Risihe ty Baiboly tika mba ho tea magnomey, sady anto’e soa ty toko’e hanoantikagne izay. Nirehake ka ty Jesosy tie “mahasambatse vata’e ty magnomey ty amy tie mandrae.” (Asan’ny Apostoly 20:35) Tsy i ndaty meagne rahay avao areke ro fale fa ndra i ndaty magnomeỳ ka.​—Ohabolana 11:25; Lioka 6:38.

•  Inogne ty mahasoa ty magnomey?

•  Misy maharaty aze vao ty magnomey?

•  Andinin-teny mandrisike antika ho tea magnomey

 Soa ty magnomey naho vokatse ty fo ty anoagne aze. Mirehake ty Baiboly tie: “Lonike ty tsikiraidraike sambe hanao ze fanapahan-keve’e tam-po’e ao, tsy amy ty alahelo ndra sinere, fa ty mpagnomey am-pifaleagne ro tean’Andrianagnahare.”​—2 Korintianina 9:7.

 Hankasitrahan’Andrianagnahare ka ty fivavahantikagne naho tea magnomey tika sady boake amy ty fo ty anoantikagne aze. (Jakoba 1:27) Fale reke naho fa matarike amy ze sahiragne tika. Hoe mampitrosa vola an’Andrianagnahare tika naho manao izay. (Ohabolana 19:17) Mirehake ty Baiboly tie ty vata tegna’e ty hagnonetse ze nimeintikagne.​—Lioka 14:12-14.

 Eka, naho hatea tegna ty mahavy antika hagnomey. Ohatse amy izay tihoe:

•   Mba hotrea o ndatio tie matarike.​—Matio 6:2.

•   Mba hahazoagne tombo’e.​—Lioka 14:12-14.

•   Mba ho voavonje.​—Salamo 49:6, 7.

 Naho ohatse fa haintikagne tie raha tsy tean’Andrianagnahare ty hampiasà i ndatỳ i raha homeigne azey. Ohatse amy izay tihoe mba hilokàgne ndra hifohagne rongony ndra hinomagne toake maro loatse. (1 Korintianina 6:9, 10; 2 Korintianina 7:1) Tsy mete ka ty magnomey vola o ndaty kamo miasao, ie amy izao reke afake miasa soa.​—2 Tesalonianina 3:10.

 Naho tondregne magnomey ty hafa avao tika, le i keleiantikagney ka ro manjare tsy voakarakara soa. Mirehake ty Baiboly tie tsy maintsy mamelogne ty keleia’e o loha ty keleiagneo. (1 Timoty 5:8) Tsy mete areke naho ty ndaty hafa indraike ro mea’e raha maro, le i keleia’e rey zara’e naho mea’e ndra tena tsy mea’e. Nirehake ka ty Jesosy tie tena raty naho tsy mete magnomey ze raha ilae ty rae aman-drene’e fa antetse ty ndaty raike, satria nao zao hoe reke fa natoka’e ho an’Andrianagnahare ty fanagna’e iaby.​—Marka 7:9-13.