Durante tempu pandemia COVID-19, irmaun-irmán sira uza dalan seluk atu habelar Bíblia nia mensajen neʼebé bele fó kmaan ba ema. Duké haklaken iha dalan públiku ka vizita ema nia uma, sira haklaken ba ema seluk liuhusi telefone ka hakerek karta. a Ema barak hafolin tebes ida-neʼe, no klaru katak Jeová haraik bensaun ba sira-nia hakaʼas an. (Provérbios 16:3, 4) Mai ita haree esperiénsia balu husi illa ida.

 Antes pandemia, Helen vizita beibeik feto kaben-naʼin ida no oferese estuda Bíblia ba nia, maibé feto neʼe sempre la simu. Maski nuneʼe, loron ida antes serka sanitária hahú, Helen fó Bíblia no livru Ita Bele Komprende Bíblia! ba feto neʼe. Durante serka sanitária, Helen konvida nia dala ida tan atu estuda Bíblia no esplika katak nia bele halaʼo estudu neʼe liuhusi telefone. Feto neʼe simu Helen nia konvite. Feto neʼe gosta loos sira-nia estudu no lakleur nia husu Helen atu estuda hamutuk loroloron. Nia mós komesa tuir reuniaun beibeik liuhusi telefone. Nia mós aplika Bíblia nia hanorin iha ninia moris no mós fahe pontu oioin neʼebé nia aprende ba ema seluk.

 Irmaun-irmán sira iha kongregasaun ida halo planu atu hakerek karta sira ba polísia iha sira-nia komunidade atu fó agradese ba serbisu makaʼas neʼebé sira halo. Polísia sira hakfodak bainhira simu karta sira. Polísia ida dehan ba katuas kongregasaun ida naran Jefferson: “Uluk haʼu hanoin katak Testemuña ba Jeová la gosta polísia.” Jefferson esplika katak neʼe la loos. Polísia sira kontente tebes ho liafuan pozitivu oioin iha karta laran, entaun sira taka karta sira-neʼe iha parede besik odamatan oin hodi ema neʼebé liu bele haree. Polísia seluk dehan: “Karik neʼe sei ajuda ema seluk atu hanoin pozitivu kona-ba ami.”

 Irmán Edna no irmán Ednalyn serbí nuʼudar pioneiru regulár. b Sira la iha rede internét iha sira-nia uma, tan neʼe sira labele tuir reuniaun sira liuhusi vídeo konferénsia. Entaun sira telefone viziñu feto ida neʼebé laʼós Testemuña atu husu se sira bele uza ninia Wi-Fi no sei selu osan ba ida-neʼe. Viziñu neʼe ho laran-diʼak husik sira atu uza internét ho gratuitu. Edna no Ednalyn konvida nia atu tuir reuniaun no nia tuir. Agora viziñu neʼe hamutuk ho ninia oan-mane ida no mós bei-oan naʼin-rua estuda Bíblia ho Testemuña sira no tuir beibeik reuniaun.

 Irmaun-irmán sira konvida sira-nia viziñu, kolega serbisu, no ema seluk tan atu rona diskursu públiku neʼebé hatoʼo liuhusi vídeo konferénsia. Foufoun, Ellaine neʼebé serbisu iha ospitál dada an atu konvida ninia kolega serbisu sira. Nia hanoin katak karik doutór balu iha hanoin negativu kona-ba Testemuña. Maibé nia haruka sms ho liafuan diʼak atu konvida doutór sira iha ospitál. Foufoun, Ellaine laran-rua atu haruka konvite ba doutór naʼin-rua neʼebé feen-laʼen. Tan neʼe nia hanoin didiʼak no halo orasaun, depois mak nia haruka konvite ba sira liuhusi sms. Doutora hatán ba nia liuhusi sms neʼebé dehan: “Entaun ó hakarak haʼu atu tama ó-nia relijiaun ka?” Ellaine esplika katak ema hotu bele asiste reuniaun neʼe, laʼós Testemuña deʼit. Loron tuirmai Ellaine hakfodak tanba feen-laʼen neʼe liga ba reuniaun sedu. Ellaine dehan: “Antes reuniaun remata, doutora sms haʼu hodi dehan: ‘Neʼe mak primeiravés haʼu asiste reuniaun husi Testemuña ba Jeová. Neʼe diʼak. Haʼu kontente. Obrigada tanba konvida haʼu.’”

 Ellaine konvida doutór naʼin-20 atu tuir reuniaun no nia kontente tanba doutór naʼin-16 tuir reuniaun. Nia temi apóstolu Paulo nia liafuan bainhira nia dehan: “Haʼu kontente tanba haʼu ‘sai aten-brani’ atu fahe ‘liafuan diʼak husi Maromak’ ba haʼu-nia kolega serbisu sira.”—1 Tesalónika 2:2.

 Pandemia neʼe lori susar ba ema hotu. Maibé ita-nia irmaun-irmán sira iha illa neʼe no mós fatin seluk mantein sira-nia ksolok no nafatin hanoin pozitivu hodi halo buat neʼebé sira bele halo atu fó kmaan no ajuda ema seluk.—Apóstolu 20:35.