Ema nia hahalok diʼak sai menus. Pasiente sira hakilar ba doutór; ema neʼebé han iha restaurante hamoe servente; pasajeiru neʼebé runguranga no ataka ema neʼebé atende iha aviaun laran; labarik sira neʼebé nakar goza, ameasa no ataka mestre; no polítiku-naʼin balu envolve an iha hahalok sira neʼebé lori moe boot, no polítiku-naʼin seluk koko hatudu katak sira iha hahalok diʼak.

 Bíblia fó matadalan neʼebé ita bele tau fiar kona-ba hahalok diʼak neʼebé loos. Bíblia mós esplika tanbasá ohin loron ema la hatudu tan hahalok diʼak.

 Iha mundu tomak, ema nia hahalok diʼak sai menus, katak hahalok neʼebé ema seluk bele simu, loos no iha morál.

•   Tuir peskiza ida husi organizasaun Gallup, ema Amérika sira hanoin katak morál iha Estadus Unidus sai menus liu fali tinan sira seluk durante tinan 22 nia laran.

•   Iha peskiza seluk neʼebé envolve ema naʼin-32.000 liu husi nasaun 28, porsentu 65 hatete katak ohin loron ema nia hahalok diʼak báziku sai menus no neʼe aat liu fali tempu uluk.

 Bíblia fó sai nanis ona kona-ba hahalok neʼebé ita haree ohin loron.

•   “Iha loron ikus sira sei iha problema barak neʼebé susar atu tahan. Tanba ema sei hadomi deʼit sira-nia an, hadomi osan, gaba an, loko an, koʼalia aat Maromak no ema, la halo tuir inan-aman, la hatene fó agradese, . . . la hadomi malu, [no] la kontrola an.”—2 Timóteo 3:1-3

 Atu hetan informasaun liután kona-ba oinsá profesia neʼe kumpre ohin loron, lee informasaun ho títulu “Bíblia fó sai nanis kona-ba ema sira-nia hahalok ohin loron ka lae?”

 Iha mundu neʼebé ema nia hahalok diʼak sai menus, ema barak sente katak Bíblia mak fó matadalan diʼak tebes kona-ba hatudu hahalok diʼak. Bíblia nia matadalan kona-ba morál mak “sempre loos, agora no ba nafatin”. (Salmo 111:8) Haree toʼok ezemplu balu tuirmai:

•   Saida mak Bíblia dehan: “Buat hotu neʼebé imi hakarak ema halo ba imi, imi mós tenke halo ba sira.”—Mateus 7:12.

   Neʼe katak sá: Ita presiza trata ema seluk ho laran-diʼak no respeitu, hanesan ita hakarak ema seluk halo ba ita.

•   Saida mak Bíblia dehan: “Tanba agora imi husik ona hahalok bosok hotu, imi ida-idak tenke koʼalia lia-loos ba malu.”—Éfeso 4:25.

   Neʼe katak sá: Ita presiza hatudu laran-moos iha buat hotu neʼebé ita hatete no halo.

 Atu hatene liután informasaun kona-ba tópiku neʼe, favór lee:

•   Livru Haklaken ho títulu “Iha neʼebé mak ita bele hetan matadalan diʼak?”

•   Informasaun ho títulu “Toleránsia—Oinsá Bíblia bele ajuda”.