Nanao sorogne ty fiai’e ty Jesosy mba hamonjeagne ze ndaty mankatò. (Matio 20:28) Izay ty mahavy ty Baiboly hirehake tie “mpamonje ty tontolo toy” ty Jesosy. (1 Jaona 4:14) Rehafe ty Baiboly ka tie: “Tsy misy ndaty hafa hahazoagne famonjeagne, satria tsy misy agnaragne hafa hahazoantikagne famonjeagne amy ze agnaragne nimeigne ty ndaty ambane lagnitse etoy.”​—Asan’ny Apostoly 4:12.

 ‘Mate hoahy ze’ maneho finoagne aze ty Jesosy. (Hebreo 2:9; Jaona 3:16) Faie ‘nanangagne aze tamy ty mate” ty Andrianagnahare, le nanjare anjely an-dagnitse agne indraike reke naho fa niavy eo. (Asan’ny Apostoly 3:15) ‘Afake mamonje ze magnarine an’Andrianagnahare amy ty alala’e areke reke’ amy ie an-dagnitse agne zao, “satria velogne nainai’e mba hihalale hoahy iareo.”​—Hebreo 7:25.

Nagnino tika ro mipay i Jesosy hihalale ho antikagne?

 Mpanota tika iaby. (Romanina 3:23) Manjare tsy afake mifandrambe aman’Andrianagnahare tika noho o ota iohoe. Io ka ty mahavy antika ho mate. (Romanina 6:23) Hasoan-draha fa eo ty Jesosy hagnampe, ndra ‘hisolovava’ ze maneho finoagne i sorogne nanoe’ey. (1 Jaona 2:1, Dikan-drehake Protestanta) Mihalale hoahy iareo reke, ty dika izay mangatake aman’Andrianagnahare mba hijanjigne ty vavake anoe iareo naho hamela ty helo iareo. Ty anto’e, fa nagnomey sorogne ty fiai’e hoahy iareo reke. (Matio 1:21; Romanina 8:34) Ekén’Andrianagnahare ty fihalalea i Jesosy satria mifagnarake amy ty zoton’arofo’e. Ty anto’e, ‘tamy ty alala’e ty namonjeagne ty tontolo toy’, sady izay ty tena nagnirahagne aze tan-tane etoy.​—Jaona 3:17.

Naho fa mino i Jesosy vao rehe le fa voavonje zay?

 Aha’a. Maregne fa toko’e hino i Jesosy tika mba ho voavonje. (Asan’ny Apostoly 16:30, 31) Faie tsy ampe zay. Hoe ty Baiboly: “Mate ty vatagne naho fa tsy misy aigne, hoe izay ka fa mate ty finoagne naho tsy atoro amy ze raha atao.” (Jakoba 2:26) Iretoagne areke ty raha tsy maintsy atao mba hahavoavonje azo:

•   Mianara ty miomba i Jesosy naho i Jehovah Rae’e.​—Jaona 17:3.

•   Ampitombò ty finoa’o iareo.​—Jaona 12:44; 14:1.

•   Atorò fa manam-pinoagne rehe, le oriho ty lily iareo. (Lioka 6:46; 1 Jaona 2:17) Nampianare i Jesosy tie tsy ze mitoka aze tihoe “Tompo” ro ho voavonje, fa ‘ze manao ty zoton’arofo i Rae’e an-dagnitse agney.’​—Matio 7:21.

•   Atorò lognandro tie manam-pinoagne rehe ndra tie miatreke raha sarotse aza. Hoe ty Jesosy: “Ze miaretse hatrake am-para’e ro hovonjegne.”​—Matio 24:13.