Parte primeiru husi série neʼe fó sai katak jw.org fahe vídeo no publikasaun iha formatu dijitál. Parte segundu neʼe sei esplika oinsá jw.org ajuda ona irmaun-irmán iha mundu tomak hatene kona-ba akontesimentu sira neʼebé kona Testemuña ba Jeová.

Informasaun iha tempu neʼebé loos: Parte kona-ba Notísias JW iha jw.org sempre fó sai informasaun neʼebé loos no bele tau fiar kona-ba buat neʼebé foin akontese ba ita-nia irmaun-irmán sira. Neʼe inklui notísias sira kona-ba dezastre naturais no ajuda umanitária, governu husi rai oioin bandu ita-nia serbisu ka hatama irmaun-irmán sira ba komarka laran la ho justisa, no mós informasaun importante seluk. Porezemplu, iha 21 Marsu 2017, irmaun-irmán sira iha mundu tomak lee informasaun ida neʼebé esplika katak governu Rúsia sei bandu Testemuña ba Jeová nia atividade. Informasaun neʼe mós konvida irmaun-irmán sira atu hakerek karta ba governu Rúsia.

Notifikasaun ba Notísias foun: Notifikasaun ba Notísias foun mosu ba dala primeiru iha jw.org iha Jullu 2017. Notifikasaun badak neʼe fó-hatene irmaun-irmán sira kona-ba akontesimentu ruma neʼebé kona Testemuña ba Jeová, maibé ho fraze balu deʼit, la hanesan ho informasaun kompletu iha Notísias JW. Porezemplu, ita hetan notifikasaun bainhira irmaun-irmán sira neʼebé tama komarka sai livre, hanesan iha 31 Dezembru 2020, irmaun Feliks Makhammadiyev sai husi komarka iha Rúsia no hamutuk fali ho ninia feen, Yevgeniya. Durante pandemia, notifikasaun ba Notísias foun fó sai kona-ba programa reuniaun boot online no mós kona-ba desizaun importante neʼebé Grupu Administradór husi Testemuña ba Jeová halo, hanesan avizu kona-ba bele tuir reuniaun iha Reuniaun-Fatin no mós bele haklaken fali husi uma ba uma. Notísias barak mak fó sai oras balu depois akontesimentu importante ruma mosu iha fatin ida. Porezemplu, iha Juñu 2018, jw.org fó sai Notísias foun lakleur depois Tribunál Konstituisaun iha Koreia Súl foti desizaun importante atu deklara katak nasaun neʼe kontra konstituisaun tanba la oferese serbisu sivíl alternativu.

Notísias husi Grupu Administradór: Iha 18 Marsu 2020, jw.org fó sai notísias primeiru husi Grupu Administradór atu anima irmaun-irmán sira durante pandemia COVID-19. Barak mak sente hanesan ho irmán ida neʼebé dehan: “Haʼu sente hanesan iha kolega ida mak check se haʼu diʼak hela ka lae. Haʼu la hatene se haʼu bele tahan durante tempu pandemia se la iha notísias sira-neʼe. Notísias sira-neʼe sempre mai iha tempu neʼebé loos.” Toʼo agora, ita hetan ona Notísias husi Grupu Administradór hamutuk 28.

Tanba mundu neʼe la iha unidade no situasaun iha mundu neʼe troka lalais, susar liu atu hetan notísias neʼebé ita bele tau fiar. Maibé ita sente kontente tanba ita bele simu reportajen no notísias husi jw.org neʼebé ita bele tau fiar no mai iha tempu neʼebé loos. Neʼe ajuda ita ida-idak atu ‘kalma nafatin no tau fiar’ ba Maromak Jeová.—Isaias 30:15.

• Vídeo neʼebé download kada fulan

• Vizitante ba loron ida-idak iha fulan ida nia laran

• Anúnsiu kona-ba kampaña iha mundu tomak atu hakerek karta, Marsu 2017

• Fó sai notísias primeiru husi Grupu Administradór, Marsu 2020

• Anúnsiu kona-ba halaʼo fali reuniaun iha Reuniaun-Fatin, Marsu 2022

• Anúnsiu kona-ba bele haklaken fali husi uma ba uma, Juñu 2022

• Fó sai programa sira ba reuniaun boot online, Juñu toʼo Agostu 2022