Testemuña ba Jeová obriga ema atu troka sira-nia relijiaun ka lae?

LOKE

Lae, ami la halo hanesan neʼe. Iha ami-nia revista Livru Haklaken, ami esplika ona kona-ba neʼe hodi dehan: “Obriga ema atu troka sira-nia relijiaun, neʼe mak sala.” a Ami la obriga ema seluk tanba razaun sira tuirmai neʼe:

Jesus nunka obriga ema seluk atu simu ninia hanorin. Nia hatene katak ema uitoan deʼit mak sei simu ninia hanorin. (Mateus 7:13, 14) Bainhira ninia dixípulu balu la simu Jesus nia liafuan no lakohi tuir tan Jesus, nia husik sira bá, nia la obriga sira atu simu.—João 6:60-62, 66-68.
Jesus hanorin ninia dixípulu sira labele obriga ema seluk atu troka sira-nia fiar. Bainhira ninia dixípulu sira haklaken liafuan diʼak husi Maromak, sira labele obriga ema atu simu, sira tenke haklaken deʼit ba ema sira neʼebé hakarak simu.—Mateus 10:7, 11-14.
Troka fiar tanba ema seluk mak obriga, neʼe saugati deʼit, tanba Maromak hakarak simu ema neʼebé adora nia ho laran.—Deuteronômio (Ulangan) 6:4, 5; Mateus 22:37, 38.

Ami haklaken atu ema seluk troka sira-nia relijiaun ka lae?

Ami hatoʼo duni Bíblia nia mensajen “toʼo rai nia rohan”, hodi “hanorin iha ema nia oin no husi uma ba uma”, tuir buat neʼebé Bíblia hanorin. (Apóstolu 1:8; 10:42; 20:20) No hanesan ho ema kristaun sira iha tempu uluk, ohin loron mós ema balu duun matak ami katak ami obriga ema seluk atu troka sira-nia fiar. (Apóstolu 18:12, 13) Maibé, neʼe laloos, tanba ami nunka obriga ema atu tuir ami-nia fiar. Liután neʼe, ami hatene katak ema ida-idak presiza duni hatene kona-ba saida mak Bíblia nia hanorin atu nuneʼe sira rasik bele hili sira-nia dalan tuir buat neʼebé sira hatene ona.

Ami la obriga ema atu troka sira-nia relijiaun. Ami mós la halaʼo atividade polítiku nian hodi uza relijiaun nia naran. Liután neʼe, ami la fahe sasán ka halaʼo programa atu ajuda komunidade hodi dada ema atu tama relijiaun. Ami la hanesan duni ho grupu relijiaun balu neʼebé hanaran an kristaun maibé halo buat hirak-neʼe hodi la tuir Jesus nia ain-fatin. b

Ema ida-idak iha direitu atu troka ninia relijiaun ka lae?

Profeta Abraão husik ninia família nia relijiaun

Sin, Bíblia mós hatudu katak ema hotu iha direitu atu troka sira-nia relijiaun. Iha Bíblia laran hakerek ona kona-ba ema barak neʼebé hili atu la moris tuir família nia relijiaun no sira rasik mak hili atu adora Maromak neʼebé loos. Ezemplu balu mak Abraão, Rute, ema balu husi sidade Atenas no apóstolu Paulo. (Josué [Yosua] 24:2; Rute [Rut] 1:14-16; Apóstolu 17:22, 30-34; Galásia 1:14, 23) Laʼós neʼe deʼit, Bíblia mós hakerek katak ema iha direitu atu husik adorasaun neʼebé loos maski neʼe mak desizaun neʼebé ladiʼak.—1 João 2:19.

Deklarasaun Universál ba Direitus Umanus, neʼebé Nasoins Unidas hanaran “fundasaun ba lei internasionál direitus umanus” mós apoia ema ida-idak nia direitu atu troka sira-nia relijiaun. Deklarasaun neʼe dehan katak ema idak-idak iha “liberdade atu troka ninia relijiaun ka fiar” no iha direitu “atu buka, simu, fahe informasaun no ideia”, inklui mós kona-ba hanorin relijiaun nian. c Neʼe katak ema hotu tenke respeitu ema seluk nia direitu atu kaer metin ba buat neʼebé sira fiar ona no ema nia direitu atu simu ka la simu ideia ruma.

Se ema ida troka ninia relijiaun, neʼe hatudu katak nia la respeitu ba kostume ka tradisaun família nian ka lae?

Lae. Bíblia haruka ita atu respeitu ema hotu, la haree ba sira-nia relijiaun mak saida. (1 Pedro 2:17) Laʼós neʼe deʼit, ami Testemuña ba Jeová mós hakaʼas an halo tuir Bíblia nia matadalan atu hatudu respeitu ba inan-aman, maski sira-nia fiar la hanesan.—Éfeso 6:2, 3.

Maski nuneʼe, laʼós ema hotu apoia Bíblia nia hanorin kona-ba neʼe. Porezemplu, feto ida neʼebé boot iha rai-Zámbia hatete: “Ba ema iha haʼu-nia komunidade, se sira hatene ema ida troka relijiaun, . . . sira haree ema neʼe nuʼudar ema neʼebé la laran-metin, traidór iha família no mós komunidade laran.” Bainhira feto neʼe sei joven, nia hasoru problema hanesan neʼe tanba nia komesa estuda Bíblia ho Testemuña ba Jeová no foti desizaun atu troka ninia relijiaun. Nia hatutan tan: “Haʼu-nia inan-aman sempre hatete mai haʼu katak haʼu halo ona sira triste no hamoe sira. Neʼe halo haʼu laran-susar tanba haʼu hakarak tebes sira respeitu ba haʼu-nia desizaun neʼe. . . . Ikusmai, haʼu hili atu laran-metin nafatin ba Maromak Jeová duké laran-metin ba família nia relijiaun no tradisaun. Maibé neʼe laʼós katak haʼu la respeitu ka husik ona haʼu-nia família.” d

a Haree livru Menara Pengawal, 1 Janeiru 2002, pájina 12, parágrafu 15.

b Porezemplu, maizumenus iha tinan 785 lK, Liurai Charlemagne fó sai lei ida katak, se ema iha rai-Saxónia lakohi simu batizmu nuʼudar ema kristaun, sira tenke hetan kastigu-mate. No mós, iha tempu neʼebé ukun-naʼin sira halo funu iha Roma nia ukun, Augsburgu nia Dokumentu Dame nian neʼebé ukun-naʼin sira fó sai iha tinan 1555 lK hatete katak ema katóliku ka ema protestante deʼit mak tenke sai ukun-naʼin ba territóriu ida-idak, no ema hotu tenke tuir sira-nia ukun-naʼin ida-idak nia relijiaun. Sira neʼebé lakohi tuir sira-nia ukun-naʼin nia relijiaun tenke duni sai tiha husi rai neʼebá.

c Iha nasaun barak mós fó ona direitu umanus ba povu hotu, hanesan iha rai-Áfrika, Amérika, Arábia, Ázia no Europa. (African Charter on Human and Peoples’ Rights, the American Declaration of the Rights and Duties of Man, the 2004 Arab Charter on Human Rights, the ASEAN Human Rights Declaration, the European Convention on Human Rights, International Covenant on Civil and Political Rights) Maibé, realidade mak nasaun barak neʼebé asina ona deklarasaun hirak-neʼe dala ruma la halo tuir no la fó direitu ba povu.

d Maromak neʼebé loos nia naran mak Jeová, no naran neʼe hakerek iha Bíblia.