Estrada, ponte, no fatin eletrisidade nian barak mak hetan estragu iha Ukránia tanba bomba. Maibé ita-nia irmaun-irmán sira kontinua tuir reuniaun no hola parte iha serbisu haklaken maski ahi mate beibeik.

Anastasia no Debora, neʼebé serbí nuʼudar pioneiru iha Kyiv, hatete katak loron-loron eletrisidade mate ba oras 12 liu. Sira karrega sira-nia sasán eletróniku bainhira ahi lakan no uza internét atu tuir reuniaun. Dala barak internét mate kuandu reuniaun remata.

Susar seluk tan mak bainhira eletrisidade mate, sira labele halo manas uma laran. Irmaun-irmán balu uza jeradór hodi bele sente manas nafatin. Sira balu bá família seluk nia uma atu bele sente manas. Balu tahan deʼit malirin. Irmaun-irmán barak iha uma ka apartamentu neʼebé uza gás atu halo manas, no maski ahi mate mós sira nafatin sente manas.

Iryna neʼebé serbí nuʼudar pioneiru iha Ivano-Frankivsk hakaʼas an atu kontinua hanoin pozitivu. Nia dehan: “Haʼu deside atu la hanoin demais kona-ba buat neʼebé haʼu labele kontrola. Entaun, haʼu fokus deʼit ba buat neʼebé haʼu bele halo agora. Haʼu hanoin kona-ba saida mak haʼu bele halo durante ahi mate, tan neʼe haʼu download nanis publikasaun sira neʼebé haʼu presiza.”

Maski irmaun-irmán sira iha Ukránia hasoru susar barak, sira nafatin okupadu hodi halo serbisu ba Jeová. Ita fiar metin katak Jeová sei kontinua haraik bensaun ba sira-nia hakaʼas an atu “halo buat neʼebé diʼak”.—Galásia 6:9.

Iha loron 6 Dezembru 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-47 mate

• Irmaun-irmán naʼin-97 hetan kanek

• Agora daudaun irmaun-irmán naʼin-11.537 husik sira-nia hela-fatin

• Uma 590 rahun hotu

• Uma 645 hetan estragu boot

• Uma 1.722 hetan estragu uitoan

• Reuniaun-Fatin 7 rahun

• Reuniaun-Fatin 19 hetan estragu boot

• Reuniaun-Fatin 68 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-54.212 atu hetan hela-fatin iha área neʼebé seguru liu

• Irmaun-irmán naʼin-26.811 halai ona ba nasaun seluk no irmaun-irmán husi nasaun sira-neʼe ajuda sira