Mirehake ty Baiboly fa tean’Andrianagnahare ‘hifaly ty fijangajangagne’ o ndatio. (1 Tesalonianina 4:3) Naho fa mampiasa ty rehake tihoe “fijangajangagne” ty Baiboly, le tafilitse amy izay ty fagnitsakitsaham-baly, ty lahilahy sambe lahilahy mifampila ndra ty ampela sambe ampela mifampila, naho ty filagne atao ty ndaty tsy mpivaly.

•  Nagnino ro lahibey aman’Andrianagnahare tihoe mpivaly ara-dalàna vao ty ndaty roe sa tsy mpivaly ara-dalàna?

•  Mete vao tihoe miharo tragno hey aloha mba hahafantaragne tie mifagnentagne vao sa tsy mifagnentagne?

•  Akore ty hahamafe oregne o fanambaliagneo?

•   Andrianagnahare ty namorogne o fanambaliagneo. Nanao izay reke naho fa nampiharo i Adama naho i Eva ho mpivaly. (Genesisy 2:22-24) Tsy fikasan’Andrianagnahare tihoe hiharo toboke ty lahilahy raike naho ty ampela raike ie amy izaò tsy mpivaly.

•   Fantan’Andrianagnahare ty raha tena mahasoa o ndatio. Naho fa namorogne o fanambaliagneo reke, le tea’e haharetse io mba handrambe soa naho ho voaro o keleiagneo. Dineho ty ohatse raike toy: Misy fotoagne tikagne naho fa mivily fanake, le misy toromareke boake amy i mpamboatse azey ty miarake ama’e sady manoro antikagne tie akore ty fomba ampiharoagne aze. Magnomey toromareke antikagne ka ty Andrianagnahare tie akore ty hahasambatse ty keleiagne. Mandrambe soa avao ze magnorike ty fitsipi’e.​—Isaia 48:17, 18.

•   Va’e hisy voka’e raty ty filagne atao ty ndaty tsy mpivaly. Agnisa izay tihoe mivesatse faie tsy niriegne, aretegne azo boake amy ty filagne, vaho rare fo. a

•   Fandaharagne nataon’Andrianagnahare o filagneo mba hahafaha o mpivalio hiterake. Masigne o aigneo tie aman’Andrianagnahare, sady fagnomezagne sarobily tihoe afake miterake. Tean’Andrianagnahare hagnaja o fagnomezagne iohoe tikagne, le tsy toko’e hanao ze tsy hampisy dika’e aze.​—Hebreo 13:4.

 Tsy tihoe toko’e hiharo tragno agnate ty fotoagne elaela ty ndaty roe tsy mpivaly ara-dalàna, vaho izay ho sambatse ty tokantragno’e. Vao mainke hifankatea iareo naho sambe magnaja i voadim-panambaliagney sady miarake mipay vahaolagne naho fa miatreke raha sarotse. b Amy izay iareo tsy hieretseretse ty hisarake.​—Matio 19:6.

 Tsy misy fanambaliagne voririke. Faie afake ho sambatse o mpivalio naho magnorike ty toroheve ty Baiboly. Iretoa ty ila’e amy izay:

•   Ze mahasoa i vali’o hey aloha ro eretseretegne vaho izay ty azo.​—1 Korintianina 7:3-5; Filipianina 2:3, 4.

•   Mikezaha hifankatea naho hifagnaja.​—Efesianina 5:25, 33.

•   Mieretsereta hey vaho izay mirehake.​—Ohabolana 12:18.

•   Mikezaha hanam-paharetagne naho ho vognogne hamela heloke.​—Kolosianina 3:13, 14.