Iha loron-domingu, 20 Novembru 2022, Nasoins Unidas nia Konferénsia kona-ba Mudansa ba Klima COP27 remata. Maski sira konsege foti desizaun importante atu kria fundus hodi bele ajuda nasaun kiak sira neʼebé hasoru dezastre husi klima, sira barak rekoñese katak neʼe mós sei la rezolve problema nia hun.

•    “Haʼu kontente ho desizaun kona-ba halo fundus atu ajuda nasaun neʼebé kona dezastre tanba mudansa ba klima. Maibé neʼe mós la toʼo . . . Ita-nia planeta mundu nafatin iha perigu laran.”—António Guterres, sekretáriu jerál Nasoins Unidas, 19 Novembru 2022.

•    “Mundu neʼe besik loos ona atu hasoru dezastre boot tanba klima.”—Mary Robinson, eis-prezidente Irlanda no eis-komisáriu aas liu ba direitus umanus iha UN, 20 Novembru 2022.

 Liuliu joven sira hanoin barak kona-ba planeta mundu nia futuru. Maibé bele ka lae nasaun sira serbisu hamutuk no kumpre sira-nia promesa hodi bele rezolve problema kona-ba klima? Saida mak Bíblia dehan?

 Bíblia fó sai katak maski ema barak hakaʼas an, maibé sira sei hetan susesu neʼebé limitadu deʼit. Haree toʼok razaun rua tuirmai:

•    “Buat neʼebé kleʼuk ona labele halo loos.”—Eclesiastes 1:15.

   Neʼe katak sá: Governu sira labele hetan susesu neʼebé kompletu tanba ema la iha kbiit atu ukun sira-nia an rasik. (Jeremias 10:23) Maski karik nasaun sira bele iha unidade no hakaʼas an hamutuk, sira sei nafatin la iha kapasidade atu rezolve problema iha mundu.

•    “Ema sei hadomi deʼit sira-nia an, hadomi osan, . . . la rona malu.”—2 Timóteo 3:2, 3.

   Neʼe katak sá: Bíblia fó-hatene nanis katak ema barak ohin loron sei hanoin deʼit sira rasik nia diʼak no lakohi serbisu hamutuk atu lori benefísiu ba ema hotu.

 Maibé, ita-nia planeta mundu nia futuru la depende ba promesa husi ema nia governu. Maromak hili ona Ukun-Naʼin neʼebé matenek liu, neʼe mak Jesus Kristu. Kona-ba nia, Bíblia dehan:

•    “Governu mak sei iha ninia kabaas. Ninia naran sei bolu nuʼudar Konsellu-Naʼin neʼebé Kmanek, Maromak Kbiit Boot, Aman Rohan-Laek, Ulun-Naʼin Dame nian.”—Isaias 9:6, nota-rodapé.

 Jesus mak Liurai ba Maromak nia Ukun, ka governu iha lalehan. (Mateus 6:10) Nia iha kbiit no matenek, no nia mós hakarak atu tau matan ba planeta mundu no kriatura hotu neʼebé hela iha mundu neʼe. (Salmo 72:12, 16) Jesus sei dirije ninia governu iha lalehan atu halakon ema neʼebé “estraga daudaun mundu” no hadiʼa mundu nia ambiente atu bele sai moos no furak.—Apokalipse 11:18; Isaias 35:1, 7.

 Atu aprende liután kona-ba solusaun neʼebé diʼak liu hodi bele rezolve problema kona-ba klima, lee informasaun “Mudansa boot kona-ba klima no ita-nia futuru—Saida mak Bíblia dehan?”