Husi loron 26 Dezembru 2022, pioneiru regulár no espesiál iha Ukránia tuir Eskola Pioneiru iha área neʼebé seguru. Depende ba situasaun, pioneiru sira halibur hamutuk atu tuir eskola ka liuhusi Zoom. Maski pioneiru sira-neʼe hasoru susar oioin hanesan aviaun funu nian semo bá-mai, eletrisidade mate, susar ekonomia, internét la diʼak, maibé sira haree eskola neʼe nuʼudar prioridade. Rezultadu mak sira hetan bensaun espirituál barak tebes.

Irmán Natalia husi Kryvyi Rih dehan: “Eskola neʼe hanesan palampu neʼebé salva haʼu-nia moris. Neʼe ajuda haʼu atu labele mout iha sentimentu taʼuk no laran-taridu.” Irmán Anastasia husi Chernivtsi mós dehan: “Eskola neʼe hametin haʼu-nia konfiansa katak Jeová hadomi tebes haʼu. Tinan kotuk mak nakonu ho akontesimentu oioin neʼebé aat tebes, maibé eskola neʼe fó buat neʼebé haʼu presiza duni. Haʼu hetan forsa atu kontinua hakaʼas an atu simu Jeová nia bensaun.”

Irmán pioneiru ida naran Svitlana husi Kitsman foufoun sente laran-susar atu tuir eskola bainhira simu konvite ba eskola neʼe. Nia hatete: “Haʼu fó sai ba Jeová haʼu-nia laran-susar, inklui problema ekonomia. Haʼu tau fiar ba Jeová no la arrepende ida-neʼe. Haʼu sente katak Jeová hadomi no tau matan ba haʼu.” Svitlana nia hakaʼas an book ninia laʼen neʼebé laʼós Testemuña, no nia mós komesa tuir reuniaun hamutuk ho Svitlana.

Estudante sira iha Zhytomyr tenkesér muda dala rua ba fatin kiʼik iha rai okos tanba iha avizu kona-ba bomba husi aviaun funu nian. Sira uza fornu ai nian atu hamanas kuartu, no kontinua tuir eskola. Maski sira hasoru susar oioin hanesan neʼe, irmán Valentyna neʼebé foin lalais muda ba Zhytomyr dehan: “Haʼu sei nunka haluha eskola neʼe. Haʼu sente hanesan haʼu iha Jeová nia liras okos.”

Hanesan ho nasaun seluk, pioneiru sira iha Ukránia haksolok tebes bainhira rona kona-ba hamenus oras ba pioneiru sira. Depois rona tiha anúnsiu neʼe, irmán Yulia dehan: “Haʼu-nia laran nakonu ho domin ba Jeová. Ohin dadeer haʼu harohan ba Jeová hodi husu makaʼas ba nia atu haʼu bele kontinua serbí nuʼudar pioneiru. Haʼu hatene katak Nia sei hatán haʼu-nia orasaun, maibé la hatene iha dalan oinsá. Depois rona tiha kona-ba hamenus oras pioneiru nian, haʼu sente agradese liután ba Jeová tanba nia halo buat barak tebes mai haʼu. Anúnsiu neʼe mak hanesan sobremeza kapás iha eskola neʼe nia parte ikus.”

Iha loron 24 Janeiru 2023, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-47 mate

• Irmaun irmán naʼin-97 hetan kanek

• Agora daudaun irmaun-irmán naʼin-8.953 husik sira nia hela-fatin

• Uma 590 rahun hotu

• Uma 645 hetan estragu boot

• Uma 1.722 hetan estragu uitoan

• Reuniaun-Fatin 8 rahun

• Reuniaun-Fatin 17 hetan estragu boot

• Reuniaun-Fatin 76 hetan estragu uitoan

• Komisaun ba dezastre hamutuk 26 mak ajuda daudaun iha Ukránia

• Uma 46 hadiʼa ona

• Reuniaun-Fatin 5 hadiʼa ona

• Komisaun ba dezastre ajuda irmaun-irmán naʼin-54.445 atu hetan hela-fatin iha área neʼebé seguru liu

• Irmaun-irmán naʼin-27.655 halai ona ba nasaun seluk no irmaun-irmán husi nasaun sira-neʼe ajuda sira