Ahandrefa i Amerika Avaratse agne ty misy o karazam-boagne (Phloeodes diabolicus) iohoe. Arake ty fikarohagne natao o mpikarokeo, le mahaleo raha mavesatse miheregne in-39 000 ty lanja’e reke. Ndra tie lià ty tobile ka aza reke, le mbe tsy mahafate aze zay. Akore ty mahavy aze hahazaka raha mavesatse hoe izay?

 Misy hara’e ty ambone’e atoa naho ty ambane’e ao. Le misy raha mampifandrambe aze ty amy ty sisi’e havia naho havana. Misy karaza’e telo o raha mampifandrambe i sisi’ey reo. Gagne ty karaza’e voaloha’e, le izay ty miaro ty taova’e naho fa misy raha manindry ty vata’e. Le i faharoey tsy mihenjagne, le izay ty mahavy aze mora miforetse. Le ty karaza’e fahatelo afake mihenjagne mafe ro sady afake migolebagne. Le izay ty mahavy aze ho afake hampihetseke i hara’e amboney ndra hisisike amo o hataeo ao ndra ampagnivoa o vatò ao.

 Ankoatse izay ka, le misy raha maromaro mifampilipilitse ty ampagnivoa i hara’e an-dambosi’e aoy manahake o amo o fihisagne atao tihoe puzzle-o. Noho ze raha zay, le manjare miparitake magneneke i vata’ey ty favesa i raha manindry azey. Misy proteina mampipiteke aze ka i raha mifampilipilitse rey. Naho fa misy raha manindry aze o biby iohoe, le misy riatse kedekedeke ty amy i proteinay faie mikatogne avao zay naho avy eo. I proteinay avao ka ty mahavy i hara’ey hahazaka i raha mavesatse manindry azey.

 Rehafe o mpikarokeo fa va’e ty hara o karazam-boagne iohoe ty tsikombe o manam-pahaiagneo naho fa iareo hamboatse raha mafe tsy tsiela mihomake. Agnisa izay ohatse o ragiragio, o tobileo naho o tragno jabajabao.

 Akore ty heve’o? Nisinisy hoaze avao vao ty hara o karazam-boagne iohoe? Sa nisy namorogne?