Mamoresé o Ndatio mba Hiova Fivavahagne vao o Vavolombelo i Jehovah-o?

MANDEFA

Aha’a, tsy manao izay zahay. Izao ty rehafe ty Fitalakesan-davitse, i gazete’ay tena miparitakey: “Tsy mete ty mamoresé o ndatio hiova finoagne.” a Tsy mamoresé o ndatio hiova finoagne zahay noho ty anto’e retoagne:

Tsy namoresé o ndatio hagnorike ty fampianara’e ty Jesosy. Satria fa nifanta’e fa ho tsy ampe avao ty ndaty hitsanogne ty hafatse torie’e. (Matio 7:13, 14) Niboseke noho ty raha nirehafe’e ohatse, ty mpiana’e ila’e tie indraike zay. Faie nengà’e handeha iareo fa tsy niforesé’e hijanogne.—Jaona 6:60-62, 66-68.
Nampianare i Jesosy o mpanonjohy ty lia’e reo fa tsy toko’e hamoresé ndaty mba hiala amy ty fivavaha’e iareo. Tsy toko’e hamoresé ndaty hagneke ty talily soa i Fanjakagney ka iareo, fa hipay ze ndaty vognogne hitsanogne izay.—Matio 10:7, 11-14.
Tsy misy dika’e naho miova finoagne ty ndaty raike faie niforesévagne avao. Ty ndaty mivavake aman’Andrianagnahare amy ty fo’e avao ro ankasitraha’e.—Deoteronomia 6:4, 5; Matio 22:37, 38.

Mitaogne o ndatio mba hagnorike ty fivavaha’ay vao zahay?

Maregne aloha fa mitory “amy ty faritse fara’e lavitse amy ty tane toy iaby” zahay sady manao izay “agnatreha o ndaty eo naho isan-tragno.” Ty anto’e, izay ty andilia ty Baiboly. (Asan’ny Apostoly 1:8; 10:42; 20:20) Manahake o Kristiana voaloha’eo, le misy fotoagne zahay asara o ndatio ho mitaogne ndaty hagnorike ty fivavaha’ay, ie amy izao tsy nahazo alalagne hanao izay zahay. (Asan’ny Apostoly 18:12, 13) Faie diso zay. Tsy mamoresé ndra ia ndra ia hagnorike ty fivavaha’ay zahay. Toko’e hengagne hamantatse soa ty raha raike ty ndaty raike arake ty heve’ay amy izay afake mifily soa ze horihe’e reke.

Tsy mamoresé ndaty hiova fivavahagne zahay. Tsy misy politike ka ty ambalike ty raha atao’ay ao, sady tsy tambetambeze’ay fagnampeagne naho raha hafa o ndatio mba hanjare hivavake ama’ay ao. Misy ndaty mirehake ho Kristiana faie manao ireo, le magnafa-baraka i Kristy. b

Managne zo hiova fivavahagne vao o ndatio?

Niala tamy ty fivavaha ty keleia’e ty mpaminany atao tihoe Abrahama

Eka. Trea amy Baiboly ao fa managne zo hiova fivavahagne o ndatio. Rehafe’e ao fa maro ty ndaty nifily ty tsy hagnorike sasa ty fivavaha ty keleia’e fa hanompo i tena Andrianagnaharey sady tsy nisy namoresé aze hanao izay. Agnisa iareo ty Abrahama, i Rota, ty ndaty ila’e ta Atena agne, naho i apostoly Paoly. (Josoa 24:2; Rota 1:14-16; Asan’ny Apostoly 17:22, 30-34; Galatianina 1:14, 23) Trea amy Baiboly ao aza fa zo o ndatio ty miala amy ty fivavahagne ankasitrahan’Andrianagnahare ndra tie tsy soa ty miala amy ze fivavahagne zay.—1 Jaona 2:19.

