neʼe, loloos agora mak tempu ba ita hotu atu hakaʼas an hatudu katak ita hadomi Maromak liuhusi ita-nia hahalok.—Lee 2 Pedro 3:9, 13.