Ema barak laran-susar tanba sente katak ema estraga daudaun mundu toʼo lori perigu ba kriatura hotu nia moris. Matenek-naʼin sira kona-ba ambiente hatete katak ema nia atividade oioin halo animál no ai-horis espésie barak sai menus toʼo lakon mohu no situasaun neʼe sai aat liután se kompara ho tempu uluk.

 Ema sei kontinua estraga planeta mundu? Ka loron ida ema sei la estraga tan natureza?

 Matenek-naʼin barak fiar katak tuir loloos ema bele proteje planeta mundu no halaʼo moris iha dalan neʼebé la estraga natureza. Maibé atu halo nuneʼe, ema presiza halo mudansa ba buat barak, hanesan buat balu tuirmai:

•   Halo buat oioin atu tau matan didiʼak ba rai, ai-laran, no tasi.

•   Halo mudansa ba sistema agrikultura no sistema atu prodús enerjia.

•   Troka dalan atu prodús no fahe ai-han, atu nuneʼe ai-horis mak sai nuʼudar ai-han prinsipál duké naʼan no ikan, no hamenus ai-han neʼebé ema konsume no soe.

•   Rekoñese katak moris kontente la depende ba rikusoin neʼebé barak.

 Ita hanoin oinsá? Governu, negósiu-naʼin, no povu hotu bele serbisu hamutuk atu halo mudansa boot hanesan neʼe? Ka neʼe sei nunka akontese tanba iha ema barak neʼebé hatudu hahalok karak-teen, hanoin an deʼit, no la preokupa kona-ba futuru?—2 Timóteo 3:1-5.

 Hodi lee Bíblia, ita bele fiar katak mundu neʼe iha esperansa neʼebé furak. Bíblia esplika tanbasá ema nia hakaʼas an mesak deʼit labele salva mundu neʼe. Bíblia mós esplika kona-ba mudansa saida mak presiza halo no oinsá mak mudansa neʼe sei akontese.

 Tanbasá ema nia hakaʼas an mesak la toʼo atu salva mundu? Maromak Jeová a mak kria mundu, no nia fó knaar ba ema atu tau matan ba mundu neʼe. (Génesis 1:28; 2:15) Sira bele susesu ho sira-nia knaar se sira buka no halo tuir sira-nia Kriadór nia matadalan. (Provérbios 20:24) Maibé duké halo nuneʼe, sira gosta liu atu halo desizaun rasik. (Eclesiastes 7:29) Tuir loloos se la ho Jeová nia ajuda, ema la iha kbiit atu tau matan ba mundu, no sira-nia hakaʼas an sei la lori susesu neʼebé kompletu.—Provérbios 21:30; Jeremias 10:23.

 Mudansa saida mak presiza atu halo? Maromak sei hapara ema neʼebé estraga mundu. (Apokalipse 11:18) Maromak sei la hadiʼa ema nia governu ka ema neʼebé estraga daudaun mundu, maibé nia sei troka buat sira-neʼe hotu. (Apokalipse 21:1) Tan razaun neʼe, Jeová hatete: “Haree bá! Haʼu halo buat hotu sai foun.”—Apokalipse 21:5.

 Oinsá mak mudansa neʼe sei akontese? Jeová sei troka ema nia governu ho governu ida neʼebé iha lalehan, neʼe mak Maromak nia Ukun. Governu neʼe nia liurai mak Jesus Kristu, neʼebé sei ukun mundu tomak.—Daniel 2:44; Mateus 6:10.

 Maromak nia Ukun sei ajuda ema atu aprende kona-ba oinsá bele moris tuir Maromak nia hakarak. Tanba sira rona ba Kriadór no halo tuir ninia matadalan, sira bele tau matan didiʼak ba natureza. (Isaias 11:9) Bíblia hatete kona-ba saida deʼit mak Maromak nia Ukun sei halo atu ema bele moris kontente hodi la estraga planeta mundu. Governu neʼe sei:

•   Fó ai-han ba ema hotu.—Salmo 72:16.

•   Hadiʼa fali rekursu naturais.—Isaias 35:1, 2, 6, 7.

•   Ema no animál sei iha dame.—Isaias 11:6-8; Oseias 2:18.

•   Hapara dezastre naturais.—Marcos 4:37-41.

 Ita bele fiar katak lakleur tan Maromak nia governu sei halo mudansa sira-neʼe. Atu hatene liután, haree informasaun “Bainhira mak Maromak nia Reinu sei ukun mundu neʼe?”