Managne zo hiova fivavahagne o ndatio, arake ty Fagnambaragne Iraisam-pirenena Miomba ty Zon’olombelogne, tokave o Firenena Mikambagneo tihoe “fototse ty lalàna iraisam-pirenena miomba ty zon’olombelogne” ze raha zay. Voarehake amo o fagnambaragne io fa manan-jò “malalake hiova fivavahagne naho raha inoagne” ty ndaty iaby, sady managne zo ‘hikaroke, handrambe naho hampiely vaovao ndra hevetse.’ Agnisa izay ty hevetse mifandrambe amy ty fivavahagne. c Mazava ho aze fa managne adidy hagnaja ty zo ty hafa ze managne o zo reo. Anoe’e an-tsaigne fa managne zo tsy hiala amy ty raha inoa’e naho tsy hagneke ze hevetse tsy eké’e ka ty hafa.

Tsy magnaja ty rae aman-drene’e vao ty ndaty raike miova fivavahagne satria tsy manao ze fomban-drazagne naho ze fombafomba fatao ty keleia’e sasa reke?

Tsy voatere. Mandrisike antika ty Baiboly mba hagnaja ty ndaty iaby ndra inogn’ino ty fivavaha’e. (1 Petera 2:17) Mandily antika mba hagnaja ty rae aman-drenentika ty Baiboly, le mankatò izay ty Vavolombelo i Jehovah ndra tie tsy mitovy finoagne ama’e aza ty rae aman-drene’e.—Efesianina 6:2, 3.

Tsy ty ndaty iaby ro magneke ty raha rehafe ty Baiboly. Hoe ty ampela raike nibey ta Zambia agne toy: ‘Manahake tihoe mivalike amy ty keleia’o naho amy ty fiaraha-monegne rehe ama’ay agne naho miova finoagne.’ Izay ty raha nanjò o ampela iohoe tamy ireke mbe nitanora. Nianatse Baiboly tamy ty Vavolombelo i Jehovah reke tamy izay, le tsy ela tafara izay nanapa-kevetse tie hiova fivavahagne. Hoe reke: ‘Naherenkere i Baba naho i Nene tamako avao tie tena nahaboseke iareo ty raha nataoko sady nandiso tamà iareo ka raho. Tena nimafe tamako zay satria tsy te hampalahelo iareo raho. Tsy tihoe mivalike amy ty keleiako raho naho nanapa-kevetse fa tsy hivalike amy i Jehovah naho tsy hagnorike ty fombafomba ty fivavahako taloha sasa.’ d

a Henteo ty Fitalakesan-davitse 1 Janvie 2002, peje 12, fehentsoratse 15.

b Namoake lily ohatse, ty Charlemagne Mpanjaka tamy ty taogne 785 tagne ho agne, tie hovonoegne ze mpone i Saxe tsy magneke hanjare Kristiana naho hatao badisa. Nisy fifagnekeagne natao tihoe Fifagnekea i Augsbourg ka tamy ty taogne 1555, le nanao sonia aze ty antoko o ndaty nialy tamy ty Fanjakagne Romana Masigne. Voarehake tao fa tsy maintsy Katolika ndra Loterana ty mpitondra iaby amy ty faritane i fanjakagney, sady tsy maintsy magnorike ty fivavaha o mpitondrao o vahoakeo. Nampifindraegne monegne ze tsy nagneke hanao izay.

c Nisy fagnambaragne mitovitovy amy izay ka ty amy retoa: Lalàna Afrikana Miomba ty Zon’olombelogne naho ty Zo o Vahoakeo, Fagnambaragne Amerikana Miomba ty Zo naho ty Andraiky ty Ndaty Fehé i Firenenay, Lalàna Arabo Miomba ty Zon’olombelogne tamy 2004, Fagnambaragne Miomba ty Zon’olombelogne Natao i ASEAN (Fikambana ty Firenena Atimo atignana i Azia agne), Fifagnarahagne Eropeana Miomba ty Zon’olombelogne naho ty Fifagnarahagne Iraisam-pirenena miomba ty Zo Sivily naho Politike. Ndra o firenena namoake o fagnambaragne reo aza miovaova hevetse naho fa tena hampiharegne reo.

d I Jehovah ty tahina i tena Andrianagnaharey arake ty rehafe ty Baiboly.