Misy porofo tsy azo lieregne ty amy Baiboly ao mampiseho fa tena misy ty Andrianagnahare. Mandrisike antikagne io mba hino an’Andrianagnahare. Faie tea’e hampiasa soa ty saintikagne tika fa tsy hino fahatane avao ze raha rehafe o fivavahagneo. (Romanina 12:1; 2 Petera 3:1) Dineho retoagne:

•   Tsy maintsy misy ty Mpamorogne kanao milamigne soa ze kila raha sady misy ty raha managne aigne. Hoe ty Baiboly: “Tsy kandrahaegne, fa sambe nisy namboatse ze kila tragno, faie Andrianagnahare ty namboatse ze kila raha iaby.” (Hebreo 3:4) Tsotra o rehake reo faie trea o manam-pahaiagneo tie tena mampieke. a

•   Fa voajagnahare amantikagne ao tihoe mipay raha ara-pagnahy. Izay ty raha paliaentikagne ankoatse ty raha ilae ty vatantikagne. Manao izay ohatse tikagne naho fa te hahafantatse ty anto’e namorognagne antikagne, sady naho ohatse ka tika “mahatsapa fa mipay an’Andrianagnahare”, le te hahafantatse aze naho te hivavake ama’e. (Matio 5:3; Apokalypsy 4:11) Noho itikagne mirehake raha ara-pagnahy ty magnaporofo fa misy ty Andrianagnahare. Trea boake amy izay ka fa Mpamorogne bey hatea reke, le magniry hagnomey fahafaham-po ze raha ilaentikagne.—Matio 4:4.

•   Misy faminaniagne amy ty pitsopitso’e maro ty amy Baiboly ao, sady nisorategne tamy ty taonjato maro mialoha i faminaniagne rey faie tanterake iaby. Tsy maintsy boake aman’Andrianagnahare i faminaniagne rey kanao tanterake amy ty pitsopitso’e.—2 Petera 1:21.

•   Mahafantatse ty raha tsy nitaka ty ndaty tamy ty andro’e ka o mpanoratse Baibolio. Maro tamy iareo ohatse ty nino fa mipetrake ambone ty elefanta ndra lambo ndra agnombe ty tane toy. Faie mirehake ty Baiboly fa “tsy misy raha ihantogna’e ty tane toy.” (Joba 26:7) Atoro ty Baiboly soa ka fa “bontolitoly” ty tane toy. (Isaia 40:22) Maro ty mino fa tsy maintsy boake aman’Andrianagnahare ty nahafantara o mpanoratse Baibolio ze fagnazavagne miambake zay.

•   Maro ty fagnonteneagne mampivali-doha o ndatio sady tsy hino an’Andrianagnahare sasa reke naho fa tsy mahazo ty vale’e mahafa-po. Faie mamale i fagnonteneagne sarotse rey ty Baiboly. Agnisa izay tihoe: Naho bey hatea sady fara’e mahery ty Andrianagnahare, nagnino ro misy o fijaleagneo naho o haratiagneo? Nagnino o fivavahagneo ro mahavy o ndatio hanao raty fa tsy hanao soa?—Titosy 1:16.