•   “Xina fó sai katak anin manas huu makaʼas no udan la tau iha tinan neʼe, no kondisaun aat neʼe mak ba dala terseiru iha Xina nia istória.”—The Guardian, 7 Setembru 2022.

•   “Áfrika parte nordeste nia kondisaun rai-maran akontese ba tinan lima ona.”—UN News, 26 Agostu 2022.

•   “Porsentu 66 husi Europa hetan avizu kona-ba rai-maran, karik neʼe mak kondisaun neʼebé aat liu iha tinan 500 nia laran.”—BBC News, 23 Agostu 2022.

 Matenek-naʼin sira hanoin katak kondisaun rai-maran sei kontinua no bele sai aat liután. Iha ka lae esperansa ba futuru? Saida mak Bíblia dehan?

 Bíblia fó-hatene nanis kona-ba ita-nia tempu:

•   “Sei mosu . . . rai-hamlaha iha fatin oioin.”—Lucas 21:11.

 Kuandu rai sai maran-dekor, neʼe bele hamosu rai-hamlaha. Situasaun neʼe, neʼebé halo ema terus no mate, kumpre duni Bíblia nia profesia.—Apokalipse 6:6, 8.

 Bíblia fó sai razaun tanbasá mak ohin loron iha problema udan la tau no situasaun neʼe sai aat liután:

•   “Ema . . . la iha kbiit atu hili ninia hakat.”—Jeremias 10:23.

 Neʼe katak ema la iha kapasidade atu “hili [sira-nia] hakat”, ka ukun sira-nia an ho susesu. Dala barak sira-nia desizaun mak sai nuʼudar hun ba problema kona-ba rai-maran, ka bee menus.

•   Sientista barak konkorda katak ema nia atividade mak halo planeta mundu nia temperatura saʼe, no rezultadu mak udan la tau iha fatin barak liután.

•   Polítiku-naʼin sira neʼebé kaan-teen no la hanoin kona-ba futuru mak deside atu tesi ai-hun barak, kria poluisaun, uza arbiru rekursu naturais, no rezultadu mak bee sai menus.

 Maibé Bíblia fó esperansa mai ita.

 Bíblia promete katak Maromak sei rezolve krize kona-ba bee. Oinsá?

1.  1. Maromak sei “halakon sira neʼebé estraga daudaun mundu”. (Apokalipse 11:18) Nia sei halakon buat neʼebé kauza rai-maran, neʼe mak ema kaan-teen neʼebé halo hahalok la diʼak hodi estraga mundu nia ambiente.—2 Timóteo 3:1, 2.

2.  2. “Rai-maran neʼebé manas sei sai fali kolan ho duʼut aas.” (Isaias 35:1, 6, 7) Maromak sei hadiʼa fali situasaun aat neʼebé mosu tanba rai neʼebé maran-dekor no sei halo planeta neʼe sai paraízu neʼebé iha bee barak.

3.  3. “Ita tau matan ba rai, halo rai fó rezultadu barak no riku tebes.” (Salmo 65:9) Ho Maromak nia bensaun, planeta mundu sei nakonu ho ai-han neʼebé diʼak no bee neʼebé moos.