Organização Mundial da Saúde (WHO) hatete katak violénsia kontra feto sira mak hanesan “moras aat ida neʼebé ameasa ema nia saúde iha mundu tomak”. Organizasaun neʼe mós fó sai katak husi feto hotu iha mundu tomak neʼebé kaben-naʼin ka iha namoradu, porsentu 30 mak sai vítima ba hahalok violénsia husi laʼen ka pár iha dalan fíziku ka iha dalan seksuál. No relatóriu husi Nasoins Unidas fó sai katak durante tinan ida nia laran iha mundu tomak, loroloron feto naʼin-137 mak mate tanba sira-nia pár ka membru ba família mak oho. a

 Liuhusi relatóriu hanesan neʼe, ita bele hatene katak violénsia doméstika mak problema boot tebes iha mundu tomak, maibé relatóriu sira la fó-hatene ita oinsá mak violénsia doméstika afeta vítima ida-idak nia moris no halo sira laran-kanek.

 Ita mak vítima ba violénsia doméstika ka lae? Ka Ita hatene ema ruma neʼebé sai vítima ba violénsia doméstika? Se nuneʼe, hanoin toʼok pontu balu tuirmai husi Bíblia neʼebé bele ajuda Ita.

  Se Ita-nia pár halo violénsia ba Ita, neʼe laʼós Ita-nia sala

  Ita bele hetan ajuda

  Ita la mesak

  Iha futuru, Ita sei sai livre husi violénsia doméstika

  Oinsá Ita bele ajuda vítima sira ba violénsia doméstika

 Saida mak Bíblia hatete: “Ita ida-idak sei hatán ba Maromak kona-ba ita-nia hahalok rasik.”—Roma 14:12.

 Hanoin-hetan ida-neʼe: Ema neʼebé halo violénsia ba Ita mak presiza hatán ba ninia hahalok.

 Se Ita-nia pár fó sala ba Ita tanba hahalok violénsia neʼebé nia mak halo, nia hanoin sala. Feen sira merese atu hetan domin, laʼós violénsia.—Koloso 3:19.

 Karik Ita-nia pár halo hahalok violénsia tanba nia iha moras mentál ruma, ka sai boot iha família neʼebé nakonu ho violénsia, ka karik tanba hemu toʼo lanu. Maski nuneʼe, nia tenke hatán ba Maromak kona-ba dalan neʼebé nia trata Ita. No nia presiza halo buat ruma atu troka ninia hahalok.

 Saida mak Bíblia hatete: “Buat hotu sei laʼo ho diʼak kuandu ema barak fó konsellu.”—Provérbios 15:22.

 Hanoin-hetan ida-neʼe: Se Ita sente la seguru ka Ita la hatene atu halo saida, Ita bele hetan ajuda husi ema seluk.

 Tanbasá Ita presiza hetan ajuda husi ema seluk? Se Ita mak vítima ba violénsia doméstika, iha buat barak neʼebé Ita presiza hanoin no tetu. Karik susar ba Ita atu deside saida mak diʼak liu atu halo tanba Ita presiza tetu buat oioin neʼebé importante hanesan tuirmai neʼe:

•   Ita rasik nia seguransa

•   Buat neʼebé diʼak liu ba Ita-nia oan sira

•   Ita-nia situasaun ekonomia

•   Ita-nia domin ba Ita-nia pár

•   Karik Ita hakarak atu hadiʼa Ita-nia relasaun ho Ita-nia pár, se nia troka ninia hahalok

 Karik Ita la hatene atu halo saida no Ita sente katak Ita-nia situasaun mak komplikadu demais. Neʼe normál atu sente hanesan neʼe. Entaun, Ita bele husu ajuda ba sé?

 Belun ka membru família ida neʼebé Ita konfia karik bele proteje Ita husi violénsia no ajuda Ita atu sente kmaan. Hodi koʼalia ba ema ruma neʼebé hanoin Ita, bele sai nuʼudar ajuda boot ba Ita.

 Númeru emerjénsia ba vítima violénsia doméstika karik bele ajuda kedas Ita. Sira neʼebé simu Ita-nia telefone bele ajuda Ita atu hatene buat neʼebé Ita presiza halo atu proteje an husi perigu. No se Ita-nia pár rekoñese ninia sala no hakarak atu troka ninia hahalok aat, karik operadór bele esplika ba nia kona-ba buat neʼebé nia presiza halo.

 Iha mós ajuda emerjénsia seluk neʼebé bele ajuda kedas Ita. Neʼe inklui doutór sira, enfermeira sira, ka sira neʼebé hetan ona treinamentu profisionál.

 Saida mak Bíblia hatete: “Jeová b besik ema sira neʼebé laran-kanek; nia salva sira neʼebé laran-triste.”—Salmo 34:18.

 Hanoin-hetan ida-neʼe: Maromak promete katak nia sei ajuda Ita.

 Jeová hanoin tebes Ita. (1 Pedro 5:7) Nia hatene Ita-nia laran no komprende Ita-nia sentimentu. Nia bele fó kmaan ba Ita liuhusi ninia Liafuan, Bíblia. No nia mós hakarak Ita atu halo orasaun ba nia. Liuhusi orasaun, Ita bele husu matenek no forsa ba Maromak atu bele tahan hasoru Ita-nia situasaun susar.—Isaias 41:10.

 Saida mak Bíblia hatete: “Sira ida-idak sei tuur iha sira-nia uvas-hun okos no iha sira-nia ai-figeira hun okos, no sei la iha ema ida mak halo sira taʼuk.”—Miqueias 4:4.

 Hanoin-hetan ida-neʼe: Bíblia promete katak, lakleur tan ema hotu nia hela-fatin sei sai fatin neʼebé nakonu ho dame.

 Só Maromak Jeová deʼit mak bele halakon ita-nia susar hotu ba nafatin iha dalan neʼebé kompletu. Bíblia promete: “Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras.” (Apokalipse 21:4) Kuandu promesa neʼe sai loos, ita sei haluha hotu buat aat oioin neʼebé akontese ona, no ita sei kontente fali ho buat neʼebé diʼak. (Isaias 65:17) Neʼe mak futuru neʼebé Bíblia promete mai ita.