Iha nasaun barak, governu haruka povu sira atu halaʼo distánsia sosiál no bandu ema atu labele halibur hamutuk. Testemuña ba Jeová hakaʼas an atu halo tuir ida-neʼe. Maski nuneʼe, sira nafatin halaʼo adorasaun hamutuk iha dalan neʼebé seguru liu. Kongregasaun sira halaʼo reuniaun hodi uza aplikasaun vídeo konferénsia hanesan Zoom.

 Atu bele halaʼo reuniaun semana-semana ho seguru, Grupu Administradór deside atu uza osan kontribuisaun hodi sosa akun Zoom ba kongregasaun sira. Arranju neʼe lori benefísiu boot ba kongregasaun sira neʼebé la iha kbiit atu sosa akun vídeo konferénsia ho folin husi dolar 15 toʼo dolar 20 ka liu. Antes neʼe, dala barak kongregasaun sira uza aplikasaun neʼebé gratuitu. Rezultadu mak ema uitoan deʼit mak bele tuir no ida-neʼe ladún seguru. Maibé agora kongregasaun hotu neʼebé uza akun Zoom husi organizasaun bele uza ida-neʼe ho seguru no ema barak liután mós bele tuir reuniaun. Toʼo agora, maizumenus iha kongregasaun 65.000 liu iha nasaun 170 liu neʼebé uza akun Zoom.

 Foufoun Kongregasaun Kairagi iha sidade Manado, Sulawesi Norte, Indonézia uza aplikasaun vídeo konferénsia neʼebé gratuitu. Maibé agora, sira uza ona akun Zoom neʼebé selu. Irmaun Hadi Santoso esplika: “Agora irmaun-irmán sira neʼebé ladún hatene atu uza sasán eletróniku mós bele rona didiʼak ba reuniaun tanba sira la presiza ona login beibeik durante tuir reuniaun ida.”

 Irmaun Lester Jijón, Jr. neʼebé serbí nuʼudar katuas iha kongregasaun Guayacanes Oeste iha Guayaquil, Ekuadór hatete: “Irmaun-irmán barak iha neʼe hasoru problema ekonomia. Tan neʼe, kongregasaun balu labele sosa akun Zoom neʼebé bele halo fasil ba ema hotu iha kongregasaun atu tuir reuniaun. Agora, tanba uza ona akun Zoom neʼebé organizasaun sosa, ema barak bele liga ba reuniaun, ami bele konvida ema barak liután atu tuir reuniaun no la presiza hanoin barak katak ema neʼebé liga ba reuniaun sei liu totál másimu.”

 Irmaun Johnson Mwanza neʼebé serbí nuʼudar katuas iha Kongregasaun Ngwerere Norte iha Lusaka, Zámbia hakerek: “Irmaun-irmán barak hatete beibeik katak ‘organizasaun nia arranju atu uza Zoom halo ami sente besik liután ba irmaun-irmán sira. Liután neʼe, ami mós bele sente katak Jeová hadomi no hanoin ami.’”

 Organizasaun sosa akun Zoom sira-neʼe ho osan neʼebé organizasaun rai atu uza ba dezastre naturais nian. Osan neʼe mai husi irmaun-irmán nia kontribuisaun ba serbisu iha mundu tomak. Ema balu fó kontribuisaun neʼe liuhusi website donate.dan124.com. Obrigadu barak ba irmaun-irmán sira neʼebé ho laran-diʼak fó kontribuisaun sira, kontribuisaun sira-neʼe mós sei uza ba serbisu umanitáriu seluk iha mundu tomak.—2 Korinto 8:14.