Haʼu moris iha Tiranë, sidade kapitál ba rai-Albánia. Haʼu-nia família kiak, no haʼu-nia apá mak ema laran-moos no serbisu makaʼas hodi tau matan ami. Dala barak ami-nia osan la toʼo atu taka ami-nia presiza. Nuʼudar labarik, haʼu triste tebes tanba ami moris kiak. Bainhira haʼu sei kiʼik, dala barak haʼu la iha sapatu no ladún iha ai-han atu han.

 Haʼu komesa naʼok kuandu haʼu-nia idade sei kiʼik. Haʼu hanoin katak hodi halo nuneʼe haʼu bele ajuda haʼu-nia família. Ikusmai, polísia kaer haʼu. Tan neʼe iha tinan 1988, kuandu haʼu tinan 14, haʼu-nia apá hatama haʼu ba eskola ba joven sira neʼebé nakar. Haʼu iha neʼebá ba tinan rua no aprende solda besi. Bainhira haʼu sai husi eskola neʼe, haʼu hakarak moris ho laran moos, maibé haʼu labele hetan serbisu ruma. Ema barak susar atu hetan serbisu tanba problema polítiku iha rai-Albánia. Tanba laran-kraik, haʼu komesa ransu fali ho haʼu-nia kolega sira no haʼu komesa naʼok fali. Ikusmai, polísia kaer haʼu no haʼu-nia kolega no ami tama komarka ba tinan tolu.

 Bainhira haʼu sai husi komarka, haʼu kontinua halo krime. Sistema ekonomia iha rai-Albánia la diʼak, no nasaun neʼe iha problema barak. Durante tempu susar neʼe, haʼu manán osan barak husi atividade ilegál oioin. Loron ida, haʼu ho kolega sira naʼok husi banku, maibé polísia kaer haʼu-nia kolega naʼin-rua, entaun haʼu halai ba rai seluk hodi la tama komarka ba tempu kleur. Iha tempu neʼebá, haʼu kaben ona ho Julinda no ami iha bebé mane ida.

 Ami muda ba rai-Inglaterra. Haʼu hakarak tebes atu komesa moris foun hamutuk ho haʼu-nia feen no oan, maibé susar atu troka haʼu-nia toman aat sira. Lakleur, haʼu halo fali krime hodi faʼan droga ho osan neʼebé iha folin boot.

 Saida mak Julinda sente kuandu haʼu faʼan droga? Julinda hatán: “Haʼu sai boot iha rai-Albánia, no haʼu-nia mehi mak atu sai livre husi moris kiak. Haʼu prontu halo buat naran deʼit atu iha moris neʼebé diʼak liu. Haʼu hanoin katak osan sei halo ami-nia moris sai diʼak liu, tan neʼe haʼu apoia tebes Artan bainhira nia halo buat naran deʼit atu manán osan, inklui bosok, naʼok no faʼan droga.”

 Iha tinan 2002, ami-nia situasaun troka derrepente, no ami-nia mehi no planu sira hotu la sai loos. Polísia kaer haʼu bainhira haʼu lori droga barak no dala ida tan haʼu tama komarka.

 Bíblia komesa troka haʼu-nia moris, maski haʼu la nota kedas ida-neʼe. Uluk, iha tinan 2000, Julinda hasoru Testemuña ba Jeová no komesa estuda Bíblia ho sira. Haʼu la interese atu koʼalia kona-ba Bíblia tanba haʼu hanoin Bíblia nia informasaun sei halo haʼu baruk. Maibé Julinda gosta tebes estuda Bíblia. Nia dehan: “Haʼu boot iha família neʼebé relijiozu, no haʼu hadomi no respeitu Bíblia. Husi kiʼik kedas haʼu hakarak hatene Bíblia nia hanorin sira, no haʼu kontente tebes atu estuda ho Testemuña ba Jeová. Fasil ba haʼu atu komprende hanorin barak husi Bíblia. Buat neʼebé haʼu aprende ajuda haʼu atu halo mudansa sira iha haʼu-nia moris. Maibé, haʼu nafatin hanoin katak osan mak bele halo ita-nia moris kontente. Toʼo tempu neʼebé polísia kaer Artan, mak haʼu foin troka haʼu-nia dalan hanoin neʼe. Haʼu komprende kedas katak Bíblia nia hanorin kona-ba osan mak loos. Ami halo buat naran deʼit atu bele sai riku, maski nuneʼe ami nafatin la sente kontente. Haʼu komprende katak haʼu presiza halo tuir Maromak nia matadalan ho laran tomak.”

 Iha tinan 2004, haʼu sai husi komarka, no koko atu faʼan fali droga. Maibé, Julinda troka ona ninia hanoin, no ninia liafuan kona loos haʼu-nia laran, nia dehan: “Haʼu la presiza tan ó-nia osan. Haʼu só presiza haʼu-nia laʼen, no haʼu-nia oan sira-nia aman atu hamutuk ho ami.” Haʼu hakfodak, maibé nia koʼalia buat neʼebé loos. Haʼu dook husi haʼu-nia família durante tinan barak. Haʼu mós hanoin kona-ba susar neʼebé haʼu hetan tanba buka osan ho dalan ilegál. Entaun haʼu deside atu la ransu tan ho haʼu-nia kolega sira.

 Buat neʼebé kona loos haʼu-nia laran mak bainhira haʼu asiste reuniaun husi Testemuña ba Jeová hamutuk ho haʼu-nia feen no oan-mane naʼin-rua. Iha neʼebá haʼu hasoru ema neʼebé diʼak no laran-loos no haʼu gosta tebes ida-neʼe. Ikusmai, haʼu komesa estuda Bíblia ho sira.

 Haʼu aprende husi Bíblia katak “domin ba osan mak hun ba buat aat oioin, no tanba hadomi osan mak ema balu . . . hakanek sira-nia an ho terus barak”. (1 Timóteo 6:9, 10) Haʼu rekoñese katak liafuan sira-neʼe mak loos. Haʼu sente triste tebes ho sala sira neʼebé uluk haʼu halo tanba neʼe hakanek haʼu-nia família nia laran. (Galásia 6:7) Haʼu komesa troka haʼu-nia moris bainhira haʼu aprende kona-ba Jeová no ninia Oan-Mane, Jesus Kristu, nia domin ba ita. Haʼu komesa hanoin liu kona-ba ema seluk duké haʼu-nia an rasik, no neʼe inklui gasta tempu liután hamutuk ho família.

 Bíblia nia konsellu neʼe ajuda duni haʼu: “Iha imi-nia moris, keta hadomi osan, maibé kontente ho buat neʼebé imi iha ona.” (Ebreu 13:5) Agora haʼu bele hakbesik ba Maromak ho laran neʼebé moos no sente dame. Durante haʼu-nia moris tomak, haʼu nunka sente kontente hanesan agora. Ami-nia moris kaben nian sai metin liu, no ami-nia família mós sai besik liután ba malu.

 Uluk haʼu hanoin katak osan barak mak bele halo ami kontente. Agora haʼu hatene didiʼak katak krime no domin ba osan lori susar boot ba haʼu. Ami laʼós ema riku, maibé haʼu hatene katak ami hetan buat neʼebé folin boot liu, no neʼe mak relasaun diʼak ho Maromak Jeová. Ami-nia família sente kontente tebes tanba bele adora nia.