Misy mpikaroke mirehake fa afake mampiasa ty fahaia’e mamantatse fofogne o amboao mba hahafantara’e ty tao ty amboa hafa, ty fihetseham-po’e, naho tihoe lahi’e vao reke sa vave’e. Azo ampiofagnegne hamantatse bomba naho rongony aza o amboao. Ty maso o ndatio ro ampiasae’e mba hahafantara’e ze raha magnodidigne aze. Ty ahy o amboao ty oro’e ro tena miasa.

 Dineho zao: Mihoatse lavitse noho ty antikagne ty fahaia o amboao mamantatse fofogne. Mirehake ty Manam-pahaiagne Amerikana Miomba ty Fomba Fanao naho ty Teknolojia fa vita o amboao ty “mamantatse ty raha ila’e agnate ty raha raike tapetrisa tapetrisa ao. Mitovy amy tihoe maharey tsiro siramamy ampahaefa ty sotrokely eo ho eo agnate ty rano pisiny raike filagnosagne amy ty Fihisagne Olimpika ao ze raha zay.”

 Nagnino moa ro tena miambake hoe izay ty fahaia o amboao mamantatse fofogne?

•   Lendegne ty oro o amboao, le mora maharey fofogne.

•   Misy lalan-drivotse roe ty amy ty oro o amboao ao: Ty raike fifoha’e rivotse, le ty raike fitsanogna’e fofogne. Naho fa magnantsogne raha reke, le mandeha amy i faritse misy sela mpamantatse fofogne amy i lavagn’oro’ey aoy i rivotsey.

•   Mirefe 130 santimetatse miheregne indroe ndra mahery izay i faritse mpamantatse fofogne amy ty oro o amboao aoy. Faie ty ahy o ndatio dime santimetatse miheregne indroe avao.

•   Va’e hihoatse ty 50 ty hamaro ty sela mpamantatse fofogne amo o amboao ao naho oharegne amy ty antikagne.

 Ze raha rezay iaby ty ahavità o amboao magnambake ty raha sambe hafa agnate o fofogneo ao. Misy manam-pahaiagne zao ohatse, mirehake tie naho fofon-dasopy ty reintikagne, le ty fangaro’e tsikiraidraike agnate’e ao ty rey o amboao.

 Mirehake ty mpikaroke amy ty fikambanagne raike mpanao fikarohagne miomba o kanserao ao fa “agnisa ty fitaovagne mpamantatse fofogne tena fara izay ty soa ambone tane eto” ty betro o amboao vaho ty oro’e naho fa miara-miasa. Mamboatse ‘oron-draha’ elektronike zao o mpahay siansao mba hamantaragne bomba naho entagne angalaregne aondragne vaho aretegne, agnisa izay o kanserao.

 Akore ty heve’o? Vokatse ty evolisiona vao ty fahaia o amboao mamantatse fofogne, sa nisy namorogne?