Iha loron 31 Marsu 2024, irmán Hermine Schmidt mate ho idade 98. Husi Testemuña ba Jeová sira neʼebé uluk tama kampu-konsentrasaun Nazi, nia mak ema ikus neʼebé moris toʼo ohin loron.

Irmán Hermine moris iha loron 13 Novembru 1925 iha sidade Gdańsk, neʼebé agora parte ba rai-Polónia. Ninia aman naran Oskar no ninia inan naran Frieda Koschmieder, no sira mak Testemuña ba Jeová. Sira ajuda nia atu haburas fiar neʼebé metin no sadere ba Jeová. Iha tinan 1939, tropa Nazi okupa Gdańsk, no governu Nazi komesa fó-terus makaʼas ba Testemuña ba Jeová. Durante tempu neʼe, Hermine dedika ninia moris ba Jeová no hetan batizmu iha loron 2 Maiu 1942, ho idade 16.

Tinan tuirmai, iha fulan-Juñu 1943, Nazi kaer Hermine neʼebé tinan 17 no hatama ba prizaun. Iha fulan-Abríl 1944, sira kaer tan nia no iha tempu neʼe sira lori nia ba kampu-konsentrasaun Stutthof. Bainhira nia hanoin fali tempu susar neʼe, nia hatete: “Buat neʼebé akontese iha tempu neʼebá mak aat tebes. Ema hamoe ami no hakanek tebes ami-nia laran. Alemaña nia polísia segredu (Gestapo) halo buat hotu atu harahun haʼu-nia fiar. Haʼu laʼós eroi ida. Haʼu mak feto baibain deʼit. Maibé haʼu la duvida kona-ba buat neʼebé haʼu presiza halo. Haʼu presiza laran-metin nafatin no halo tuir haʼu-nia konxiénsia. Bainhira ita halo buat ruma tuir ita-nia konxiénsia, ita sei hetan dame, neʼe mak dame ho ita-nia an no ho ita-nia Maromak.”

Tinan ida tuirmai, iha fulan-Abríl 1945, Rúsia nia tropa sira mai besik kampu-konsentrasaun Stutthof. Guarda Alemaña SS obriga prizioneiru sira hodi saʼe ró no husik sira iha tasi klaran duké husik tropa Rúsia atu halo livre prizioneiru sira. Irmán Hermine no ema naʼin-370 konsege hetan salvasaun bainhira sira-nia ró toʼo iha Illa Møn, Dinamarka iha fulan-Maiu 1945. Lakleur, irmán Hermine hasoru fali ninia inan-aman.

Iha tinan 1947, irmán Hermine kaben ho Horst Schmidt. Uluk tribunál fó sai katak irmaun Horst sei hetan kastigu-mate, no sira hatama nia iha prizaun Brandenburg-Görden. Razaun tanba nia lakohi tama militár no nia mós lori publikasaun sira kona-ba Bíblia durante tempu neʼebé governu bandu Testemuña ba Jeová nia atividade sira. Nia sai husi prizaun iha loron 27 Abríl 1945, antes tempu neʼebé nia atu hetan kastigu-mate. Irmaun Horst no irmán Hermine halaʼo ona sira-nia moris kaben besik tinan 63 no irmaun Horst mate iha tinan 2010.

Irmaun no irmán neʼe fahe sira-nia esperiénsia ba ema seluk ba tinan barak ona. Iha entrevista ida iha tinan 1998, irmán Hermine esplika kona-ba ninia moris nuʼudar Maromak nia atan neʼebé laran-metin, nia hatete: “Haʼu-nia moris laʼós fasil deʼit, maibé haʼu sente kontente tebetebes, no haʼu sei la troka neʼe ho buat ida.”

Ita agradese tebes ba irmán Hermine nia ezemplu kona-ba laran-metin nafatin durante hetan terus. Hein katak ita mós bele halo tuir ninia ezemplu hodi hatudu aten-brani no iha fiar neʼebé metin katak Jeová sei sempre proteje ninia atan sira neʼebé laran-metin.—Salmo 31:23, 24.