Virginia mak Testemuña ba Jeová ida no nia iha moras ida naran síndroma enkarseramentu. Tanba moras neʼe, ninia isin-lolon tomak matek. Nia labele koʼalia no labele han, maibé nia bele haree no rona, loke-taka ninia matan no book ninia ulun bá-mai uitoan. Uluk nia iha saúde diʼak no enerjia barak. Maibé dadeer ida iha tinan 1997, nia sente ulun-moras tebes hanesan buat ruma sona ninia ulun kotuk. Ninia laʼen lori nia ba ospitál no kalan neʼe nia koma. Semana rua liutiha mak nia foin hadeer iha sala ICU, ninia isin-matek no presiza uza ventiladór médiku atu dada iis. Durante loron balu, nia labele hanoin-hetan buat ida. Nia mós la hatene kona-ba ninia an.

 Virginia esplika buat neʼebé akontese tuirmai: “Neineik-neineik haʼu-nia memória fila fali. Haʼu halo orasaun makaʼas. Haʼu lakohi mate no husik hela haʼu-nia oan-mane neʼebé tinan 9. Atu bele sai aten-brani, haʼu koko hanoin-hetan eskritura oioin.

 “Ikusmai, haʼu sai husi ICU. Haʼu gasta fulan neen iha ospitál oioin no mós fatin reabilitasaun no tuirmai doutór sira haruka haʼu fila ba uma. Haʼu-nia isin tomak nafatin matek, no haʼu presiza ajuda atu halo buat hotu. Haʼu sente laran-kraik tebes. Haʼu sente folin-laek no haʼu hanoin katak Jeová labele uza tan haʼu, no haʼu mós labele ajuda ema seluk. Haʼu hanoin barak tanba haʼu labele tau matan ba haʼu-nia oan-mane.

 “Haʼu komesa lee esperiénsia sira husi Testemuña seluk neʼebé hasoru situasaun susar hanesan haʼu-nian. No haʼu hakfodak ho dalan neʼebé Jeová ajuda sira. Tan neʼe, haʼu hakaʼas an atu haburas hanoin neʼebé pozitivu no tau fokus ba buat neʼebé haʼu bele halo. Antes haʼu sai moras, haʼu ladún iha tempu atu halo atividade espirituál hanesan estuda, haklaken no halo orasaun. Agora, loroloron haʼu iha tempu durante loron tomak. Entaun duké rende an no sai laran-kraik demais, haʼu tau fokus atu serbí Jeová.

 “Haʼu aprende atu uza komputadór. Haʼu ketik hodi uza programa neʼebé bele komprende haʼu-nia ulun nia movimentu. Haʼu sente kole, maibé hodi uza teknolojia hanesan neʼe, haʼu bele estuda Bíblia no fahe haʼu-nia esperansa ba ema seluk liuhusi karta no e-mail. Atu bele komunika ho ema, haʼu iha kartás ho alfabetu. Ema neʼebé hamaluk haʼu sei hatudu letra ida-idak, bainhira nia hili letra neʼebé sala, haʼu sei loke luan haʼu-nia matan. No bainhira nia hili letra neʼebé loos, haʼu sei taka haʼu-nia matan. Ami repete prosesu neʼe toʼo forma liafuan no fraze sira. Irmán balu neʼebé gasta tempu barak ho haʼu sai matenek liu atu siʼik buat neʼebé haʼu hakarak koʼalia. Dala ruma, kuandu sira siʼik liafuan sala, ami hamnasa deʼit.

 “Haʼu gosta tebes atu hola parte iha kongregasaun nia atividade sira. Haʼu sempre tuir reuniaun sira liuhusi vídeo konferénsia. Haʼu bele ketik haʼu-nia komentáriu sira no irmaun ka irmán ruma mak sei lee sai ida-neʼe durante parte pergunta no resposta. Liuhusi vídeo konferénsia, haʼu mós tuir hamutuk ho Testemuña grupu kiʼik neʼebé nonton JW Broadcasting hamutuk fulan-fulan. a

 “Haʼu iha moras neʼe ba tinan 23 ona. Dala ruma, haʼu sente triste. Maibé haʼu bele manán haʼu-nia sentimentu triste liuhusi halo orasaun, ransu ho irmaun-irmán sira no sai okupadu nafatin iha Jeová nia serbisu. Tuir loloos, ho kongregasaun nia ajuda, haʼu konsege serbí nuʼudar pioneiru estra durante tinan 6 liu. Haʼu hakaʼas an atu hatudu ezemplu diʼak ba haʼu-nia oan-mane Alessandro. Agora nia kaben ona no serbí nuʼudar katuas kongregasaun. Nia no ninia feen mós serbí nuʼudar pioneiru regulár.

 “Dala barak haʼu medita kona-ba buat neʼebé haʼu bele halo iha mundu foun. Buat primeiru neʼebé haʼu hakarak atu halo mak koʼalia kona-ba Jeová hodi uza haʼu-nia lian rasik. Haʼu hakarak laʼo iha mota ninin iha fatin neʼebé furak. Durante tinan 20 liu, haʼu han buat neʼebé been deʼit neʼebé hatama ba haʼu-nia isin liuhusi mangeira ida, entaun haʼu hakarak tebes atu kuʼu masán ida no tata ida-neʼe. No tanba haʼu mak ema Italiana, haʼu hein namanas atu han hahán Italianu neʼebé gostu hanesan pizza.

 “‘Esperansa salvasan nian’ ajuda proteje haʼu-nia hanoin. (1 Tesalónika 5:8) Bainhira haʼu imajina haʼu-nia an iha mundu foun, haʼu sente kontente, maski haʼu iha limitasaun fíziku. No haʼu fiar metin katak lakleur tan mundu foun sei mai. Haʼu hein namanas ba “moris neʼebé loloos” neʼebé Jeová promete ona atu fó mai ita liuhusi ninia Ukun.”​—1 Timóteo 6:19; Mateus 6:9, 10.