Hanesan notísias fó sai ona, iha tinan 2022 Testemuña ba Jeová iha website ofisiál ba tinan 25 ona. Maibé tinan 10 liubá, iha 27 Agostu 2012 mak ami fó sai website jw.org. Notísias neʼe fahe ba parte tolu neʼebé esplika oinsá website jw.org lori benefísiu ba ema millaun ba millaun.

Vídeo: Iha reuniaun boot 2012, ami fó sai DVD ba lisaun rua primeiru husi série Sai Jeová nia Belun. Maibé ikusmai ema ladún uza ona DVD, no karun liu atu prodús. Bainhira fó sai website jw.org iha Agostu 2012, neʼe halo fasil ba ami atu fahe vídeo sira. Tan neʼe, iha Janeiru 2013, ami fó sai lisaun tuirmai husi série Sai Jeová nia Belun iha jw.org, vídeo neʼe ho títulu Halo orasaun iha tempu naran deʼit. Husi tempu neʼebá, ami fó sai vídeo hamutuk lisaun 40 liu.

Vídeo Tanbasá Estuda Bíblia? mós fó sai iha jw.org iha 2013. Vídeo neʼe mak ekipamentu neʼebé folin-boot iha serbisu haklaken no sai parte ba Ekipamentu Hanorin nian. Husi tempu neʼebá, fahe vídeo sira liuhusi jw.org mak sai parte importante iha serbisu haklaken. Porezemplu, durante kampaña atu fahe panfletu jw.org iha Agostu 2014, ema download no haree maizumenus vídeo 15.000.000.

Irmaun ida neʼebé serbisu atu kria website jw.org hatete: “Neʼe hametin duni haʼu-nia fiar hodi haree oinsá Jeová prepara ita ba akontesimentu sira iha futuru. Bainhira foin kria jw.org, ami la hatene katak ida-neʼe sei sai dalan ida neʼebé importante atu fahe vídeo sira.” Porezemplu, programa primeiru husi JW Broadcasting fó sai iha Outubru 2014, no iha fulan neʼe ema download vídeo hamutuk 37.000.000 liu. Bainhira pandemia COVID-19 komesa iha 2020, ema download no haree vídeo barak liután husi jw.org. Durante 2022, ema download vídeo maizumenus 260.000.000 liu kada fulan.

Publikasaun dijitál: Ohin loron, ema barak prefere liu atu lee online ka lee iha sira-nia telefone duké lee livru sira neʼebé print ona. Husi tinan 2012, lee-naʼin sira bele lee revista online iha jw.org, no dala barak sira bele lee online antes sira simu ida neʼebé print nian. Publikasaun dijitál sira iha jw.org mós halo fasil ba ami atu fó sai aplikasaun JW Library iha 2013. Aplikasaun neʼe no website jw.org mak ekipamentu neʼebé furak tanba ajuda ema atu lee no estuda publikasaun sira.

Foufoun, publikasaun sira neʼebé fó sai iha reuniaun boot tenke hein toʼo fulan-Janeiru tinan tuirmai mak fó sai iha jw.org ka JW Library. Maibé iha reuniaun boot 2015, ema hotu kontente tebes tanba sira bele download kedas publikasaun dijitál neʼebé fó sai iha reuniaun boot neʼe—neʼe inklui livru Yesus—Jalan, Kebenaran, Kehidupan, broxura Kembalilah kepada Yehuwa, no mós vídeo Apa Itu Cinta Sejati? Tinan tuirmai, iha programa JW Broadcasting fulan-Maiu 2016, irmaun Anthony Morris husi Grupu Administradór fó sai broxura ho títulu Resposta ba Pergunta 10 neʼebé Joven Sira Husu no fó anúnsiu katak neʼe bele download kedas. Neʼe mak publikasaun primeiru neʼebé fó sai ba irmaun-irmán iha mundu tomak iha tempu hanesan.

Jeová nia organizasaun iha istória naruk kona-ba uza teknolojia atu haklaken liafuan diʼak no anima irmaun-irmán sira. Ita haksolok atu haree oinsá Jeová nia organizasaun uza website jw.org atu fó ‘ai-han iha tempu loloos’.—Mateus 24:45.

• Vídeo neʼebé download kada fulan

• Vizitante ba loron ida-idak iha fulan ida nia laran

• Fó sai vídeo Halo orasaun iha tempu naran deʼit, Janeiru 2013

• Fó sai aplikasaun JW Library, Outubru 2013

• Kampaña iha mundu tomak atu fahe panfletu jw.org, Agostu 2014

• Fó sai programa primeiru husi JW Broadcasting, Outubru 2014

• Fó sai publikasaun foun husi reuniaun boot, Maiu 2015

• Fó sai iha mundu tomak broxura Resposta ba Pergunta 10 neʼebé Joven Sira Husu, Maiu 2016