Testemuña ba Jeová fiar katak Bíblia nia matadalan no ukun-fuan sira bele ajuda ita ema atu halo desizaun sira neʼebé fó glória ba Maromak no mós diʼak ba ita-nia an rasik. (Isaías [Yesaya] 48:17, 18) Matadalan no ukun-fuan sira-neʼe, laʼós ami mak halo, maibé ami moris tuir buat neʼebé Bíblia hatete. Mai ita haree oinsá mak Bíblia nia matadalan no ukun-fuan sira liga ho tópiku kona-ba namora. a

•   Feen ho laʼen neʼebé kaben ona tenke moris hamutuk toʼo mate mak haketak. (Mateus 19:6) Testemuña ba Jeová hatene katak namora mak hanesan hakat ida atu kaben, tan neʼe ami haree ida-neʼe nuʼudar buat neʼebé sériu.

•   Namora só ba deʼit ema neʼebé tinan toʼo ona no prontu atu kaben. Ema neʼebé atu kaben tenkesér “liu ona tempu foin-saʼe nian”, katak liu ona tempu neʼebé hakarak seksuál nian makaʼas liu.​—1 Korinto 7:​36.

•   Ema neʼebé iha liberdade atu kaben deʼit mak bele namora. Maski ema balun soe malu ona tuir lei estadu nian, maibé dala ruma ema neʼe labele kaben fali, tanba tuir Maromak nia haree, ema neʼebé soe malu bele kaben fali só deʼit kuandu ema neʼe ninia pár halo ona sala-foʼer.​—Mateus 19:9.

•   Ema kristaun neʼebé hakarak atu kaben presiza halo tuir mandamentu atu kaben deʼit ho ema neʼebé iha fiar hanesan. (1 Korinto 7:​39) Testemuña ba Jeová halo tuir mandamentu neʼe, no ami fiar katak mandamentu neʼe laʼós koʼalia deʼit kona-ba ema neʼebé respeitu ami-nia fiar, maibé neʼe refere ba ema neʼebé halo tuir buat neʼebé ami fiar no hetan ona batizmu nuʼudar Testemuña ba Jeová. (2 Korinto 6:​14) Maromak sempre dirije ninia atan sira atu kaben ho deʼit ema sira neʼebé iha fiar hanesan. (Gênesis [Kejadian] 24:3; Malaquias [Maleakhi] 2:​11) Ema matenek-naʼin sira mós hanoin katak diʼak liu ba feen-la’en atu iha fiar hanesan hodi bele halaʼo moris kontente nuʼudar kaben-naʼin. b

•   Oan sira tenke halo tuir sira-nia inan-aman. (Provérbios [Amsal] 1:8; Koloso 3:​20) Ba oan sira neʼebé sei hela hamutuk ho inan-aman, ukun-fuan neʼe inklui halo tuir inan-aman nia desizaun kona-ba namora. Neʼe mós inklui iha tinan hira mak oan sira bele komesa namora no saida deʼit mak oan sira bele halo iha tempu namora.

•   Hodi halo tuir Maromak nia matadalan, Testemuña ba Jeová ida-idak hili rasik ema neʼebé sira hakarak atu namora, no se sira simu ka la simu bainhira ema ruma husu atu namora. Bíblia dehan: “Ema ida-idak sei lori ninia todan rasik.” (Galásia 6:5) Maibé bainhira atu halo desizaun kona-ba namora, ema barak buka konsellu husi maluk Testemuña ba Jeová neʼebé iha ona esperiénsia no hadomi sira no hakarak sira atu hetan susesu.​—Provérbios (Amsal) 1:5.

•   Ema balu halo hahalok ladiʼak iha tempu namora, no tuir loloos hahalok sira balu mak sala neʼebé todan. Porezemplu, Bíblia haruka ita atu la simu hahalok seksuál neʼebé aat. Neʼe laʼós deʼit toba hamutuk, maibé neʼe mós inklui hahalok sira seluk neʼebé foʼer entre ema neʼebé seidauk kaben, hanesan lamas malu, kaer oin-lulik no hahalok seluk tan. (1 Korinto 6:​9-​11) No ema neʼebé seidauk kaben maski sira la halo relasaun seksuál maibé se sira kona malu iha dalan neʼebé haburas hakarak seksuál, ida-neʼe mak “hahalok la moos” no Maromak la simu hahalok sira-neʼe. (Galásia 5:​19-​21) Bíblia mós haruka ita labele koʼalia sai liafuan la moos, ka la tuir morál.​—Koloso 3:8.

•   Laran mak makerek. (Jeremias [Yeremia] 17:9) Laran bele lohi ema atu halo buat neʼebé mak sala. Atu hamenus problema, ema neʼebé namora labele gasta tempu mesamesak. Sira presiza buka dalan seluk neʼebé diʼak liu, porezemplu ransu iha grupu nia klaran ka buka ema ida neʼebé tau matan ba sira. (Provérbios [Amsal] 28:26) Ema kristaun sira neʼebé buka hela pár atu kaben presiza hatene kona-ba perigu husi sítiu buka pár nian, liuliu konsekuénsia husi haburas relasaun ho ema neʼebé seidauk koñese ho didiʼak.​—Salmo (Mazmur) 26:4.