Maromak rasik mak halo funu hasoru ema Ejitu, neʼe hatudu katak tuir Maromak nia haree, iha funu balu mak loos no Maromak la bandu. Maromak mós haruka ninia povu Izraél atu halo funu. Porezemplu, nia haruka sira halo funu hasoru ema Kanaán neʼebé aat tebetebes. (Deuteronômio [Ulangan] 9:5; 20:17, 18) Liután neʼe, Maromak haruka Liurai David atu funu hasoru ema Filístia sira tanba sira sempre haterus ema. Iha tempu neʼebá, Maromak fó-hatene ba David buat saida deʼit neʼebé nia tenke halo atubele manán funu neʼe.—2 Samuel 5:17-25.

Liuhusi istória neʼebé hakerek ona iha Bíblia, ita bele hatene katak iha tempu uluk Maromak halo funu atu halakon ema aat sira neʼebé haterus ka ameasa ninia povu. Hodi halo nuneʼe Maromak proteje ninia povu atu sira bele kontinua halaʼo adorasaun neʼebé loos. Atu hatene kona-ba funu neʼebé tuir Maromak nia haree mak loos, pontu tolu tuirmai neʼe sei ajuda ita.

1. MAROMAK DEʼIT MAK BELE DESIDE SÉ MAK BELE HALO FUNU. Iha tempu ida, bainhira ema Asíria mai ataka nasaun Izraél, Maromak dehan ba ema Izraél: “Imi la presiza luta iha funu neʼe.” Tanbasá? Tanba Maromak rasik mak sei halo funu atu apoia ema Izraél. (2 Crônicas [Tawarikh] 20:17; 32:7, 8) Loloos, Maromak halo funu hanesan neʼe dala barak ona, hanesan nia halo ba ema Ejitu neʼebé temi ona iha leten. No Maromak mós haruka ema Izraél halo funu atu sira bele tama ba rai neʼebé Maromak fó ona ba sira no atu defende rai neʼe.—Deuteronômio (Ulangan) 7:1, 2; Josué (Yosua) 10:40.

2.   MAROMAK DEʼIT MAK BELE DESIDE BAINHIRA MAK BELE HALO FUNU. Maski ema Izraél moris iha terus laran tanba ema aat mak haleʼu sira no haterus sira, maibé sira tenke hein ho pasiénsia toʼo tempu neʼebé Maromak mak deside atu halo funu no salva sira. Sira rasik labele deside atu halo funu ho sira-nia kbiit tanba Maromak la simu no la apoia ida-neʼe. Bíblia mós fó sai katak, bainhira ema Izraél la rona ba Maromak no halo funu tuir sira-nia hakarak, sira la bele manán no lori susar ba sira-nia an. *

3. MAROMAK LAKOHI EMA MATE, INKLUI MÓS EMA AAT. Maromak Jeová mak Kriadór. Nia mak hun ba moris hotu. (Salmo [Mazmur] 36:9) Tan neʼe, nia lakohi ema mate. Maibé iha mundu neʼe, iha ema aat sira neʼebé buka atu haterus no oho ema seluk. (Salmo [Mazmur] 37:12, 14) Tan neʼe, iha tempu uluk, Maromak haruka ema Izraél halo funu atu halakon ema aat sira. Maski nuneʼe, nia “la hirus lalais” no hatudu “laran-sadiʼa” ba ema aat sira neʼebé haterus ema Izraél. (Salmo [Mazmur] 86:15) Porezemplu, antes ema Izraél ataka sidade ida, Maromak haruka ema Izraél hatoʼo uluk “liafuan dame nian” ba ema iha sidade neʼe no fó oportunidade ba sira atu troka sira-nia hahalok, nuneʼe sira la presiza halo funu tan. (Deuteronômio [Ulangan] 20:10-13) Neʼe hotu hatudu katak, Maromak ‘haksolok laʼós tanba ema aat mate, maibé haksolok kuandu ema aat ida fila fali husi ninia dalan no hetan moris’.—Ezequiel (Yehezkiel) 33:11, 14-16. *

Liuhusi ezemplu sira iha tempu antigu, ita bele hatene katak razaun Maromak halo funu tanba hakarak salva ema neʼebé iha terus laran no halakon ema aat. Maibé Maromak deʼit mak iha direitu atu deside sé mak bele halo funu no bainhira mak bele halo funu. Se nuneʼe, neʼe katak Maromak gosta funu no hakarak haterus ema ka lae? Lae. Bíblia dehan Maromak odi violénsia. (Salmo [Mazmur] 11:5) Maibé oinsá ho tempu neʼebé Maromak nia Oan-Mane Jesus Kristu moris iha rai, Maromak mós troka ninia hanoin ka lae?